Atĩĩrĩrĩri Bũrũri 5

Na mũthenya ũcio Debora hamwe na Baraki mũrũ wa Abinoamu makĩina rwĩmbo rũrũ:

“Tondũ wa njuĩrĩ ĩtarĩ njohe thĩinĩ wa Isiraeli, Tondũ wa andũ kwĩrutĩra, Goocai Yahweh!

Thikĩrĩriai, inyuĩ athamaki! Tegai gũtũ, inyuĩ athani! Nĩ ngũinĩra Yahweh. Nĩ ngũina nyĩmbo ngooce Yahweh, Kĩhoti wa Isiraeli.

Wee Yahweh, rĩrĩa woimire Seiru, Rĩrĩa woimire gĩcigo-inĩ kĩa Edomu, Thĩ no kũinaina yainainire, na igũrũ rĩkiura, Namo matu magĩita maĩ.

Irĩma igĩtweka mbere ya ũthiũ wa Yahweh, O na Sinai ĩgĩtweka mbere ya ũthiũ wa Yahweh, Kĩhoti wa Isiraeli.

Matukũ-inĩ ma Shamigari mũrũ wa Anathu, Matukũ-inĩ ma Jaeli, barabara nĩ ciatiganĩirio; Agendi maageragĩra tũcĩra twa thutha.

Aikari a icagi-inĩ thĩinĩ wa Isiraeli magĩthira; Magĩthira o nginya rĩrĩa niĩ, Debora, ndarahũkire, O nginya rĩrĩa ndarahũkire ngĩtuĩka nyina wa Isiraeli.

Magĩthuura ihoti ng’eni; Gũgĩkĩgĩa mbaara ihingo-inĩ. Gũtingĩonekire ngo, o na kana itimũ, Gatagatĩ-inĩ ka andũ 40,000 thĩinĩ wa Isiraeli.

Ngoro yakwa ĩrĩ hamwe na anene a mbũtũ a Isiraeli, Arĩa maathiire meerutĩire marĩ hamwe na andũ. Goocai Yahweh!

Inyuĩ atwarithia a ndigiri cia rangi mũtheũku, Inyuĩ mũikaragĩra mĩgeka ĩrĩa mĩega, Na inyuĩ mũgeraga barabara-inĩ, Mwĩcũraniei!

Mĩgambo ya arĩa matahanagĩra maĩ nĩ yaiguirũo kũrĩa gũtahagwo maĩ; Maaragia ũhoro wĩgiĩ ciĩko cia ũthingu cia Yahweh, Ciĩko cia ũthingu cia aikari ake a icagi-inĩ thĩinĩ wa Isiraeli. Nao andũ a Yahweh magĩikũrũka ihingo-inĩ.

Arahũka, arahũka, wee Debora! Arahũka, arahũka, ũine rwĩmbo! Ũkĩra na igũrũ, wee Baraki! Tongoria mĩgwate yaku, wee mũrũ wa Abinoamu!

Nao arĩa maatigarire magĩikũrũka kũrĩ andũ arĩa marĩ igweta; Andũ a Yahweh magĩikũrũka kũrĩ niĩ mokĩrĩre andũ arĩa marĩ hinya.

Arĩa marĩ mũkuru-inĩ mooimĩte harĩ Efiraimu; Nĩ makũrũmĩrĩire, wee Benjamini, gatagatĩ-inĩ ka ikundi cia andũ aku. Kuuma harĩ Makiru anene a mbũtũ nĩ maikũrũkĩte, Na kuuma harĩ Zebuluni arĩa makuuĩte karamu ka mwaandĩki marũa.

Anene a kuuma Isakaru maarĩ hamwe na Debora, O ta Isakaru, Baraki o nake aarĩ hamwe nake. Agĩtũmwo athiĩ magũrũ mũkuru-inĩ mwaraganu. Gatagatĩ-inĩ ga ikundi cia andũ a Rubeni kwarĩ na ũhoro mũnene wa gwĩthuthuria ngoro.

Nĩ kĩĩ gĩatũmire ũikare thĩ gatagatĩ ka mĩhuko ĩĩrĩ ya matandĩko, Ũkĩmathikagĩrĩria makĩhuuhĩra ndũũru ciao mĩtũrirũ? Nĩ gũkorũo ikundi-inĩ cia andũ a Rubeni kwarĩ na ũhoro mũnene wa gwĩthuthuria ngoro.

