Athamaki wa Mbere 18
Thutha wa ihinda rĩigana ũna, mwaka-inĩ wa gatatũ, kiugo kĩa Yahweh gĩgĩkinyĩra Eliyah, akĩrũo ũũ: “Thiĩ wĩyonanie kũrĩ Ahabu, na nĩ ngũtũma mbura yure thĩinĩ wa thĩ.”
Nĩ ũndũ ũcio Eliyah agĩthiĩ kwĩyonania kũrĩ Ahabu, hĩndĩ ĩrĩa ng’aragu yarĩ nene mũno thĩinĩ wa Samaria.
Ihinda-inĩ o rĩu, Ahabu agĩta Obadia, ũrĩa warũgamagĩrĩra andũ a nyũmba yake. (Na rĩrĩ, Obadia nĩ eetigĩrĩte Yahweh mũno,
na rĩrĩa Jezebeli ooragaga anabii a Yahweh, Obadia ooire anabii 100 na akĩmahitha ngurunga-inĩ igĩrĩ, o ngurunga anabii 50, akamaheaga mĩgate na maĩ.)
Ahabu agĩcoka akĩra Obadia atĩrĩ: “Tuĩkania bũrũri ũthiĩ matherũkĩro-inĩ mothe ma maĩ na mĩkuru-inĩ yothe. Hihi twahota kuona nyeki ya kũigana nĩgetha mbarathi na nyũmbũ itũũre muoyo nĩguo nyamũ citũ ciothe itigakue.”
Nĩ ũndũ ũcio makĩgayana gĩcigo kĩrĩa megũtuĩkania. Ahabu agĩthiĩ arĩ wiki na njĩra ĩmwe, nake Obadia agĩthiĩ arĩ wiki na njĩra ĩngĩ.
Na Obadia arĩ njĩra-inĩ agĩthiĩ, Eliyah agĩũka nĩguo acemanie nake. O rĩo Obadia akĩmũmenya na akĩĩgũithia agĩturumithia ũthiũ wake thĩ, akĩũria atĩrĩ: “Mwathi wakwa Eliyah, nĩwe?”
Akĩmũcokeria ũũ: “Ĩĩ nĩ niĩ. Thiĩ wĩre mwathi waku atĩrĩ: ‘Eliyah arĩ gũkũ.’”
No we akĩmwĩra ũũ: “Nĩ mehia marĩkũ njĩkĩte nĩgetha ũneane ndungata yaku guoko-inĩ kwa Ahabu nĩguo anjũrage
O ta ũrĩa Yahweh Kĩhoti waku atũũraga muoyo, gũtirĩ rũrĩrĩ o na kana ũthamaki mwathi wakwa atarĩ aratũmana ũgacario. Thutha wao kuuga atĩrĩ, ‘Ndarĩ gũkũ,’ agatũma ũthamaki ũcio na rũrĩrĩ rũu ciĩhĩte atĩ itikuonete
Na rĩu ũroiga ũũ, ‘Thiĩ wĩre mwathi waku atĩrĩ: “Eliyah arĩ gũkũ.”’
Ndoimagara ngũtige, roho wa Yahweh ũgũkuoya ũgũtware kũndũ itekũmenya nĩ kũ, na ndera Ahabu ũhoro ũcio acoke age gũkuona, hatarĩ nganja no ekũnjũraga. Na ndungata yaku ĩtũire ĩĩtigĩrĩte Yahweh kuuma ũnyinyi-inĩ wayo
Kaĩ mwathi wakwa atarĩ erũo ũrĩa ndekire rĩrĩa Jezebeli ooragaga anabii a Yahweh, ũrĩa ndahithire anabii 100 a Yahweh marĩ ikundi igĩrĩ, o gĩkundi kĩa anabii 50 ngurunga-inĩ ĩmwe na ngĩikara ngĩmaheaga mĩgate na maĩ
No rĩu ũroiga ũũ, ‘Thiĩ wĩre mwathi waku atĩrĩ: “Eliyah arĩ gũkũ.”’ Hatarĩ nganja no ekũnjũraga.”
Ĩndĩ Eliyah akĩmwĩra atĩrĩ: “O ta ũrĩa Yahweh mũnene wa ita ũrĩa ndungatagĩra atũũraga muoyo, ũmũthĩ nĩ ngwĩyonania kũrĩ we.”
Nĩ ũndũ ũcio Obadia agĩthiĩ gũcemania na Ahabu na akĩmwĩra ũhoro ũcio, nake Ahabu agĩthiĩ gũcemania na Eliyah.
Rĩrĩa Ahabu oonire Eliyah, akĩmũũria atĩrĩ: “Nĩwe wee, o wee ũrĩa ũrehete thĩna mũnene thĩinĩ wa Isiraeli?”
