Zakariya 9

Ĩno nĩ ndũmĩrĩri nditũ: “Kiugo kĩa Yahweh nĩ gĩũkĩrĩire bũrũri wa Hadaraka, Na Dameski nĩkuo kĩerekeirio —Nĩ gũkorũo maitho ma andũ marĩ harĩ Yahweh O namo ma mĩhĩrĩga yothe ya Isiraeli marĩ harĩ Yahweh.

Na gĩgokĩrĩra Hamathu, ĩrĩa ĩriganĩtie nakuo, Na gĩgokĩrĩra andũ a Turo na Sidoni, nĩ gũkorũo nĩ ogĩ mũno.

Turo nĩ yeyakĩire rũirigo. Yacokanĩrĩirie betha nyingĩ ta rũkũngũ Na thahabu nyingĩ ta tĩri wa barabara-inĩ.

Tooneei, Yahweh nĩ akamũthinĩkania amũingate Na nĩ akaaniina mbũtũ yakuo thĩinĩ wa iria; Na nĩ gũgaacinwo na mwaki.

Ashikeloni ĩkoona ũndũ ũcio ĩĩtigĩre; Gaza nĩ ĩgaatangĩka mũno, O na Ekironi, tondũ kĩĩrĩgĩrĩro gĩakuo nĩ gĩconorithĩtio. Mũthamaki nĩ agaathira ehere thĩinĩ wa Gaza, Na Ashikeloni gũtigaatũũrũo.

Mwana wa kũngĩ nĩwe ũgaaikara Ashidodi, Na nĩ ngaaniina mwĩtĩo wa Mũfilisti.

Nĩ ngaaruta indo iria irĩ na thakame kanua-inĩ gake Na ndute indo iria irĩ magigi gatagatĩ-inĩ ka magego make, Na nĩ agaatigwo, atigare arĩ wa Kĩhoti witũ; Na nĩ agaatuĩka ta mũnene thĩinĩ wa Yahuda, Na Ekironi ĩtuĩke ta Mũjebusi.

Nĩ ngaamba hema nduĩke mũrangĩri wa nyũmba yakwa, Nĩgetha gũtikanagĩe mũndũ ũgũtuĩkanĩria kuo kana ũgũcoka kuo; Na gũtirĩ mũrũgamĩrĩri wa wĩra ũgaatuĩkanĩria kuo rĩngĩ, Nĩ gũkorũo rĩu nĩ ndĩyoneire ũndũ ũcio na maitho makwa.

Kena mũno, wee mwarĩ wa Zayuni. Kũngũiya nĩ ũndũ wa ũhootani, wee mwarĩ wa Yahrushalayim. Onee! Mũthamaki waku nĩ aroka kũrĩ wee. Nĩ mũthingu, nĩ ararehe ũhonokio, Nĩ mwĩnyihia na akuuĩtwo nĩ ndigiri, Agakuuo nĩ njaũ ya ndigiri, rũciaro rwa ndigiri ya mũgoma.

Nĩ ngeeheria ngaari ya mbaara thĩinĩ wa Efiraimu Na njeherie mbarathi Yahrushalayim. Ũta wa mbaara nĩ ũkeeherio. Na nĩ akaahunjia thayũ kũrĩ ndũrĩrĩ; Wathani wake ũgaakorũo uumĩte iria-inĩ rĩmwe nginya rĩrĩa rĩngĩ Na kuuma Rũũĩ-inĩ nginya ituri cia thĩ.

Ha ũhoro waku wee mũndũ-wa-nja ũyũ, kũgerera thakame ya kĩrĩkanĩro gĩaku, Nĩ ngaaruta ohwo aku thĩinĩ wa irima rĩrĩa rĩtarĩ maĩ.

Cokai mwĩgitio-inĩ, inyuĩ ohwo aya mũrĩ na kĩĩrĩgĩrĩro. Ũmũthĩ ndĩrakwĩra atĩrĩ, ‘Nĩ ngaakũrĩha maita merĩ, wee mũndũ-wa-nja ũyũ.

Nĩ ngaakũnja Yahuda o ta arĩ ũta wakwa. Ũta ũcio ngaaũiyũria na Efiraimu, Na nĩ ngaarahũra ariũ aku, wee Zayuni, Mokĩrĩre ariũ aku, wee Ngiriki, Na nĩ ngaatũma ũtuĩke ta rũhiũ rwa njora rwa njamba ya ita.’

Yahweh nĩ akooneka igũrũ rĩao, Na mũguĩ wake ũkaarathũka ta rũheni. Mũthamaki Yahweh nĩ akaahuuha coro, Na nĩ akoimagara hamwe na ihuhũkanio cia mwena wa mũhuro.

Yahweh mũnene wa ita nĩ akaamagitĩra, Na nĩ makaananga na marangĩrĩrie mahiga ma kĩgũtha. Nĩ makaanyua na manegene, ta manyuĩte ndibei; Na nĩ makaaiyũrio ta mbakũri, O ta kona cia kĩgongona.

Yahweh Kĩhoti wao nĩ akaamahonokia mũthenya ũcio Marĩ rũũru rwa andũ ake; Tondũ makaahaana ta tũhiga twa goro twa thũmbĩ tũrahenia igũrũ rĩa tĩri wake.

Na kaĩ wega wake nĩ mũnene-ĩĩ, na ũthaka wake o naguo-ĩĩ! Ngano nĩ ĩgatũma anake macanjamũke, na ndibei ya mũhihano ĩtũme airĩtu gathirange macanjamũke.