Atũmwo 16

Na rĩrĩ, Saũlũ agĩkinya Deribe agĩcoka akiuma kuo agĩthiĩ Lisitera, kũrĩa mũrutwo wetagwo Timotheo aatũũraga, ũrĩa nyina aarĩ Mũyahudi mũtumia wetĩkĩtie Yahweh, no ithe aarĩ Mũyunani.

Ariũ na aarĩ a Ithe witũ a kũu Lisitera na Ikonia nĩ maragia wega igũrũ rĩake.

Saũlũ nĩ endaga mathiĩ nake rũgendo, no nĩ tondũ wa Ayahudi arĩa maatũũraga kũu, akĩmũruithia nĩgũkorwo nĩ mooĩ atĩ ithe aarĩ Mũyunani.

Na rĩrĩa maathiiaga kuuma itũũra nginya rĩrĩa rĩngĩ, nĩ meraga andũ matua marĩa maatuĩtwo nĩ atũmwo na athuri kũu Yahrushalayim nĩguo andũ mamaathĩkagĩre.

Nĩ ũndũ ũcio maũngano makĩgĩa na hinya ũhoro-inĩ wa gwĩtĩkia na makongererekaga mũigana o mũthenya.

Saũlũ na andũ arĩa maarĩ nao magĩtuĩkanĩria bũrũri wothe wa Firigia na Galatia, nĩgũkorwo nĩ magirĩtio nĩ Roho Mwamũre kũhunjia kiugo kũu bũrũri wa Asia

Rĩrĩa maakinyire mũhaka-inĩ wa Misia, makĩgeria gũtonya Bithinia, no Roho ndaigana kũmetĩkĩria gũtonya.

Nĩ ũndũ ũcio makĩhĩtũka Misia, magĩikũrũka magĩkinya Teroa.

Ũtukũ ũcio-rĩ, Saũlũ akĩona kĩoneki kĩa mũndũ wa Makedonia arũgamĩte akĩmũthaitha, akĩmwĩra atĩrĩ, “Ũka gũkũ Makedonia ũtũteithie.”

Saũlũ aarĩkia kuona kĩoneki kĩu, tũkĩĩhaarĩria o hĩndĩ ĩyo nĩgetha tũthiĩ Makedonia, tũgĩtua atĩ Yahweh nĩ atwĩtĩte tũkamahunjĩrie Ũhoro-ũrĩa-Mwega.

Twaarĩkia kuuma Teroa, tũgĩthiĩ na marikabu twerekeire Samotherake, na mũthenya ũyũ ũngĩ tũgĩthiĩ Neapoli.

Kuuma kũu tũgĩthiĩ Filipi, kũrĩa gwathagwo nĩ andũ a Roma, na nĩrĩo rĩarĩ itũũra rĩrĩa inene rĩa bũrũri ũcio wa Makedonia. Na tũgĩikara kũu mĩthenya ĩtaarĩ mĩingĩ.

Mũthenya wa Thabatũ wakinya tũkiuma nja ya kĩhingo gĩa itũũra, tũgĩthiĩ rũũĩ-inĩ, tũtaanyĩte kuona handũ ha kũhoerwo Yahweh. Tũgĩikara thĩ na tũkĩambĩrĩria kwarĩria andũ-a-nja arĩa monganĩte hau.

Na rĩrĩ, ũmwe wa andũ-a-nja acio maathikĩrĩirie eetagwo Lidia, ũrĩa warĩ mwonjoria wa nguo cia rangi wa ndathi, na oimĩte itũũra rĩa Thuatira, na aarĩ mũhoi Yahweh. Nake Yahweh akĩhingũra ngoro yake, akĩamũkĩra ndũmĩrĩri ya Saũlũ

Rĩrĩa we na andũ a nyũmba yake maabatithirio-rĩ, nĩ atũnyitire ũgeni gwake mũciĩ agĩtwĩra atĩrĩ, “Angĩkorwo nĩ muonete atĩ nĩ njĩtĩkĩtie Yahweh-rĩ, ũkai mũgaikare nyũmba gwakwa.” Nake agĩtũringĩrĩria tũthiĩ.

Hĩndĩ ĩmwe tũgĩthiĩ harĩa haahoyagĩrwo Yahweh, nĩ twatũngirwo nĩ mũirĩtu warĩ ngombo na nĩ arĩ na roho wa kũragũra. Nake nĩ atũmaga ene we meonere mbeca nyingĩ mũno nĩ ũndũ wa ũragũri wake

Mũirĩtu ũcio akĩrũmĩrĩra Saũlũ hamwe na ithuĩ, akĩanagĩrĩra atĩrĩ, “Andũ aya nĩ ndungata cia Kĩhoti-Ũrĩa-ũrĩ-Igũrũ-Mũno, na maramũhe ũhoro wa njĩra ya ũrĩa mũngĩhonokio.”

Mũirĩtu ũcio agĩthiĩ na mbere na gwĩka ũguo mĩthenya mĩingĩ. Marigĩrĩrio-inĩ Saũlũ agĩthirĩka mũno nginya akĩhũgũkĩra roho ũcio akĩwĩĩra atĩrĩ, “Ndagwatha thĩinĩ wa rĩĩtwa rĩa Yahshua Messiya uume thĩinĩ wake!” O hĩndĩ ĩyo roho ũcio ũkĩmuuma.

