Zefaniya 3

Kaĩ itũũra rĩrĩa iremi, o rĩu rĩthahĩtio, na rĩhinyanagĩrĩria rĩrĩ na haaro-ĩ!

Gũtirĩ mũgambo rĩathĩkagĩra; rĩtiĩtĩkagĩra ũtaaro. Rĩtiĩhokaga Yahweh; rĩtikuhagĩrĩria Kĩhoti warĩo.

Anene arĩa marĩ thĩinĩ warĩo matariĩ ta mĩrũthi ĩrararama. Atuanĩri cira arĩo matariĩ ta njũi ũtukũ; Matitigagia o na ihĩndĩ rĩa gũthũgũna gũkinyĩria rũcinĩ.

Anabii arĩo nĩ andũ matarĩ gĩtĩo, matarĩ ehokeku. Athĩnjĩri-Yahweh arĩo nĩ mathahagia kĩndũ kĩrĩa Kĩamũre; Nĩ moinaga watho.

Yahweh nĩ mũthingu thĩinĩ warĩo; gũtirĩ ũndũ mũũru ekaga. Nĩ amenyithanagia matuĩro make rũcinĩ o rũcinĩ, Ategũtigithĩria o ta ũtheri wa rũcinĩ. No mũndũ ũrĩa ũtarĩ mũthingu ndaiguaga thoni.

“Nĩ ndanangire ndũrĩrĩ; nyũmba ciacio iria ndaya na igũrũ cia kona-inĩ igĩtiganĩrio. Ngĩthũkangia barabara ciacio nginya gũkĩaga mũndũ ũragerera kuo. Matũũra ma cio maatigirũo manangĩkĩte, matarĩ na mũndũ, matarĩ na mũikari.

Ngiuga atĩrĩ, ‘Hatarĩ nganja nĩ ũkũnjĩtigĩra na wĩtĩkĩre ũtaaro,’ Nĩgetha gĩikaro kĩarĩo gĩtikanangwo —No mũhaka ndĩrĩciirithie nĩ ũndũ wa maũndũ macio mothe. No meehotorire o na makĩria gwĩka maũndũ moru.

‘Nĩ ũndũ ũcio, ikaragai mũnjĩrĩgĩrĩire,’ ũguo nĩguo Yahweh ekuuga, ‘O nginya mũthenya ũrĩa ngaarahũka ndĩtahĩre indo, Nĩ gũkorũo ituĩro rĩakwa rĩa cira nĩ gũcokanĩrĩria ndũrĩrĩ, gũcokanĩrĩria mothamaki, Ndĩmaitũrũrĩre mathũgũta makwa, marakara makwa mothe mahiũ; Nĩ gũkorũo thĩ yothe nĩ ĩkaaniinwo nĩ mwaki wa kĩyo gĩakwa.

Tondũ hĩndĩ ĩyo nĩ ngaagarũra tũnua twa andũ a ndũrĩrĩ ndĩmahe rũthiomi rwerũ rũtarĩ rwa ndũire, Nĩgetha ikundi icio ciothe ikayagĩre rĩĩtwa rĩa Yahweh, Imũtungatagĩre irĩ na ũrũmwe.’

Kuuma mbarĩ ĩrĩa ĩngĩ ya njũũĩ cia Ethiopia, Andũ arĩa mangayagĩra, mwarĩ wa andũ akwa arĩa mahurunjũkĩte, nĩ makaandehera kĩheo.

Mũthenya ũcio wee ndũgaaconorithio Nĩ ũndũ wa ciĩko ciaku ciothe iria wanemeire nacio, Nĩ gũkorũo hĩndĩ ĩyo nĩ ngeeheria andũ arĩa merahaga marĩ na mwĩtĩo gatagatĩ-inĩ gaku; Na ndũgaacoka gwĩtĩa rĩngĩ kĩrĩma-inĩ gĩakwa kĩrĩa kĩamũre.

Nĩ ngetĩkĩria andũ enyihia na ahooreri matigare gatagatĩ-inĩ gaku, Na nĩ makoorĩra harĩ rĩĩtwa rĩa Yahweh.

Andũ a Isiraeli arĩa magaatigara matigeeka maũndũ matarĩ ma ũthingu; Matikaaria ũndũ wa maheeni, kana rũrĩmĩ rwa maheeni ruoneke tũnua-inĩ twao; Nĩ makaarĩaga na magakoma, na gũtirĩ mũndũ ũgaatũma maigue guoya.”

Anĩrĩra ũkenete, wee mwarĩ wa Zayuni! Anĩrĩra nĩ ũndũ wa ũhootani, wee Isiraeli! Kena na ũcanjamũke na ngoro yaku yothe, wee mwarĩ wa Yahrushalayim!

Yahweh nĩ eheretie matuĩro marĩa ũtuĩrĩirũo. Nĩ ahũndũrĩte thũ yaku. Yahweh, o we Mũthamaki wa Isiraeli, arĩ thĩinĩ waku. Ndũgaacoka gwĩtigĩra thĩna rĩngĩ.

Mũthenya ũcio Yahrushalayim nĩ ĩkeerũo atĩrĩ: “Ndũgetigĩre, wee Zayuni. Ndũkareke moko maku maregere.

Yahweh Kĩhoti waku arĩ thĩinĩ waku. Tondũ We nĩ mwene hinya, nĩ akaahonokania. Nĩ agaakena nĩ ũndũ waku arĩ na gĩkeno kĩnene. Nĩ akahurũka nĩ ũndũ wa wendo wake gũkwerekera. Nĩ agaacanjamũka nĩ ũndũ waku akĩanagĩrĩra nĩ gũkena.

Nĩ ngaacokanĩrĩria arĩa macakayaga nĩ ũndũ wa gũkorũo matarĩ ciathĩ-inĩ ciaku; Maagaga gũkorũo thĩinĩ waku tondũ wa kũnyũrũrio nĩ ũndũ wake.

Ta kĩyonereei, hĩndĩ ĩyo nĩ ngoya ikinya njũkĩrĩre arĩa othe makũhinyagĩrĩria; Na nĩ ngaahonokia mũndũ ũrĩa ũthuaga, Na njokanĩrĩrie arĩa mahurunjũkĩte. Nĩ ngaatũma matuĩke kĩndũ gĩa kũgaathagĩrĩrio na magĩe ngumo Mabũrũri-inĩ mothe marĩa manaconorithĩrio.

Hĩndĩ ĩyo nĩ ngaamũcokia, Hĩndĩ ĩrĩa ngaamũcokanĩrĩria hamwe. Nĩ gũkorũo nĩ ngaatũma mũtuĩke kĩndũ gĩa kũgaathagĩrĩrio na mũgĩe ngumo gatagatĩ-inĩ ka ikundi ciothe cia andũ thĩinĩ wa thĩ, Rĩrĩa ngaacokanĩrĩria andũ anyu arĩa matahĩtwo ndĩmacokie mũkĩĩyonagĩra,” ũguo nĩguo Yahweh ekuuga.