Athamaki wa Keerĩ 9

Na rĩrĩ, Elisha ũrĩa mũnabii agĩcoka agĩta ũmwe wa ariũ a anabii akĩmwĩra atĩrĩ: “Wĩyohe nguo ciaku njohero, na woe ndigithũ ĩno ya maguta na ihenya ũthiĩ Ramothu-gileadi

Wakinya kuo, ũcarie Yahu mũrũ wa Jehoshafatu mũrũ wa Nimushi; ũtonye na ũmweherie harĩ ariũ a ithe ũmũtware rumu-inĩ ya thĩinĩ biũ

Ũcoke woe ndigithũ ĩyo ya maguta ũmũitĩrĩrie mũtwe na uuge atĩrĩ, ‘Ũũ nĩguo Yahweh ekuuga: “Nĩ ndagũitĩrĩria maguta ũtuĩke mũthamaki wa Isiraeli.”’ Thutha ũcio ũhingũre mũrango na ũũre ũtekũmaĩrĩria.”

Nĩ ũndũ ũcio, ndungata ĩyo ya mũnabii ĩkiumagara ĩthiĩ Ramothu-gileadi

Rĩrĩa yakinyire, anene a mbũtũ maaikarĩte thĩ hau. Nayo ĩkiuga atĩrĩ: “Ndĩ na ndũmĩrĩri yaku, wee mũnene ũyũ.” Nake Yahu akĩũria: “Nĩ ndũmĩrĩri ya ũ gatagatĩ-inĩ gaitũ?” Nayo ĩkiuga: “Nĩ yaku wee mũnene ũyũ.”

Nake Yahu agĩũkĩra agĩtonya thĩinĩ wa nyũmba; ndungata ĩyo ĩkĩmũitĩrĩria maguta mũtwe na ĩkĩmwĩra atĩrĩ, “Ũũ nĩguo Yahweh Kĩhoti wa Isiraeli ekuuga: ‘Nĩ ndagũitĩrĩria maguta ũtuĩke mũthamaki wa andũ a Yahweh, mũthamaki wa Isiraeli

No mũhaka ũniine nyũmba ya Ahabu mwathi waku, na nĩ ngũrĩhĩria thakame ya ndungata ciakwa anabii, na ya ndungata ciothe cia Yahweh iria ciakuire moko-inĩ ma Jezebeli

Na nyũmba yothe ya Ahabu nĩ ĩgũthira; na nĩ ngũniina mũndũrũme o wothe wa nyũmba ya Ahabu, nginya arĩa matarĩ na ũteithio na matarĩ hinya thĩinĩ wa Isiraeli

Na nĩ ngũtũma nyũmba ya Ahabu ĩhaane o ta nyũmba ya Jeroboamu mũrũ wa Nebati na o ta nyũmba ya Baasha mũrũ wa Ahiya

Ha ũhoro wĩgiĩ Jezebeli, ekũrĩo nĩ ngui mũgũnda-inĩ kũu Jezireeli, na gũtirĩ mũndũ ũkũmũthika.’” Ndungata ĩyo yarĩkia kuuga ũguo, ĩkĩhingũra mũrango na ĩkĩũra.

Rĩrĩa Yahu aacokire kũrĩ ndungata cia mwathi wake, makĩmũũria atĩrĩ: “Maũndũ mothe nĩ mega? Mũgũrũki ũcio egũũkĩte kũrĩ wee gwĩka atĩa?” Nake akĩmacokeria akĩmeera: “Nĩ mũĩ ũrĩa mũndũ ta ũcio atariĩ na ũrĩa ndeto ciake itariĩ.”

No o makĩmwĩra atĩrĩ: “Ũcio ti ũhoro wa ma! Twĩre ma.” Nake akiuga: “Ũũ nĩguo anjĩra, acoka ongerera atĩrĩ, ‘Ũũ nĩguo Yahweh ekuuga: “Nĩ ndagũitĩrĩria maguta ũtuĩke mũthamaki wa Isiraeli.”’”

