Athamaki wa Keerĩ 16

Mwaka-inĩ wa 17 wa Peka mũrũ wa Remalia, Ahazu mũrũ wa Mũthamaki Jothamu wa Yahuda nĩ aatuĩkire mũthamaki

Ahazu aarĩ na mĩaka 20 rĩrĩa aatuĩkire mũthamaki, na agĩathana mĩaka 16 thĩinĩ wa Yahrushalayim. Ndeekire maũndũ marĩa maagĩrĩire maitho-inĩ ma Yahweh Kĩhoti wake, ta ũrĩa Daudi ithe wao wa tene eekĩte

Ithenya rĩa ũguo, aarũmĩrĩire njĩra ya athamaki a Isiraeli, o na akĩhĩtũkĩria mũrũ wake mwene mwaki-inĩ, akĩrũmĩrĩra mĩtugo ĩrĩ magigi ya ndũrĩrĩ iria Yahweh aaingatĩte ciehere mbere ya ciana cia Isiraeli

Ningĩ agĩthiĩ na mbere kũrutĩra magongona na ndogo ya magongona kũndũ kũrĩa gũtũũgĩru, tũrĩma igũrũ, na rungu rwa mũtĩ o wothe mũruru.

Hĩndĩ ĩyo nĩrĩo Mũthamaki Rezini wa Siria na Peka mũrũ wa Remalia mũthamaki wa Isiraeli mookire kũrũa na Yahrushalayim. Makĩrigicĩria Ahazu no matiahotire gũtaha itũũra rĩu

Hĩndĩ ĩyo Mũthamaki Rezini wa Siria agĩcokia Elathu kũrĩ Edomu, thutha ũcio akĩingata Ayahudi kuuma Elathu. Nao Aedomu makĩingĩra Elathu, na kũu nĩkuo matũire nginya ũmũthĩ ũyũ

Ahazu agĩgĩtũma atũmwo kũrĩ Mũthamaki Tigilathu-pileseru wa Ashuri, akĩmwĩra ũũ: “Niĩ ndĩ ndungata yaku na mũrũguo. Ambata ũũke ũũhonokie kuuma guoko-inĩ kwa mũthamaki wa Siria na guoko-inĩ kwa mũthamaki wa Isiraeli, arĩa maratharĩkĩra.”

Ahazu agĩcoka akĩoya betha na thahabu iria ciarĩ nyũmba-inĩ ya Yahweh na igĩna-inĩ cia nyũmba ya mũthamaki na agĩtũmĩra mũthamaki wa Ashuri ihaki

Nake mũthamaki wa Ashuri agĩtĩkĩra ihoya rĩake, akĩambata agĩthiĩ Dameski na akĩmĩtaha, nao andũ a kuo akĩmatwara ithamĩrio Kiri, na akĩũraga Rezini.

Thutha ũcio Mũthamaki Ahazu agĩthiĩ gũcemania na Mũthamaki Tigilathu-pileseru wa Ashuri kũu Dameski. Rĩrĩa Mũthamaki Ahazu oonire kĩgongona kĩrĩa kĩarĩ Dameski, agĩtũmĩra Uriyah mũthĩnjĩri-Yahweh mũcoro wa kĩgongona kĩu, akĩonania mũhianĩre wakĩo na ũrĩa gĩathondeketwo

Uriyah ũcio mũthĩnjĩri-Yahweh agĩaka kĩgongona kũringana na mĩtaratara yothe ĩrĩa Mũthamaki Ahazu aatũmĩte kuuma Dameski. Uriyah ũcio mũthĩnjĩri-Yahweh akĩrĩkia gwaka kĩgongona kĩu Mũthamaki Ahazu atacokete kuuma Dameski

Rĩrĩa mũthamaki aacokire kuuma Dameski akĩona kĩgongona kĩu, agĩthiĩ harĩa kĩgongona kĩu kĩarĩ na akĩrutĩra magongona igũrũ rĩakĩo

Na agĩthiĩ na mbere kũrutĩra ndogo ya magongona make ma njino na magongona make ma mũtu kĩgongona-inĩ kĩu; ningĩ agĩita magongona make ma ndibei na akĩminjaminjia thakame ya magongona make ma ũiguano igũrũ rĩakĩo

Ningĩ agĩthamia kĩgongona gĩa gĩcango kĩrĩa kĩarĩ mbere ya Yahweh kuuma handũ hakĩo mbere ya nyũmba ĩyo, kuuma gatagatĩ ga kĩgongona gĩake mwene na nyũmba ya Yahweh, agĩkĩiga mwena wa rũgongo wa kĩgongona gĩake mwene

Mũthamaki Ahazu agĩatha Uriyah ũcio mũthĩnjĩri-Yahweh akĩmwĩra atĩrĩ: “Rutagĩra ndogo ya igongona rĩa njino rĩa rũcinĩ igũrũ rĩa kĩgongona kĩrĩa kĩnene, o hamwe na igongona rĩa mũtu rĩa hwaĩ-inĩ, igongona rĩa njino rĩa mũthamaki, na igongona rĩake rĩa mũtu, o na magongona ma njino, magongona ma mũtu, na magongona ma ndibei ma andũ othe. Wagĩrĩirũo gũkĩminjaminjĩria thakame yothe ya magongona ma njino, na thakame yothe ya magongona macio mangĩ. Ha ũhoro wa kĩgongona gĩa gĩcango, nĩ ngũtua ũrĩa ngwĩka nakĩo.”

Nake Uriyah ũcio mũthĩnjĩri-Yahweh agĩka maũndũ mothe marĩa Mũthamaki Ahazu aamwathĩte.

Makĩria ma ũguo, Mũthamaki Ahazu agĩtinangia tũbaati twa mwena-inĩ twa tũkaari tũcunjĩ tũcunjĩ na akĩeheria iraĩ kuuma harĩ tuo, o na akĩeheria Karia kuuma igũrũ rĩa ndegwa cia gĩcango iria ciagatiirĩrĩire agĩkaiga gacĩra-inĩ ka mahiga

Nakĩo gĩthaku gĩa Thabatũ kĩrĩa gĩakĩtwo nyũmba-inĩ ĩyo na itonyero rĩa na nja rĩa mũthamaki agĩcieheria kuuma nyũmba-inĩ ya Yahweh; eekire ũguo nĩ ũndũ wa mũthamaki wa Ashuri.

Ha ũhoro wa maũndũ macio mangĩ megiĩ Ahazu, ũrĩa eekire, na githĩ ti maandĩke ibuku-inĩ rĩa maũndũ ma mahinda ma athamaki a Yahuda

Thutha ũcio Ahazu akĩhurũkio hamwe na maithe make ma tene, na agĩthikwo hamwe na maithe make ma tene thĩinĩ wa Itũũra rĩa Daudi; na mũrũwe Hezekia agĩtuĩka mũthamaki ithenya rĩake.