Atũmwo 18
Thutha ũcio, Saũlũ akiuma Athene agĩthiĩ Korinitho.
Aakinya kũu agĩkora Mũyahudi wetagwo Akula, mũndũ waciarĩirwo Ponto, na aakoretwo oka kuuma Italia marĩ na mũtumia wake Pirisila, tondũ Kilaudio nĩ athanĩte Ayahudi othe moime Roma. Nake Saũlũ agĩthiĩ kũmona,
na tondũ Saũlũ aarĩ mũtumi wa hema o tao-rĩ, agĩikarania na akĩrutithania wĩra nao.
O mũthenya wa Thabatũ nĩ aheanaga ũhoro thunagogi-inĩ, akĩgeria kũiguithia Ayahudi na Ayunani.
Rĩrĩa Sila na Timotheo mookire kuuma Makedonia, Saũlũ akĩĩrutĩra gũkorwo akĩhunjia mahinda mothe, na akoimbũragĩra Ayahudi atĩ Yahshua nĩwe Messiya.
No rĩrĩa Ayahudi maakararirie Saũlũ na makĩmũruma, akĩribariba nguo ciake nĩ ũndũ wa kũngʼũrĩka na akĩmera atĩrĩ, “Thakame yanyu ĩromũcokerera! Niĩ ndirĩ ũndũ ingĩũrio nĩ ũndũ wanyu. Kuuma rĩu ngũcoka gũthiĩ kũrĩ andũ-a-Ndũrĩrĩ.”
Hĩndĩ ĩyo Saũlũ akiuma kũu thunagogi-inĩ, agĩthiĩ kwa mũndũ wetagwo Titio Jusito, warĩ mũhoi Yahweh, nayo nyũmba yake yariganĩtie na thunagogi.
Nake Kirisipo, ũrĩa warĩ mũtongoria wa thunagogi, agĩĩtĩkia Yahshua hamwe na nyũmba yake yothe; na andũ aingĩ a Korinitho arĩa maamũiguire akĩaria magĩĩtĩkia na makĩbatithio.
Ũtukũ ũmwe Yahweh akĩĩra Saũlũ na kĩoneki atĩrĩ, “Ndũkae gwĩtigĩra; thiĩ na mbere na kũheana ũhoro, na ndũgakire.
Nĩgũkorwo ndĩ hamwe nawe, na gũtirĩ mũndũ ũgũgũtharĩkĩra agwĩke ũũru, tondũ ndĩ na andũ aingĩ gũkũ itũũra-inĩ rĩrĩ.”
Nĩ ũndũ ũcio Saũlũ agĩikara kũu mwaka ũmwe na nuthu, akĩmarutaga kiugo kĩa Yahweh.
Rĩrĩa Galio aarĩ barũthi wa Akaia, Ayahudi makĩnyitana magĩtharĩkĩra Saũlũ na makĩmũtwara igooti-inĩ.
Makiuga atĩrĩ, “Mũndũ ũyũ araringĩrĩria andũ kũhoya Kĩhoti na njĩra ĩrĩa ĩreganĩte na watho.”
Na rĩrĩa Saũlũ endaga kwaria, Galio akĩĩra Ayahudi atĩrĩ, “Korwo inyuĩ Ayahudi mũrateta nĩ ũndũ wa ũndũ mũũru kana ngero njũru-rĩ, nĩ hangĩrĩ na gĩtũmi gĩa kũmũthikĩrĩria inyuĩ.
No kuona atĩ nĩ ũhoro wa ciũria ikoniĩ Ciugo na Marĩĩtwa na Watho wanyu inyuĩ ene-rĩ, menyai ũrĩa mũgwĩka. Niĩ ndigũtuĩka mũtui cira wa maũndũ ta macio.”
Nĩ ũndũ ũcio akiuga marutũrũrwo kuuma igooti-inĩ.
Hĩndĩ ĩyo Ayahudi acio othe makĩgarũrũkĩra Sosithene mũtongoria wa thunagogi, na makĩmũhũũrĩra hau mbere ya igooti. No Galio ndaigana kũrũmbũyania na ũhoro ũcio o na atĩa.
Saũlũ nĩ aikarire kũu Korinitho kwa ihinda. Agĩcoka agĩtiga ariũ na aarĩ a Ithe witũ kuo, No nakĩhaica marikabu agĩthiĩ Suriata, marĩ hamwe na Pirisila na Akula. Atanahaica marikabu, aambire akĩenjwo njuĩrĩ yake arĩ kũu Kenikirea, tondũ wa mwĩhĩtwa eehĩtĩte.
Nao maakinya Efeso, Saũlũ agĩtiga Pirisila na Akula kuo. We mwene agĩtonya thunagogi na akĩaranĩria na Ayahudi
Nao makĩmũũria aikaranganie nao kuo, nowe akĩrega.
Na arĩkia kũmaugĩra ũhoro, akĩmera atĩrĩ, “no mũhaka ngerie kũna ũrĩa kũngĩhoteka hurũke gĩathĩ gĩkĩ kĩroka thĩinĩ wa Yahrushalayim: No nĩ ndĩrĩcoka kũrĩ inyũĩ rĩngĩ, Yahweh enda.” Nake akĩhaica marikabu akiuma Efeso.
Rĩrĩa aakinyire Kaisarea, akĩambata agĩthiĩ kũgeithia Ũngano, agĩcoka agĩikũrũka agĩthiĩ nginya Antiokia.
Na thutha wa Saũlũ gũikaranga kũu Antiokia, akiuma kuo, na agĩthiĩ kũndũ na kũndũ bũrũri wothe wa Galatia na Firigia, akĩũmagĩrĩria arutwo othe.
O ihinda-inĩ rĩu, Mũyahudi wetagwo Apolo, waciarĩirwo Alekisanderia, agĩũka Efeso. Aarĩ mũndũ mũthomu, na aarĩ na ũũgĩ mũingĩ mũno wa Maandĩko.
Nĩ arutĩtwo na njĩra ĩrĩa ya Yahweh, na akaaragia na kĩyo kĩnene, na akarutanaga ũhoro wa Yahshua atekũhĩtia, o na gũtuĩka ũbatithio ũrĩa ooĩ warĩ o wa Johana
Nake akĩambĩrĩria kwaria na ũcamba kũu thunagogi-inĩ. Rĩrĩa Pirisila na Akula maamũiguire akĩaria, makĩmũnyita ũgeni kwao mũciĩ na makĩmũtaarĩria ũhoro wa njĩra ya Yahweh wega makĩria.
Na rĩrĩa Apolo eendaga gũthiĩ Akaia, ariũ na aarĩ a Ithe witũ makĩmũũmĩrĩria na makĩandĩkĩra arutwo akuo marũa makĩmera mamwamũkĩre. Na aakinya kuo agĩtuĩka ũteithio mũnene kũrĩ andũ arĩa meetĩkĩtie nĩ ũndũ wa wega wa Yahweh.
Nĩgũkorwo aarĩ na ũhoti mũingĩ, nĩ ahootire Ayahudi biũ mbere ya andũ othe, akĩonanagia kuuma kũrĩ Maandĩko atĩ Yahshua nĩwe Messiya.