Nĩ ũndũ ũcio akĩmwĩra ũũ: “Niĩ ti niĩ ndehete thĩna thĩinĩ wa Isiraeli, ĩndĩ nĩwe na nyũmba ya thoguo, nĩ ũndũ wa gũtiganĩria maathani ma Yahweh na nĩ ũndũ wa kũrũmĩrĩra ihoti cia Baali
Na rĩu njĩtĩra andũ a Isiraeli othe moke Kĩrĩma-inĩ gĩa Karimeli, o hamwe na anabii 450 a Baali na anabii 400 a Ashera, arĩa marĩagĩra metha-inĩ ya Jezebeli.”
Nĩ ũndũ ũcio Ahabu agĩtũma ndũmĩrĩri gatagatĩ-inĩ ga ciana ciothe cia Isiraeli na agĩcokanĩrĩria anabii hamwe Kĩrĩma-inĩ gĩa Karimeli.
Nake Eliyah agĩkuhĩrĩria andũ acio othe akĩmeera atĩrĩ: “Nĩ nginya rĩ mũgũtũũra mũthanganĩirie gatagatĩ ka mawoni merĩ ngũrani? Angĩkorũo Yahweh nĩwe Kĩhoti ũrĩa wa ma, mũrũmĩrĩrei; no angĩkorũo nĩ Baali, mũrũmĩrĩrei!” No andũ matiigana kũmũcokeria ũndũ o na ũmwe
Eliyah agĩcoka akĩra andũ acio ũũ: “Niĩ no niĩ mũnabii ũrĩa ũtigarĩte wa Yahweh, no anabii a Baali nĩ arũme 450
Nĩ matũnengere tũtegwa twĩrĩ, nao mathuure gategwa kamwe na magatinangie icunjĩ macigĩrĩre ngũ igũrũ, no matigakie mwaki. Na niĩ haarĩrie gategwa kau kangĩ na ndĩkaigĩrĩre ngũ igũrũ, no ndigwakia mwaki
Mũcoke mũkaĩre rĩĩtwa rĩa kĩhoti wanyu, na niĩ ngaĩre rĩĩtwa rĩa Yahweh. Kĩhoti ũrĩa ũgũcokia mahoya kũgerera mwaki nĩ ekuonania atĩ nĩwe kĩhoti ũrĩa wa ma.” Nĩ ũndũ ũcio andũ othe makiuga ũũ: “Ũguo woiga nĩ wega.”
Eliyah agĩkĩĩra anabii a Baali atĩrĩ: “Ambĩrĩrai gũthuura gategwa kamwe na mũkahaarĩrie, tondũ nĩ inyuĩ aingĩ. Mũcoke mũkaĩre rĩĩtwa rĩa kĩhoti wanyu, no mũtigakie mwaki.”
Nĩ ũndũ ũcio makĩoya gategwa karĩa maanengerirũo, magĩkahaarĩria, na magĩikara magĩkayagĩra rĩĩtwa rĩa Baali kuuma rũcinĩ nginya ithaa rĩa mĩaraho, makiugaga ũũ: “Wee Baali, tũigue!” No gũtiarĩ na mũgambo maaiguire na gũtiarĩ na wa kũmacokeria. Magĩikara makĩrũgarũgaga magĩthiũrũrũkaga kĩgongona kĩrĩa maakĩte
Kĩndũ ta ithaa-inĩ rĩa mĩaraho Eliyah akĩambĩrĩria kũmanyũrũria akĩmeeraga ũũ: “Anĩrĩrai na mũgambo wanyu wothe! Na githĩ Baali ti kĩhoti! No gũkorũo arĩ na maũndũ areciria kana akorũo hihi athiĩte gwĩteithia. Kana hihi akorũo arĩ toro na nĩ kũrabatarania mũndũ wa kũmũũkĩria!”
Maanagĩrĩra na mũgambo wao wothe magĩĩtemangaga na tũhiũ na matimũ, kũringana na mũtugo wao, nginya makiura thakame ĩkĩiyũra mĩĩrĩ-inĩ yao
O na thutha wa mĩaraho magĩthiĩ o na mbere kũhũhũtĩka nginya ihinda rĩrĩa igongona rĩa mũtu rĩa hwaĩ-inĩ rĩrutagwo, no gũtirĩ mũgambo maaiguire na gũtiarĩ na wa kũmacokeria; gũtiarĩ na wa kũmathikĩrĩria.
Thutha wa ihinda Eliyah akĩra andũ othe atĩrĩ: “Nguhĩrĩriai.” Kwoguo andũ acio othe makĩmũkuhĩrĩria. Agĩcoka agĩthondeka kĩgongona kĩa Yahweh rĩngĩ kĩrĩa kĩamomoretwo
Eliyah agĩcoka akĩoya mahiga 12, kũringana na mũigana wa mĩhĩrĩga ya ariũ a Jakubu, o we ũrĩa kiugo kĩa Yahweh kĩamwĩrire atĩrĩ: “Rĩu ũrĩtagwo Isiraeli.”
