Atũmwo 14
Na rĩrĩ, Saũlũ na Bar-Anaba marĩ kũu Ikonia, magĩtonya thunagogi ya Ayahudi o ta mũtugo. Marĩ kũu makĩaria na ũhoti mũingĩ mũno o nginya Ayahudi aingĩ na andũ-a-Ndũrĩrĩ magĩĩtĩkia
No Ayahudi arĩa maaregire gwĩtĩkia nĩ mathogothire andũ-a-Ndũrĩrĩ, makĩmathũkia meciria nĩgetha mookĩrĩre ariũ na aarĩ a Ithe witũ.
Nĩ ũndũ ũcio Saũlũ na Bar-Anaba magĩikara kũu ihinda iraya, makĩaria marĩ na ũcamba nĩ ũndũ wa Yahweh, o we wekĩrire ndũmĩrĩri ya wega wake hinya na ũndũ wa kũmahotithia kũringa ciama na morirũ
Andũ a itũũra rĩu inene makĩgayũkana; amwe magĩĩtĩkania na Ayahudi, nao arĩa angĩ magĩĩtĩkania na atũmwo
Nĩ kwarĩ na ndundu yathugundĩtwo nĩ andũ-a-Ndũrĩrĩ na Ayahudi, hamwe na atongoria ao, nĩguo mameke ũũru, na mamahũũre na mahiga nyuguto.
No nao makĩmenya ũhoro ũcio, na makĩũrĩra matũũra manene ma bũrũri wa Likaonia, na nĩmo Lisitera, na Deribe, o na bũrũri ũrĩa wagũthiũrũrũkĩirie,
kũrĩa maathiire na mbere kũhunjia ũhoro mwega.
Nakuo kũu Lisitera nĩ kwarĩ mũndũ warĩ mwonju magũrũ, na aatũũrĩte arĩ mwonju kuuma gũciarwo na ndetwarĩte na magũrũ o narĩ
Nake agĩthikĩrĩria Saũlũ akĩaria. Saũlũ aamũrora, akĩona atĩ aarĩ na wĩtĩkio wa kũhonio,
na mũgambo mũnene, akĩmwĩra atĩrĩ, “Rũgama na magũrũ maku!” Na o hĩndĩ ĩyo, mũndũ ũcio akĩrũga na igũrũ, akĩambĩrĩria gwĩtwara.
Rĩrĩa gĩkundi kĩu kĩa andũ kĩonire ũrĩa Saũlũ eekĩte, gĩkĩanĩrĩra na rũthiomi rwa Likaonia gĩkiuga atĩrĩ, “Ihoti nĩ ciikũrũkĩte kũrĩ ithuĩ itariĩ ta andũ!”
Magĩĩta Bar-Anaba Zeu, nake Saũlũ makĩmwĩta Herime tondũ nĩwe warĩ mwaria ũrĩa mũnene
Mũthĩnjĩri-hoti ya Zeu, ũrĩa hekarũ yake yarĩ o hau nja ya itũũra, akĩrehe ndegwa na mahũa maatumĩtwo ta thũmbĩ hau kĩhingo-inĩ gĩa itũũra inene, tondũ we na gĩkundi kĩu kĩa andũ nĩ mendaga kũmarutĩra magongona.
No rĩrĩa atũmwo acio Bar-Anaba na Saũlũ maaiguire ũguo, magĩtembũranga nguo ciao, makĩhanyũka, magĩtonya kũrĩ kĩrĩndĩ, makĩanagĩrĩra atĩrĩ,
“Andũ aya, mũreka ũguo nĩkĩ? Ithuĩ tũrĩ o andũ ta inyuĩ. Tũmũreheire ũhoro mwega, wa kũmwĩra mũgarũrũke mũtigane na maũndũ marĩa matarĩ kĩene, mũcokerere Kĩhoti ũrĩa ũtũũraga muoyo, o we ũrĩa wombire igũrũ na thĩ na iria na indo ciothe iria irĩ kuo.
Tene, nĩ arekereirie ndũrĩrĩ ciothe ithiiage na mĩthiĩre yacio nyene,
no ndaigana gwĩtiga atarĩ na ũira wa kuonania atĩ arĩ kuo: nĩ amuonetie ũtugi na ũndũ wa kũmuurĩria mbura yumĩte igũrũ na kũmũhe magetha hĩndĩ ya kĩmera; nĩ amũheaga irio nyingĩ na akaiyũria ngoro cianyu na gĩkeno.”
No o na maarĩtie ciugo icio, nĩ maarĩ na wĩra mũritũ wa kũgiria gĩkundi kĩu kĩa andũ kĩmarutĩre igongona.
Na rĩrĩ, hĩndĩ ĩyo Ayahudi angĩ magĩũka moimĩte Antiokia na Ikonia, nao makĩguucĩrĩria gĩkundi kĩu kĩa andũ, gĩgĩcoka mwena wao. Gĩkundi kĩu gĩkĩhũũra Saũlũ na mahiga nyuguto, na gĩkĩmũkururia, gĩkĩmũruta nja ya itũũra, gĩĩciirĩtie nĩ mũkuũ
No arutwo maarĩkia kũmũrigicĩria, agĩũkĩra agĩcoka itũũra-inĩ. Mũthenya ũcio ũngĩ warũmĩrĩire, we na Bar-Anaba makiuma kũu magĩthiĩ Deribe.
Saũlũ na Bar-Anaba makĩhunjia ũhoro mwega itũũra-inĩ rĩu na magĩtũma andũ aingĩ matuĩke arutwo. Magĩcoka makĩhũndũka magĩthiĩ Lisitera, na Ikonia, na Antiokia,
magĩĩkagĩra arutwo hinya na kũmomĩrĩria nĩgetha matũũre marũmĩtie wĩtĩkio. Makameraga atĩrĩ, “No nginya ithuĩ tũgerere mathĩna-inĩ maingĩ nĩguo tũtonye ũthamaki-inĩ wa Yahweh.”
Saũlũ na Bar-Anaba makĩmaamũrĩra athuri a Ũngano na makĩhoya Yahweh mehingĩte kũrĩa irio, makĩmaneana kũrĩ Yahweh, o we ũrĩa meehokete
Thutha wa gũtuĩkanĩria Pisidia, magĩkinya Pamufilia,
na maarĩkia kũhunjia kiugo kũu Periga, magĩikũrũka magĩthiĩ Atalia.
Moima Atalia makĩhaica marikabu, magĩcoka Antiokia, o kũrĩa maahoeirwo wega wa Yahweh mbere nĩ ũndũ wa wĩra ũrĩa maarĩkĩtie kũruta.
Maakinya kũu magĩcokanĩrĩria andũ a Ũngano hamwe, makĩmera ũrĩa wothe Yahweh ekĩte agereire harĩo na ũrĩa aahingũrĩire andũ-a-Ndũrĩrĩ mũrango wa gwĩtĩkia
Nao magĩikara na arutwo kũu ihinda iraya.