Maigua ũguo, o ũmwe wao akĩoya nguo yake na akĩmĩara ngathĩ-inĩ itaarĩ kĩndũ nĩguo arũgame ho, ningĩ makĩhuuha coro makiuga atĩrĩ: “Yahu nĩ atuĩka mũthamaki!”

Nake Yahu mũrũ wa Jehoshafatu mũrũ wa Nimushi akĩbanga njama ya gũũkĩrĩra Jehoramu.

Thutha ũcio Mũthamaki Jehoramu agĩcoka Jezireeli nĩguo akahonie nguraro iria aagurarĩtio nĩ Asiria rĩrĩa aarũire na Mũthamaki Hazaeli wa Siria.

Yahu agĩcoka akĩhaica ngaari yake ya mbarathi na agĩthiĩ Jezireeli, nĩ gũkorũo Jehoramu aakomete kũu arĩ na nguraro, na Mũthamaki Ahazia wa Yahuda nĩ aaikũrũkĩte agathiĩ kuona Jehoramu

Hĩndĩ ĩrĩa mũrangĩri aarũgamĩte igũrũ rĩa nyũmba ndaya na igũrũ kũu Jezireeli, akĩona kĩrĩndĩ kĩa arũme a Yahu gĩgĩũka. O rĩmwe akiuga: “Ndĩrona kĩrĩndĩ kĩa arũme.” Jehoramu akiuga: “Oya mũtwarithia ũmwe wa mbarathi ũmũtũme agacemanie nao, amorie atĩrĩ, ‘Hihi mũroka na thayũ?’”

Nĩ ũndũ ũcio, mũtwarithia ũmwe wa mbarathi agĩthiĩ gũcemania nake na akiuga atĩrĩ: “Mũthamaki aroria atĩrĩ, ‘Hihi mũroka na thayũ?’” No Yahu akĩmwĩra: “Ũrĩ na ũhoro ũrĩkũ na ‘thayũ’? Thiĩ thutha wakwa!”

Nĩ ũndũ ũcio, agĩtũma mũtwarithia wa mbarathi wa kerĩ na akinya harĩ o akĩmeera atĩrĩ: “Mũthamaki aroria atĩrĩ, ‘Hihi mũroka na thayũ?’” No Yahu akĩmwĩra: “Ũrĩ na ũhoro ũrĩkũ na ‘thayũ’? Thiĩ thutha wakwa!”

Mũrangĩri ũcio agĩcoka akĩheana ũhoro akiuga: “Nĩ akinyire harĩ o, no ndanacoka, na mũtwarithĩrie wa ngaari nĩ ta wa Yahu mũcũkũrũ wa Nimushi, nĩ gũkorũo atwarithagia ta mũgũrũki.”

Nake Jehoramu akiuga: “Haarĩriai ngaari!” Nĩ ũndũ ũcio ngaari yake ya mbaara ĩkĩhaarĩrio na Mũthamaki Jehoramu wa Isiraeli na Mũthamaki Ahazia wa Yahuda magĩthiĩ gũcemania na Yahu, o mũndũ arĩ ngaari-inĩ yake ya mbaara. Magĩcemania nake mũgũnda-inĩ wa Nabothu ũrĩa Mũjezireeli.

Rĩrĩa Jehoramu oonire Yahu, akiuga: “Hihi ũroka na thayũ Yahu?” No we akĩmũũria atĩrĩ: “Kũngĩkorũo na thayũ ũrĩkũ kũrĩ na ũmaraya wa maitũguo Jezebeli na ũrogi wake mũingĩ?”

O hĩndĩ ĩyo Jehoramu akĩgarũra ngaari yake ya mbarathi nĩguo ore, na akĩra Ahazia atĩrĩ: “Nĩ twaheenererio Ahazia!”