Akĩhũthĩra mahiga macio gwaka kĩgongona na rĩĩtwa rĩa Yahweh. Agĩcoka agĩthondeka mũtaro ũthiũrũrũkĩirie kĩgongona kĩu gĩothe, gĩcigo kĩarĩ kĩnene ũndũ kĩngĩahandirũo mbegũ ithimi igĩrĩ cia sea
Thutha ũcio akĩbanga ngũ, agĩtinangia gategwa kau icunjĩ, na agĩkaigĩrĩra ngũ igũrũ. Agĩcoka akiuga atĩrĩ: “Iyũriai ndigithũ inya nene maĩ na mũmaitĩrĩrie igũrũ rĩa igongona rĩa njino na igũrũ rĩa ngũ.”
Agĩcoka akiuga ũũ: “Ĩkai ũguo rĩngĩ.” Magĩgĩka ũguo rĩngĩ. O rĩngĩ akĩmeera atĩrĩ: “Ĩkai ũguo riita rĩa gatatũ.” Magĩgĩka ũguo riita rĩa gatatũ
Namo maĩ macio magĩtherera gũthiũrũrũkĩria kĩgongona kĩu gĩothe, o na ningĩ akĩiyũria maĩ mũtaro-inĩ ũcio.
Ihinda-inĩ rĩrĩa igongona rĩa mũtu rĩa hwaĩ-inĩ rĩrutagwo, mũnabii Eliyah agĩkuhĩrĩria hau mbere na akiuga ũũ: “Wee Yahweh, Kĩhoti wa Iburahimu, Isaaka, na Isiraeli, reke ũmũthĩ kũmenyeke atĩ wee nĩwe Kĩhoti thĩinĩ wa Isiraeli na atĩ niĩ ndĩ ndungata yaku na atĩ njĩkĩte maũndũ maya mothe kũgerera kiugo gĩaku
Njigua, wee Yahweh! Njigua nĩgetha andũ aya mamenye atĩ wee, Yahweh, nĩwe Kĩhoti ũrĩa wa ma na atĩ nĩ ũragarũra ngoro ciao nĩguo igũcokerere.”
Nĩ ũndũ ũcio mwaki wa Yahweh ũgĩikũrũka kuuma igũrũ na ũgĩcina igongona rĩu rĩa njino, ngũ icio, mahiga macio, tĩri ũcio, na ũkĩniaria maĩ macio maarĩ mũtaro-inĩ
Rĩrĩa andũ acio othe moonire ũguo, o rĩo makĩĩgũithia magĩturumithia mothiũ mao thĩ na makiuga ũũ: “Yahweh nĩwe Kĩhoti ũrĩa wa ma! Yahweh nĩwe Kĩhoti ũrĩa wa ma!”
Eliyah agĩcoka akĩmeera atĩrĩ: “Nyitai anabii acio a Baali! Mũtikareke o na ũmwe wao ethare!” O rĩo makĩmanyita, na Eliyah akĩmaikũrũkia karũũĩ-inĩ ga Kishoni na akĩmoragĩra kuo.
Eliyah agĩcoka akĩra Ahabu atĩrĩ: “Ambata ũthiĩ ũkarĩe na ũkanyue, nĩ gũkorũo kũrĩ na mũgambo wa mbura nene.”
Nĩ ũndũ ũcio Ahabu akĩambata nĩguo akarĩe na akanyue, nake Eliyah akĩambata agĩthiĩ gacũmbĩrĩ-inĩ ga kĩrĩma gĩa Karimeli na agĩkumĩrĩra thĩ, aigĩte ũthiũ wake gatagatĩ ka maru make
Agĩcoka akĩra ndungata yake atĩrĩ: “Ndagũthaitha wambate ũthiĩ ũrore mwena wa iria-inĩ.” Nĩ ũndũ ũcio akĩambata na akĩrora, akiuga ũũ: “Gũtirĩ kĩndũ o na kĩ.” Eliyah aamwĩrire ũũ rĩngĩ na rĩngĩ maita mũgwanja, “Coka ho.”
Riita rĩa mũgwanja ndungata ĩyo yake ĩkĩmwĩra ũũ: “Atĩrĩrĩ, harĩ na gatu kanini kaigana rũhĩ rwa mũndũ karambata kuuma iria-inĩ.” Nĩ ũndũ ũcio Eliyah akiuga ũũ: “Thiĩ wĩre Ahabu atĩrĩ, ‘Oherera mbarathi ngaari-inĩ! Ikũrũka nĩgetha ndũkahingĩrĩrio nĩ mbura!’”
Ihinda-inĩ o rĩu, igũrũ rĩkĩiyũra matu mairũ, rũhuho rũkĩhurutana, na gũkiura mbura nene; nake Ahabu agĩthiĩ na mbere na rũgendo akuuĩtwo nĩ ngaari yake ya mbarathi erekeire Jezireeli
Ĩndĩ guoko kwa Yahweh gũgĩũka igũrũ rĩa Eliyah, na akĩĩhotora nguo yake njohero-inĩ na agĩteng’era akĩhĩtũka Ahabu agĩthiĩ nginya Jezireeli.