Gileadi aatigirũo mũrĩmo wa Jorodani; Nake Dani-rĩ, nĩ kĩĩ gĩatũmire athiĩ o na mbere gũikara meri-inĩ? Asheri aaikarire o hũgũrũrũ-inĩ cia iria hatarĩ ũndũ areka, Agĩgĩtigwo icukĩro-inĩ ciake.

Andũ a Zebuluni nĩo maaingĩririe mĩoyo yao ũgwati-inĩ hakuhĩ makue; O nake Nafitali, agĩka o ũguo tũrĩma-inĩ twa kũndũ kwaraganu.

Athamaki magĩũka na makĩrũa; Athamaki a Kanaani nao makĩrũa Kũu Taanaka, maĩ-inĩ ma Megido. No matiatahire betha o na ĩmwe.

Njata kuuma igũrũ ikĩrũa; Ikĩrũa na Sisera irĩ njĩra-inĩ ciacio.

Rũũĩ rwa Kishoni rũkĩmathereria Rũũĩ rũrĩa rwa tene, rũũĩ rwa Kishoni. Ngĩrangĩrĩria andũ arĩa marĩ hinya.

Namo mahũngũ ma mbarathi magĩkubia O ũrĩa mbarathi ciake cia njamba ciateng’eraga ihenya inene.

Mũraika wa Yahweh akiuga ũũ, ‘Merozu ĩronyitwo nĩ kĩrumi,’ ‘Ĩni, aikari a kuo maronyitwo nĩ kĩrumi, Nĩ gũkorũo matiigana gũka gũteithia Yahweh, Matiigana gũka gũteithia Yahweh hamwe na arĩa marĩ hinya.’

Mũtumia ũrĩa mũrathime gũkĩra arĩa angĩ nĩ Jaeli O we mũtumia wa Heberi Mũkeeni; Nĩwe mũrathime gũkĩra atumia arĩa angĩ maikaraga hema-inĩ.

Sisera aahoire maĩ; nake akĩmũhe iria. Akĩmũhe iria imata na mbakũri ĩrĩ riri mũno.

Aatambũrũkirie guoko gwake akĩoya mũcumarĩ wa hema, Akĩnyita nyundo ya bundi na guoko gwake kwa ũrĩo. Akĩhũũrĩrĩra Sisera na nyundo, akĩmũhehenja mũtwe, Akĩhehenja thikĩrĩrio ciake na agĩcitũrĩkania.

Akĩgwa gatagatĩ ka magũrũ make; akĩgwa agĩkoma atekwĩnyagunyia; Akĩgwa gatagatĩ ka magũrũ make; Harĩa aagũire, noho aaikarire agwĩte arĩ mũtoorie.

Mũtumia akĩrorera ndirica-inĩ, Nyina wa Sisera agĩcũũthĩrĩra mĩanya-inĩ ya ndirica, ‘Kaĩ ngaari yake ya mbarathi ĩikarire ũguo nĩkĩ ĩtokĩte? Mũkubio wa mahũngũ ma mbarathi cia ngaari ciake ũcereirũo ũguo nĩkĩ?’

Mũirĩtu ũrĩa mũũgĩ mũno harĩ airĩtu a gwake arĩa atĩĩku akamũcokeria; O nake agacokera akeĩra ũũ,

‘No nginya akorũo nĩ kũgayana maragayana indo iria matahĩte, Mũirĩtu ũmwe, airĩtu erĩ, harĩ o njamba ya ita, Nguo ya marangi maingĩ ya gũtahwo ĩrĩ ya Sisera, nguo ya gũtahwo ya marangi maingĩ, Nguo ng’emie, nguo ya marangi maingĩ, nguo igĩrĩ ng’emie Irĩ cia ngingo cia atahani.’

Nĩ ũndũ ũcio, thũ ciaku ciothe irothira, wee Yahweh, No reke arĩa makwendete mahaane o ta riũa rĩkĩratha na riri warĩo.” Naguo bũrũri ũcio ũkĩgĩa na ũhurũko mĩaka 40.