Zefaniya 1

Gĩkĩ nĩkĩo kiugo kĩa Yahweh kĩrĩa gĩakinyĩire Zefaniya mũrũ wa Kushi mũrũ wa Gedalia mũrũ wa Amaria mũrũ wa Hezekia matukũ-inĩ ma Josia mũrũ wa Amoni mũthamaki wa Yahuda:

“Nĩ ngaahaata biũ indo ciothe ciehere thĩinĩ wa thĩ,” ũguo nĩguo Yahweh ekuuga.

“Nĩ ngaahaata andũ o na nyamũ. Nĩ ngaahaata nyoni cia rĩera-inĩ o na thamaki cia iria-inĩ, O na mĩhĩnga hamwe na andũ arĩa aganu; Nĩ ngeeheria andũ thĩinĩ wa thĩ,” ũguo nĩguo Yahweh ekuuga.

“Nĩ ngaatambũrũkia guoko gwakwa njũkĩrĩre Yahuda Na njũkĩrĩre aikari othe a Yahrushalayim, Na nĩ ngaaniina matigari mothe ma Baali kũndũ gũkũ, Niine rĩĩtwa rĩa athĩnjĩri-Yahweh acio matungataga ihoti ngʼeni o na athĩnjĩri arĩa angĩ a ndũrĩrĩ itetĩkĩtie,

Hamwe na arĩa mainamagĩrĩra mbũtũ ya igũrũ marĩ nyũmba igũrũ, Na arĩa mainamagĩrĩra Yahweh na makehĩta gũkorũo marĩ ehokeku harĩ we O makĩĩhĩtaga gũkorũo marĩ ehokeku harĩ Malikamu;

Na arĩa magarũrũkaga magatiga kũrũmĩrĩra Yahweh O acio matacaragia Yahweh kana magatuĩria ũhoro harĩ we.”

Wĩkirĩre ũrĩ mbere ya Mũthamaki Yahweh, nĩ gũkorũo mũthenya wa Yahweh ũrĩ hakuhĩ. Yahweh nĩ ahaarĩirie igongona; nĩ aharĩrĩirie ageni ake.

“Mũthenya wa igongona rĩa Yahweh nĩ ngaaciirithia anene, Njirithie ariũ a mũthamaki, na arĩa othe mehumbaga nguo cia andũ a kũngĩ.

Mũthenya ũcio nĩ ngaaciirithia mũndũ o wothe ũhaicaga handũ harĩa hatũũgĩru, Arĩa maiyũragia nyũmba ya mwathi wao ũhinya na maheeni.”

Yahweh ekuuga ũũ, “Mũthenya ũcio, Nĩ gũgaakorũo na mũgambo wa kĩrĩro kuuma Kĩhingo-inĩ gĩa Thamaki, Gũkorũo na kĩrĩro kuuma Gĩcigo-inĩ Kĩrĩa Kĩerũ gĩa itũũra, Na mũrurumo mũnene kuuma tũrĩma-inĩ.

Rĩrai, inyuĩ aikari a Makiteshi, Nĩ gũkorũo onjorithia othe nĩ maniinĩtwo; Arĩa othe mathimaga betha nĩ manangĩtwo.

Hĩndĩ ĩyo nĩ ngaacaria Yahrushalayim biũ na matawa, Na nĩ ngaaciirithia andũ arĩa matatindanagĩra na maũndũ, o acio moigaga ũũ ngoro-inĩ yao, ‘Yahweh ndageka ũndũ mwega, na ndageka ũndũ mũũru.’

Ũtonga wao nĩ ũgaatahwo, nacio nyũmba ciao cianangwo. Nĩ magaaka nyũmba, no matigaikara thĩinĩ wacio; Na nĩ makaahanda mĩgũnda ya mĩthabibũ, no matikanyua ndibei kuumana nayo.

Mũthenya ũrĩa mũnene wa Yahweh ũrĩ hakuhĩ! Ũrĩ hakuhĩ na nĩ ũroka na ihenya mũno! Mũgambo wa mũthenya wa Yahweh nĩ mũrũrũ. Kũu njamba ya ita nĩ ĩkaarĩra.

Mũthenya ũcio nĩ mũthenya wa mangʼũrĩ, Mũthenya wa mĩtangĩko na kĩeha, Mũthenya wa kĩhuhũkanio na mwanangĩko, Mũthenya mũtumanu na wa nduma, Mũthenya wa matu na nduma ndumanu,

Mũthenya wa coro na wa mbugĩrĩrio ya mbaara, Kwerekera matũũra marĩa marĩ na ũgitĩri na nyũmba iria ndaya na igũrũ cia kona-inĩ.

Nĩ ngaatũma andũ matangĩke, Na magaathiaga ta andũ atumumu, Tondũ nĩ Yahweh mehĩirie. Thakame yao ĩgaaitwo thĩ o ta rũkũngũ, Na nyama ciao iteo thĩ o ta rũrua.

Betha ciao kana thahabu ciao itikaahota kũmahonokia mũthenya wa marakara ma Yahweh; Nĩ gũkorũo thĩ yothe nĩ ĩkaaniinwo nĩ mwaki wa kĩyo gĩake, Tondũ nĩ akaaniinana, aniine aikari othe a thĩ, amaniine na njĩra nene.”