Yahu akĩnyita ũta wake na guoko na akĩratha Jehoramu gatagatĩ ga ciande ciake, naguo mũguĩ ũkiumĩrĩra ngoro-inĩ yake, na akĩgũa ngaari-inĩ yake ya mbaara

Yahu agĩcoka akĩĩra Bidikari mũnene ũrĩa wamũteithagia atĩrĩ: “Muoe ũmũikie mũgũnda-inĩ wa Nabothu ũrĩa Mũjezireeli. Ririkana atĩ niĩ nawe twatwarithagia ngaari hamwe tũrĩ thutha wa ithe Ahabu rĩrĩa Yahweh we mwene aamenyithanirie ũndũ ũyũ kũmwerekera:

‘“Hatarĩ nganja, o ta ũrĩa ndĩronire thakame ya Nabothu na thakame ya ariũ ake ira,” ũguo nĩguo Yahweh ekuuga, “Nĩ ngerĩhĩria harĩ wee mũgũnda-inĩ o ũyũ,” ũguo nĩguo Yahweh ekuuga.’ Nĩ ũndũ ũcio, muoe ũmũikie mũgũnda-inĩ ũcio kũringana na kiugo kĩa Yahweh.”

Rĩrĩa Mũthamaki Ahazia wa Yahuda oonire ũrĩa gwekĩkaga, akĩũra agereire njĩra ya nyũmba ya mũgũnda-inĩ. (Thutha ũcio Yahu akĩmũrũmĩrĩra na akiuga atĩrĩ: “Mũũragei o nake!” Nĩ ũndũ ũcio makĩmũguraria arĩ ngaari-inĩ yake ya mbarathi rĩrĩa aambataga erekeire Guri, ĩrĩa ĩrĩ Ibileamu. No we agĩthiĩ na mbere kũũra agĩkinya Megido na agĩkuĩra kuo

Nacio ndungata ciake ikĩmũkuua na ngaari ya mbarathi ikĩmũtwara Yahrushalayim, ikĩmũthika mbĩrĩra-inĩ yake hamwe na maithe make ma tene thĩinĩ wa Itũũra rĩa Daudi

Ahazia aatuĩkĩte mũthamaki wa Yahuda mwaka-inĩ wa 11 wa Jehoramu mũrũ wa Ahabu.)

Rĩrĩa Yahu aathiire Jezireeli, Jezebeli nĩ aaiguire ũhoro ũcio. Kwoguo akĩĩhaka rangi mũirũ maitho na akĩĩgemia njuĩrĩ na akĩrora thĩ arĩ ndirica-inĩ

Rĩrĩa Yahu aaingĩraga kĩhingo-inĩ, Jezebeli akĩmũũria atĩrĩ: “Hihi maũndũ nĩ maathiire wega harĩ Zimuri, ũrĩa woragire mwathi wake?”

Yahu akĩrora igũrũ ndirica-inĩ akiuga atĩrĩ: “Nũũ ũrĩ mwena wakwa? Nũũ?” O hĩndĩ ĩyo, anene erĩ kana atatũ a kwa mũthamaki makĩrora thĩ harĩ we

Nake akiuga atĩrĩ: “Mũikiei thĩ!” Kwoguo makĩmũikia thĩ, na thakame ĩmwe yake ĩkĩminjũkĩra rũthingo na mbarathi, nake akĩmũrangĩrĩria thĩ

Agĩcoka akĩingĩra thĩinĩ, akĩrĩa na akĩnyua. Agĩcoka akiuga ũũ: “Menyai ũhoro wa mũtumia ũyũ mũrume na mũmũthike. Tondũ o na kũrĩ o ũguo, nĩ mwarĩ wa mũthamaki.”

Rĩrĩa maathiire kũmũthika, matiakorire kĩndũ tiga o ihĩndĩ rĩa mũtwe wake na magũrũ make na hĩ cia moko make

Rĩrĩa maacokire na makĩmũhe ũhoro ũcio, akiuga: “Ũndũ ũcio nĩ wahingia kiugo kĩa Yahweh kĩrĩa aaririe kũgerera harĩ ndungata yake Eliyah ũrĩa Mũtishibi, akiuga atĩrĩ, ‘Ngui nĩ ikaarĩa nyama cia mwĩrĩ wa Jezebeli mũgũnda-inĩ ũrĩa ũrĩ Jezireeli.

Nakĩo kĩimba kĩa Jezebeli gĩgaatuĩka ta thumu igũrũ rĩa mũgũnda ũcio ũrĩ Jezireeli, nĩguo matikanoige atĩrĩ: “Ũyũ nĩ Jezebeli.”’”