Atũmwo 17
Na rĩrĩ, maarĩkia gũtuĩkanĩria Amufipoli na Apolonia, magĩkinya Thesalonike, kũrĩa kwarĩ na thunagogi ya Ayahudi.
Saũlũ agĩtonya thunagogi, o ta ũrĩa aamenyerete, na mĩthenya ĩtatũ ya Thabatũ akĩaranĩria nao kuuma Maandĩko-inĩ,
akĩmataarĩria na akĩmaiguithia atĩ kwarĩ o nginya Messiya anyarirĩke na ariũke kuuma kũrĩ arĩa akuũ. Akĩmera atĩrĩ, “Yahshua ũyũ ndĩramũhe ũhoro wake-rĩ, nĩwe Messiya.”
Ayahudi amwe magĩtĩkĩra ũhoro ũcio na magĩtuĩka a thiritũ ya Saũlũ na Sila, o ũndũ ũmwe na gĩkundi kĩnene kĩa Ayunani etigĩri-Yahweh, o na andũ-a-nja aingĩ arĩa maarĩ igweta.
No Ayahudi makĩigua ũiru; nĩ ũndũ ũcio magĩcaria andũ arĩa maarĩ mĩtugo mĩũru kuuma ndũnyũ, makĩmacokanĩrĩria gĩkundi, na makĩambĩrĩria kũruta ngũĩ kũu itũũra-inĩ. Nao makĩhanyũka kwa Jasoni gwetha Saũlũ na Sila nĩgetha mamoimie nja kũrĩ kĩrĩndĩ.
No rĩrĩa maamagire, magĩkururia Jasoni na ariũ a Ithe witũ amwe, makĩmarehe kũrĩ anene a itũũra, makĩanagĩrĩra atĩrĩ: “Andũ aya nĩo marehete thĩna thĩ yothe, na rĩu nĩ mokĩte gũkũ,
na Jasoni nĩ amanyitĩte ũgeni thĩinĩ wa nyũmba yake. Othe nĩ marakararia watho wa Kaisari, makoiga atĩ nĩ kũrĩ na mũthamaki ũngĩ wĩtagwo Yahshua.”
Rĩrĩa maaiguire ũguo, kĩrĩndĩ kĩu na anene a itũũra magĩtangĩka mũno.
Hĩndĩ ĩyo magĩĩtia Jasoni na andũ arĩa angĩ maarĩ nao irĩhi rĩa kũmarũgamĩrĩra, magĩcoka makĩmarekereria mathiĩ.
Na kwarĩkia gũtuka-rĩ, ariũ na aarĩ a Ithe witũ magĩtũma Saũlũ na Sila mathiĩ Berea. Nao maakinya kuo, magĩtonya thunagogi ya Ayahudi.
Na rĩrĩ, Ayahudi a Berea maarĩ a ngoro njega gũkĩra Ayahudi a Thesalonike, nĩgũkorwo nĩ mamũkĩrire ndũmĩrĩri marĩ na wendo mũingĩ, na magathuthuuragia Maandĩko o mũthenya, nĩgetha mone kana ũrĩa Saũlũ aameeraga warĩ ũhoro wa ma.
Ayahudi aingĩ nĩ metĩkirie, o ũndũ ũmwe na andũ-a-nja aingĩ a Ayunani arĩa maarĩ igweta, o na andũ arũme aingĩ Ayunani.
Rĩrĩa Ayahudi a Thesalonike maamenyire atĩ Saũlũ nĩ ahunjagia kiugo kĩa Yahweh kũu Berea-rĩ, magĩthiĩ kũu o nakuo, magĩthogotha kĩrĩndĩ na magĩgĩthũkia ngoro.
Hĩndĩ o ĩyo ariũ na aarĩ a Ithe witũ magĩtũma Saũlũ athiĩ ndwere-inĩ cia iria, no Sila na Timotheo magĩtigwo kũu Berea.
Nao andũ arĩa moimagaririe Saũlũ, makĩmũkinyia Athene, na magĩcoka marĩ na ndũmĩrĩri ya Sila na Timotheo atĩ mathiĩ kũrĩ Saũlũ narua o ta ũrĩa kũngĩhoteka.
Saũlũ o ametereire kũu Athene-rĩ, nĩ atangĩkire ngoro mũno nĩ kuona ũrĩa itũũra rĩu rĩaiyũrĩte mĩhianano
Nĩ ũndũ ũcio nĩ aranagĩria na Ayahudi o na Ayunani arĩa meeyamũrĩire Yahweh kũu thunagogi-inĩ, o na ningĩ akaaragia ndũnyũ-inĩ o mũthenya na andũ arĩa maakoragwo ho.
