Zefaniya 2

Cokanĩrĩrai hamwe, mwĩcokanĩrĩriei, Inyuĩ rũrĩrĩ rũtarĩ thoni.

Ũndũ ũrĩa wathanĩtwo ũtanahinga, Mũthenya ũtanahĩtũka o ta mahuti, Marakara mahiũ ma Yahweh matanamũkinyĩrĩra, Mũthenya wa marakara ma Yahweh ũtanamũkinyĩrĩra,

Cariai Yahweh, inyuĩ andũ othe ahooreri thĩinĩ wa thĩ, O inyuĩ mũrũmagĩrĩra mawatho make ma ũthingu. Cariai ũthingu, cariai ũhooreri. No kũhoteke nĩ mũkaahithwo mũthenya wa marakara ma Yahweh.

Nĩ gũkorũo Gaza rĩgaatuĩka itũũra rĩtiganĩrie; Na Ashikeloni gũgaatuĩka kũndũ gũtiganĩrie. Ashidodi makaarutũrũrũo mũthenya barigici, Na Ekironi nĩ gũkaamunywo.

“Kaĩ arĩa maikaraga gĩcũa-inĩ, o acio rũrĩrĩ rwa Akerethi marĩ na haaro-ĩ! Kiugo kĩa Yahweh nĩ kĩmũũkĩrĩire. Wee Kanaani, bũrũri wa Afilisti, nĩ ngaakwananga, Na gũtirĩ mũndũ ũgaatigara.

Kũu gĩcũa-inĩ gũgaatuĩka kũndũ gwa kũrĩithia, Gũgaakorũo na ithima nĩ ũndũ wa arĩithi na ciugũ cia mahiga cia ngʼondu.

Gũgaatuĩka gĩcigo kĩa arĩa magaatigara a nyũmba ya Yahuda; Kũu nĩkuo makaarĩaga. Hwaĩ-inĩ magaakomaga nyũmba-inĩ cia Ashikeloni. Nĩ gũkorũo Yahweh Kĩhoti wao nĩ akeerekeria meciria make harĩ o, Nĩ agaacokanĩrĩria andũ ao arĩa matahĩtwo amacokie.”

“Nĩ njiguĩte kĩnyũrũri kĩa Moabi na irumi cia Aamoni, O acio manyũrũrĩtie andũ akwa na makegana ũrĩa megũũkĩrĩra gĩcigo kĩao.”

Yahweh mũnene wa ita, o we Kĩhoti wa Isiraeli oigĩte ũũ: “Nĩ ũndũ ũcio-rĩ, o ta ũrĩa niĩ ndũũraga muoyo, Moabi gũgaatuĩka o ta Sodomu, Nao Aamoni mahaane o ta Gomora, Kũndũ gwa thabai, irima rĩa cumbĩ, na gũtũũre kũrĩ kwanangĩku. Andũ akwa arĩa magaatigara nĩ makaamataha indo, Na matigari ma rũrĩrĩ rwakwa nĩ makooya indo ciao.

Ũndũ ũcio nĩguo makaamũkĩra ithenya rĩa mwĩtĩo wao, Tondũ nĩ maanyũrũririe na magĩĩtũũgĩria harĩ andũ a Yahweh mũnene wa ita.

Yahweh agaakorũo arĩ wa kũmakania harĩ o; Tondũ nĩ agaatũma ihoti ciothe cia gũkũ thĩ ituĩke kĩndũ hatarĩ, Na icigĩrĩra ciothe cia ndũrĩrĩ-ĩrĩa-itetĩkĩtie nĩ ikaamũinamĩrĩra, O kĩmwe kĩrĩ handũ hakĩo.

O na inyuĩ andũ a Ethiopia nĩ mũkooragwo nĩ rũhiũ rwakwa rwa njora.

Nĩ agaatambũrũkia guoko gwake akwerekerie mwena wa rũgongo na anange Ashuri, Na nĩ agaatũma Nineve gũtuĩke kũndũ gũtiganĩrie, kũũme o ta werũ.

Ndũũru cia nyamũ nĩ igaakomaga kuo, nyamũ cia gĩthaka cia mĩthemba yothe. Nyoni ĩrĩa ĩtagwo gakuua-ũrogi o na njege ikaararaga kũu itugĩ-inĩ ciakuo. Mũgambo nĩ ũkaaina ndirica-inĩ. Nĩ gũgaakorũo na mwanangĩko itonyero-inĩ; Tondũ nĩ akaaguũria buremu cia mũtarakwa.

Rĩrĩ nĩrĩo itũũra rĩrĩa rĩarĩ na mwĩtĩo, o rĩo rĩaikaraga rĩrĩ na ũgitĩri, Rĩrĩa rĩoigaga ũũ ngoro-inĩ yarĩo, ‘Niĩ nĩ niĩ we, na gũtirĩ ũngĩ.’ Rĩu nĩ rĩtuĩkĩte kĩndũ gĩa kũguoyohia, Kũndũ gwa gũkomagwo nĩ nyamũ cia gĩthaka. Mũndũ wothe ũkaahĩtũkagĩra kuo nĩ akaahuuhaga mĩrũri na agathukathuka ngundi.”