Zakariya 7

Na rĩrĩ, mwaka-inĩ wa kana wa Mũthamaki Dario, kiugo kĩa Yahweh nĩ gĩakinyĩire Zakariya mũthenya wa kana wa mweri wa kenda, ũguo nĩ kuuga mweri wa Kisilevu

Andũ a Betheli nĩ maatũmire Sharezeru marĩ na Regemu-meleku hamwe na andũ ake magathaithane nĩguo metĩkĩrĩke nĩ Yahweh,

na njĩra ya kũũria athĩnjĩri-Yahweh a nyũmba ya Yahweh mũnene wa ita o hamwe na anabii atĩrĩ: “Hihi nĩ njagĩrĩirũo kũrĩra mweri-inĩ wa gatano na gwĩthema kũrĩa irio, ta ũrĩa ndũire njĩkĩte ihinda rĩa mĩaka mĩingĩ?”

Kiugo kĩa Yahweh mũnene wa ita gĩkĩnginyĩra o rĩngĩ ngĩrũo atĩrĩ:

“Ũria andũ othe a bũrũri na athĩnjĩri-Yahweh atĩrĩ, ‘Ihinda-inĩ rĩa mĩaka 70 rĩrĩa mwehingaga na mũkarĩra mweri-inĩ wa gatano na mweri-inĩ wa mũgwanja-rĩ, hihi mwehingaga nĩ ũndũ wakwa

Na hĩndĩ ĩrĩa mwarĩaga na mũkanyua-rĩ, na githĩ mũtiarĩaga nĩ ũndũ wanyu ene na mũkanyua nĩ ũndũ wanyu ene

Githĩ mũtiagĩrĩirũo gwathĩkĩra ciugo iria Yahweh aarĩtie kũgerera anabii a tene, hĩndĩ ĩrĩa Yahrushalayim na matũũra marĩa maamĩthiũrũrũkĩirie gwaikaragwo na kwarĩ na thayũ, na hĩndĩ ĩrĩa Negebu na Shefela gwaikaragwo?’”

Kiugo kĩa Yahweh gĩgĩkinyĩra Zakariya o rĩngĩ akĩrũo atĩrĩ:

“Yahweh mũnene wa ita ekuuga atĩrĩ, ‘Tuanagĩrai na ituĩro rĩa ma, na mũiguanagĩre tha mũndũ na ũrĩa ũngĩ na mũcayanagĩre

Mũtikahinyagĩrĩrie mũtumia wa ndigwa kana mwana wa ngoriai, mũndũ wa kũngĩ kana ũrĩa mũthĩni; na mũtigathugundage ũndũ mũũru ngoro-inĩ cianyu kwerekera mũndũ ũrĩa ũngĩ.’

No nĩ maaregire gũthikĩrĩria, na makĩhũgũra mĩgongo yao momĩtie ciongo, na makĩhinga matũ mao nĩguo matikaigue

Maatũmire ngoro ciao ihaane o ta ihiga rĩa arimathi na makĩrega gwathĩkĩra watho na ciugo iria Yahweh mũnene wa ita aatũmire kũgerera roho wake akĩhũthĩra anabii a tene. Nĩ ũndũ ũcio gũkĩgĩa na mangʼũrĩ manene kuuma kũrĩ Yahweh mũnene wa ita.”

“‘O ta ũrĩa maaregire gũthikĩrĩria rĩrĩa ndetanire, noguo o na niĩ ndaregire gũthikĩrĩria rĩrĩa meetanire,’ ũguo nĩguo Yahweh mũnene wa ita ekuuga

‘Na ngĩmahurunja na rũhuho rũnene kũndũ guothe ndũrĩrĩ-inĩ ciothe iria mataamenyete, na magĩtiga bũrũri ũcio ũrĩ kũndũ gũtiganĩrie, gũtarĩ mũndũ ũrahĩtũkĩra kuo kana ũracoka kuo; nĩ gũkorũo nĩ maatũmire bũrũri ũcio wa kwĩrirĩrio ũtuĩke kĩndũ gĩa kũguoyohia.’”