Athamaki wa Keerĩ 24

Matukũ-inĩ ma Jehoiakimu, Mũthamaki Nebukadineza wa Babuloni nĩ ookire kũmũũkĩrĩra, na Jehoiakimu agĩtuĩka ndungata yake ihinda rĩa mĩaka ĩtatũ. No rĩrĩ, nĩ aamũgarũrũkire na akĩmũremera

Nake Yahweh akĩambĩrĩria gũtũma ikundi cia atunyani cia Akalidei, Asiria, Amoabi, na Aamoni nĩguo imũũkĩrĩre. Agĩthiĩ na mbere gũcitũma ciũkĩrĩre Yahuda nĩguo cimĩanange, kũringana na kiugo kĩa Yahweh kĩrĩa aarĩtie kũgerera ndungata ciake anabii

Hatarĩ nganja Yahweh nĩwe waathanĩte ũndũ ũcio wĩkĩke harĩ Yahuda, nĩguo ameherie maitho-inĩ make tondũ wa mehia mothe marĩa Manase eekĩte,

ningĩ tondũ wa thakame ĩtarĩ na mahĩtia ĩrĩa aaitĩte, nĩ gũkorũo aaiyũrĩtie Yahrushalayim thakame ĩtarĩ mahĩtia na Yahweh ndeehaarĩirie kuohanĩra.

Ha ũhoro wa maũndũ macio mangĩ megiĩ Jehoiakimu, ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Yahuda

Thutha ũcio Jehoiakimu akĩhurũkio hamwe na maithe make ma tene; na mũrũwe Jehoiakini agĩtuĩka mũthamaki ithenya rĩake.

Mũthamaki wa Misiri ndaacokire kuuma bũrũri-inĩ wake rĩngĩ, tondũ mũthamaki wa Babuloni nĩ ooete indo ciothe iria ciarĩ cia mũthamaki wa Misiri, kuuma Mũkuru-inĩ wa Misiri nginya Rũũĩ-inĩ rwa Farati.

Jehoiakini aarĩ na mĩaka 18 rĩrĩa aatuĩkire mũthamaki, na agĩathana mĩeri ĩtatũ thĩinĩ wa Yahrushalayim. Nyina eetagwo Nehushita mwarĩ wa Elinathani wa Yahrushalayim

Nake agĩthiĩ na mbere gwĩka maũndũ moru maitho-inĩ ma Yahweh, kũringana na maũndũ mothe marĩa ithe eekĩte

Ihinda-inĩ rĩu, ndungata cia Mũthamaki Nebukadineza wa Babuloni nĩ ciokire gũũkĩrĩra Yahrushalayim, na itũũra rĩu rĩkĩrigicĩrio

Nake Mũthamaki Nebukadineza wa Babuloni agĩũka itũũra-inĩ rĩu hĩndĩ ĩyo ndungata ciake ciarĩrigicĩirie.

Mũthamaki Jehoiakini wa Yahuda akiuma agĩthiĩ kũrĩ mũthamaki wa Babuloni, arĩ hamwe na nyina, ndungata ciake, anene ake, na anene a nyũmba yake; nake mũthamaki wa Babuloni akĩmũnyita mĩgwate mwaka-inĩ wa kanana wa wathani wake

Agĩcoka akĩoya kuuma kũu mĩthithũ yothe ya nyũmba ya Yahweh na mĩthithũ ya nyũmba ya mũthamaki. Nacio indo ciothe cia thahabu iria Suleimani mũthamaki wa Isiraeli aathondekete hekarũ-inĩ ya Yahweh agĩcitinangia tũcunjĩ tũcunjĩ. Ũndũ ũcio weekĩkire o ta ũrĩa Yahweh aarathĩte

Agĩtwara Yahrushalayim yothe ithamĩrio, anene othe, njamba ciothe cia ita iria irĩ hinya, na bundi o wothe na mũturi wa cuma o wothe—agĩtwara andũ 10,000 ithamĩrio. Gũtirĩ mũndũ watigirũo tiga o andũ arĩa athĩni biũ a bũrũri ũcio

Kwoguo agĩtwara Jehoiakini ithamĩrio Babuloni; ningĩ akĩoya nyina wa mũthamaki, atumia a mũthamaki, anene a nyũmba yake, na andũ arĩa marĩ igweta a bũrũri ũcio, akĩmaruta Yahrushalayim akĩmatwara ithamĩrio Babuloni

Ningĩ mũthamaki wa Babuloni agĩtwara ithamĩrio njamba ciothe cia ita, andũ 7,000, o hamwe na mabundi na aturi a cuma 1,000, othe arũme marĩ hinya na mamenyeretio ũhoro wa mbaara

Mũthamaki wa Babuloni agĩtua Matania, mamawe wa Jehoiakini mũthamaki ithenya rĩake, na akĩgarũra rĩĩtwa rĩake akĩmwĩta Zedekia.

Zedekia aarĩ na mĩaka 21 rĩrĩa aatuĩkire mũthamaki, na agĩathana mĩaka 11 thĩinĩ wa Yahrushalayim. Nyina eetagwo Hamutali mwarĩ wa Jeremia kuuma Libina

Nake agĩthiĩ na mbere gwĩka maũndũ moru maitho-inĩ ma Yahweh, kũringana na maũndũ mothe marĩa Jehoiakimu eekĩte

Tondũ wa marakara ma Yahweh, nĩkĩo maũndũ macio meekĩkire thĩinĩ wa Yahrushalayim na thĩinĩ wa Yahuda, nginya akĩmaingata mehere maitho-inĩ make. Nake Zedekia akĩremera mũthamaki wa Babuloni.