Atũmwo 12

Na rĩrĩ, ihinda-inĩ rĩu nĩguo Mũthamaki Herode aanyitire andũ amwe a Ũngano, arĩ na muoroto wa kũmanyarira.

Akĩũragithia Jakubu, mũrũ wa nyina na Johana na rũhiũ rwa njora.

Na rĩrĩa oonire ũhoro ũcio nĩ wakenia Ayahudi-rĩ, akĩnyitithia Kepha o nake. Ũndũ ũcio wekĩkire hĩndĩ ya Gĩathĩ kĩa Mĩgate Ĩtarĩ Mĩĩkĩre Ndawa ya Kũimbia

Aarĩkia kũmũnyitithia, akĩmũikia njera akĩmũneana arangĩrwo nĩ ikundi inya cia thigari, o gĩkundi kĩrĩ gĩa thigari inya. Herode eendaga amũrehe mbere ya mũingĩ thutha wa Gĩathĩ gĩa Bathaka.

Nĩ ũndũ ũcio Kepha akĩhingĩrwo njera, no Ũngano nĩ wahoyaga Yahweh ũtegũtigithĩria nĩ ũndũ wake.

Na ũtukũ ũrĩa Herode aarokaga kũmũtwara agacirithio, Kepha aakomete gatagatĩ ga thigari igĩrĩ, ohetwo na mĩnyororo ĩĩrĩ, nacio thigari igĩrĩ ikarũgama kĩhingo-inĩ irangĩrĩte.

Na rĩrĩ, o rĩmwe mũraika wa Yahweh akĩmuumĩrĩra naguo ũtheri ũkĩara kanyũmba kau aarĩ. Mũraika ũcio akĩringaringa Kepha mwena na akĩmũũkĩria, akĩmwĩra atĩrĩ, “Ũkĩra narua!” Nayo mĩnyororo ĩrĩa oohetwo nayo moko ĩkĩgũa thĩ.

Mũraika ũcio agĩcoka akĩmwĩra atĩrĩ, “Wĩhumbe nguo ciaku na wĩkĩre iratũ.” Nake Kepha agĩĩka o ũguo. Mũraika ũcio akĩmwĩra atĩrĩ, “Wĩhotore nguo yaku na ũnũmĩrĩre.”

Kepha akĩmũrũmĩrĩra, makiuma nja ya njera, no ndaamenyaga atĩ ũndũ ũcio mũraika eekaga warĩ ũndũ wa ma; eeciragia atĩ nĩ kĩoneki oonaga.

Makĩhĩtũka arangĩri a mbere na a kerĩ na magĩkinya kĩhingo-inĩ gĩa kĩgera kĩrĩa gĩa gũtonya itũũra inene. Nakĩo kĩhingo kĩu gĩkĩĩhingũra nĩ ũndũ wao, nao makĩgerera ho. Rĩrĩa maathiire ũraihu wa gacĩra kamwe-rĩ, o rĩmwe mũraika ũcio akĩmũtiga.

Nake Kepha akĩĩigua, na akiuga atĩrĩ, “Rĩu nĩ ndamenya hatarĩ nganja atĩ Yahweh nĩ egũtũmĩte mũraika wake aahonokie kuuma moko-inĩ ma Herode na kuuma kũrĩ maũndũ marĩa mothe andũ a Ayahudi matanyĩte kuona.”

Na rĩrĩa aguũkĩirwo nĩ ũhoro ũcio, agĩthiĩ kwa Mariamu ũrĩa warĩ nyina wa Johana, na nowe wetagwo Mariko, na nĩkuo andũ aingĩ monganĩte makĩhoya Yahweh

Kepha akĩringaringa mũrango wa nja, nake mũirĩtu warutaga wĩra kuo wetagwo Roda agĩũka kũhingũra.

Rĩrĩa aaiguire mũgambo wa Kepha, akĩiyũrwo nĩ gĩkeno kĩnene akĩaga kũhingũra mũrango akĩhũndũka atengʼerete, akĩanĩrĩra, akiuga atĩrĩ, “Kepha arĩ mũrango-inĩ!”

Nao makĩmwĩra atĩrĩ, “Wee nĩ kũgũrũka ũgũrũkĩte.” Rĩrĩa aakĩrĩrĩirie agwatĩirie kuuga atĩ ũguo nĩguo kwarĩ, makiuga atĩrĩ, “No nginya akorwo nĩ mũraika wake.”

Nowe Kepha agĩthiĩ na mbere kũringaringa mũrango, na rĩrĩa maahingũrire makĩona nĩwe, makĩgega.

Kepha akĩmakiria na guoko na akĩmataarĩria ũrĩa Yahweh aamũrutĩte njera. Akĩmera atĩrĩ, “Ĩrai Jakubu na ariũ na aarĩ a Ithe witũ ũhoro ũcio,” agĩcoka agĩthiĩ kũndũ kũngĩ.

Rũcinĩ gwakĩa, nĩ kwagĩire na ngũĩ nene gatagatĩ-inĩ ga thigari nĩ kũrigwo nĩ ũrĩa gwekĩkĩte ũhoro ũkoniĩ Kepha.

Thutha wa Herode gũcaria Kepha na kũmwaga-rĩ, agĩcirithia thigari, na agĩathana atĩ ciũragwo. Herode agĩcoka akiuma Yahuda agĩthiĩ Kaisarea, agĩikara kuo kwa ihinda inini.

Na rĩrĩ, nĩ atũũrĩte ahaaranĩte na andũ a Turo na a Sidoni, no o magĩcokanĩrĩra hamwe magĩetha ũrĩa mangĩaranĩirie nake. Na maarĩkia kũnyitwo mbaru nĩ Bulasito, ũrĩa warĩ ndungata njĩhokeku ya mũthamaki-rĩ, makĩhoya kũgĩe na thayũ, tondũ bũrũri wa mũthamaki ũcio nĩguo wamaheaga irio.

Na mũthenya ũrĩa waraarĩirio wakinya-rĩ, Herode akĩĩhumba nguo ciake cia ũthamaki, na agĩikarĩra gĩtĩ gĩake kĩa ũnene, akĩarĩria andũ acio.

Nao makĩanĩrĩra makiuga atĩrĩ, “Ũcio nĩ mũgambo wa Kĩhoti, ti mũgambo wa mũndũ!”

O rĩmwe mũraika wa Yahweh akĩringa Herode nĩ ũndũ wa kwaga kũgoocithia Yahweh, nake akĩrĩo nĩ igunyũ, agĩkua.

No kiugo kĩa Yahweh gĩgĩkĩrĩrĩria kuongerereka na gũtherema.

Rĩrĩa Bar-Anaba na Saũlũ maarĩkirie ũtungata wao-rĩ, magĩcoka kuuma Yahrushalayim, na magĩcoka na Johana, na nowe wetagwo Mariko.