Nakĩo gĩkundi kĩa Aepikurio na Asitoiko, arutani a ũũgĩ, makĩambĩrĩria gũkararania nake. Amwe ao makĩũria atĩrĩ, “Mũndũ ũyũ wa mũhuhu arageria kuuga atĩa?” Nao andũ arĩa angĩ makiuga atĩrĩ, “Nĩ ta mũndũ ũrahunjia ũhoro wa hoti ngʼeni.” Moigaga ũguo tondũ Saũlũ aahunjagia Ũhoro Mwega wa Yahshua o na wa kũriũka gwake.
Hĩndĩ ĩyo makĩmuoya na makĩmũtwara mbere ya kĩama-inĩ kĩa Areopago, makĩmwĩra atĩrĩ, “No twende kũmenya atĩrĩ, ũrutani ũyũ mwerũ ũrarutana nĩ ũrĩkũ?
Tũraigua ũgĩtwarĩria maũndũ mageni, na nĩ tũkwenda kũmenya ũrĩa moigĩte.”
(Andũ othe a Athene na andũ a kũngĩ arĩa maatũũraga kuo matirĩ ũndũ ũngĩ meekaga tiga kwaria na gũthikĩrĩria ũhoro wa maũndũ marĩa mageni).
Hĩndĩ ĩyo Saũlũ akĩrũgama Kĩama-inĩ kĩu gĩetagwo Areopago akĩmera atĩrĩ: “Andũ aya a Athene, nĩ nguona atĩ maũndũ-inĩ mothe mũrĩ andũ a ndini mũno
Nĩgũkorwo o na nĩ nyonete kĩgongona kĩandĩkĩtwo maandĩko maya: KŨRĨ HOTI ĨRĨA ĨTOĨO, rĩrĩa ngoretwo ngĩceera na ngarora wega indo cianyu iria nyamũre cia kũhoywo. Na rĩrĩ, kĩrĩa mũhoyaga mũtooĩ nĩkĩo ngũmũhe ũhoro wakĩo.
“Kĩhoti ũrĩa wombire thĩ na indo ciothe iria irĩ kuo nĩwe Mwathi wa igũrũ na thĩ, na ndatũũraga hekarũ ciakĩtwo na moko.
Na ndatungatagwo na moko ma andũ, ta abataire kĩndũ, tondũ we mwene nĩwe ũheaga andũ muoyo na mĩhũmũ o na indo iria ingĩ ciothe.
Kuuma harĩ mũndũ ũmwe, nĩ athondekire ndũrĩrĩ ciothe cia andũ nĩguo matũũre kũndũ guothe thĩ; na agĩtua mahinda mao o na kũndũ kũrĩa megũtũũra
Yahweh eekire ũguo nĩgetha andũ mamũmaathe na hihi mamũhambatĩrie mamuone, o na gũtuĩka ndarĩ haraya na o ũmwe witũ.
‘Nĩgũkorwo nĩ thĩinĩ wake tũtũũraga na tũgetwara, na tũgakorwo tũrĩ muoyo.’ O ta ũrĩa aandĩki amwe a nyĩmbo cianyu moigĩte atĩrĩ, ‘Ithuĩ tũrĩ a rũciaro rwake.’
“Nĩ ũndũ ũcio, kuona atĩ tũrĩ a rũciaro rwa Yahweh, tũtiagĩrĩirwo nĩ gwĩciria atĩ Yahweh ahaana ta mũhianano wa thahabu kana wa betha, o na kana wa ihiga, ũrĩa ũthondeketwo na mũthugundĩre na ũũgĩ wa mũndũ.
Mahinda ma tene Yahweh ndaigana kũrũmbũiya ũhoro ũcio wa kwaga ũmenyo, no rĩu nĩ athĩte andũ othe a kũndũ guothe merire.
Nĩgũkorwo nĩ atuĩte mũthenya ũrĩa agaatuĩra thĩ cira na ũthingu na ũndũ wa mũndũ ũrĩa athuurĩte. Nĩ amenyithanĩtie ũndũ ũyũ kũrĩ andũ othe na ũndũ wa kũriũkia Yahshua kuuma kũrĩ arĩa akuũ.”
Hĩndĩ ĩrĩa maiguire ũhoro wa kũriũka kwa arĩa akuũ, amwe ao magĩtheka, no angĩ makiuga atĩrĩ, “Nĩ tũkwenda gũkũigua ũkĩaria ũhoro ũcio hĩndĩ ĩngĩ.”
Maarĩkia kuuga ũguo, Saũlũ akĩehera Kĩama-inĩ kĩu.
Andũ mataarĩ aingĩ magĩtuĩka arũmĩrĩri a Saũlũ na magĩĩtĩkia. Ũmwe wao aarĩ Dionisio, mũndũ warĩ wa thiritũ ya Areopago, o na mũtumia wetagwo Damari, na angĩ maigana ũna.