Rĩrĩa ene mũirĩtu ũcio ngombo maamenyire atĩ mwĩhoko wao wa kuona mbeca nĩ wathira, makĩnyita Saũlũ na Sila makĩmaguucũrũria makĩmatonyia ndũnyũ mbere ya aathani.

Makĩmarehe mbere ya acirithania, makiuga atĩrĩ, “Andũ aya nĩ Ayahudi, na nĩ mararehe ngũĩ itũũra-inĩ riitũ

nĩ ũndũ wa kũrutana mĩtugo ĩrĩa ithuĩ andũ a Roma tũtagĩrĩirwo nĩ gwĩtĩkĩra o na kana kũmĩĩka.”

Nakĩo kĩrĩndĩ gĩgĩũkĩrĩra Saũlũ na Sila kĩmeke ũũru no acirithania makĩruta watho atĩ marutwo nguo na mahũũrwo iboko

Thutha wa kũhũũrwo mũno magĩikio njera, na mũrangĩri wa njera agĩathwo amarangĩre wega.

Aarĩkia kwamũkĩra watho ũcio, akĩmaikia kanyũmba ka na thĩinĩ na akĩohithania magũrũ mao na ndungu.

Na rĩrĩ, ta ũtukũ gatagatĩ, Saũlũ na Sila nĩ kũhoya maahoyaga makĩinagĩra Yahweh nyĩmbo, nao andũ arĩa angĩ mohetwo makamathikĩrĩria.

Na o rĩmwe gũkĩgĩa gĩthingithia kĩnene o nginya mĩthingi ya njera ĩgĩthingitha. Nayo mĩrango yothe ya njera ikĩhingũka o rĩmwe, na mĩnyororo ya mũndũ o mũndũ ĩkĩregera

Mũrangĩri wa njera akĩarahũka, na rĩrĩa aarorire akĩona mĩrango ya njera ĩrĩ mĩhingũku, akĩruta rũhiũ rwake rwa njora akĩenda kwĩyũraga tondũ eeciririe atĩ andũ arĩa moohetwo nĩ moorĩte

No Saũlũ akĩanĩrĩra, akĩmwĩra atĩrĩ, “Ndũkeegere ngero! Ithuothe tũrĩ ho!”

Nake mũrangĩri ũcio wa njera agĩtia matawa, agĩcoka akĩhanyũka thĩinĩ akĩinainaga, akĩĩgũithia mbere ya Saũlũ na Sila.

Agĩcoka akĩmoimia na nja, akĩũria atĩrĩ, “Athuri aya, njagĩrĩirwo nĩ gwĩka atĩa nĩguo honoke?”

Nao makĩmũcokeria atĩrĩ, “Ĩtĩkia Mwathi Yahshua, na nĩ ũkũhonoka, wee, o hamwe na andũ a nyũmba yaku.”

Magĩcoka makĩmwarĩria ũhoro wa kiugo kĩa Yahweh, hamwe na andũ arĩa angĩ othe maarĩ gwake nyũmba.

O ihinda rĩu rĩa ũtukũ, mũrangĩri ũcio wa njera akĩmooya, akĩmathambia ironda, na o hĩndĩ ĩyo we na andũ othe a nyũmba yake makĩbatithio.

Mũrangĩri ũcio wa njera akĩmatwara gwake nyũmba, na akĩmahe irio. Akĩiyũrwo nĩ gĩkeno tondũ nĩ eetĩkirie Yahweh, we o hamwe na andũ a nyũmba yake yothe.

Na rĩrĩ, gwakĩa acirithania magĩtũma thigari ikeere mũrangĩri ũcio wa njera atĩrĩ, “Rekereria andũ acio mathiĩ.”

Nake mũrangĩri ũcio wa njera akĩĩra Saũlũ atĩrĩ, “Acirithania maathana, moiga atĩ wee na Sila mũrekererio. Rĩu no mũthiĩ. Thiĩi na thayũ.”

No Saũlũ akĩĩra thigari icio atĩrĩ, “Maratũhũũrire mbere ya mũingĩ tũtacirithĩtio, o na gũtuĩka ithuĩ tũrĩ raiya a Roma, na maratũikia njera. Rĩu marakĩenda gũtũruta na hitho? Aca! Reke moke o ene matũrute nja, matuumagarie.”

Nacio thigari igĩcokeria acirithania ũhoro ũcio, na rĩrĩa maaiguire atĩ Saũlũ na Sila maarĩ raiya a Roma, makĩmaka.

Nao magĩũka kũmahoreria, na makĩmoimagaria kuuma njera, makĩmathaitha moime itũũra rĩu mathiĩ.

Saũlũ na Sila maarĩkia kuuma njera, magĩthiĩ mũciĩ kwa Lidia, kũrĩa maakorire ariũ na aarĩ a Ithe witũ, na makĩmomĩrĩria. Magĩcoka magĩĩthiĩra.