Atũmwo 19

Na rĩrĩ, hĩndĩ ĩyo Apolo arĩ kũu Korinitho, Saũlũ akĩgerera njĩra ĩrĩa yatuĩkanĩirie mwena wa rũgongo agĩthiĩ nginya Efeso. Aakinya kũu agĩkora arutwo amwe kuo.

Akĩmoria atĩrĩ, “Nĩ mwamũkĩrire Roho Mwamũre rĩrĩa mwetĩkirie?” Nao makĩmũcokeria atĩrĩ, “Aca, ithuĩ o na tũtirĩ twaigua atĩ nĩ kũrĩ Roho Mwamũre.”

Nĩ ũndũ ũcio Saũlũ akĩmoria atĩrĩ, “Mwakĩbatithirio ũbatithio ũrĩkũ?” Nao makĩmũcokeria atĩrĩ, “Twabatithirio ũbatithio wa Johana.”

Saũlũ akĩmera atĩrĩ, “Ũbatithio wa Johana warĩ ũbatithio wa kwĩrira kwa mehia. Eeraga andũ metĩkie ũrĩa ũgũũka thutha wake, nake nĩwe Yahshua.”

Rĩrĩa maaiguire ũguo, makĩbatithio thĩinĩ wa rĩĩtwa rĩa Mwathi Yahshua.

Hĩndĩ ĩrĩa Saũlũ aamaigĩrĩire moko, Roho Mwamũre akĩmaikũrũkĩra, nao makĩaria na thiomi ingĩ na makĩratha mohoro.

Nao othe maarĩ ta andũ ikũmi na erĩ.

Saũlũ agĩtonya thunagogi, na ihinda rĩa mĩeri ĩtatũ akĩaria na ũcamba kuo, akĩgeragia kũringĩrĩria andũ ũhoro wa ũthamaki wa Yahweh.

No amwe ao makĩũmia ngoro; makĩaga gwĩtĩkia na magĩcambia Njĩra ĩyo mbere ya kĩrĩndĩ. Nĩ ũndũ ũcio Saũlũ akĩmeherera. Akĩoya arutwo agĩthiĩ nao nyũmba ĩrĩa yathomithagĩrio andũ ya Turano, akaaranagĩria na andũ o mũthenya arĩ kuo.

Ũndũ ũyũ nĩ wathiire na mbere ihinda ta rĩa mĩaka ĩĩrĩ, o nginya Ayahudi na Ayunani othe arĩa maatũũraga bũrũri wa Asia makĩigua kiugo kĩa Yahweh.

Yahweh nĩ aringire ciama cia mwanya agereire harĩ Saũlũ,

o nginya itambaya na nguo iria ciahutagia mwĩrĩ wake igatwarĩrwo andũ arĩa maarĩ arũaru, nao makahona mĩrimũ yao na maroho mathũku makamatiga.

Na rĩrĩ, Ayahudi amwe arĩa maathiiaga makĩingataga maroho mathũku makĩgeria kũhũthĩra rĩĩtwa rĩa Mwathi Yahshua harĩ andũ arĩa maarĩ na ndaimono. Moigaga atĩrĩ, “Thĩinĩ wa rĩĩtwa rĩa Yahshua, ũrĩa ũhunjagio nĩ Saũlũ, ndagwatha uume.”

Ariũ mũgwanja a Mũyahudi wetagwo Sikeva, warĩ mũthĩnjĩri-Yahweh mũnene, nĩ mekaga ũguo

Mũthenya ũmwe, roho mũthũku ũkĩmacokeria ũkĩmera atĩrĩ, “Yahshua nĩ ndĩmũũĩ na nĩ njũĩ ũhoro wa Saũlũ, no inyuĩ mũrĩ a?”

Hĩndĩ ĩyo mũndũ ũcio warĩ na roho mũthũku akĩmarũgĩrĩra akĩmatoria othe. Akĩmahũũra mũno nginya makiuma nyũmba ĩyo makĩũra marĩ njaga makiuraga thakame.

Rĩrĩa Ayahudi na Ayunani arĩa maatũũraga Efeso maamenyire ũhoro ũcio, othe makĩiyũrwo nĩ guoya, narĩo rĩĩtwa rĩa Mwathi Yahshua rĩgĩtũũgĩrio.

Andũ aingĩ a arĩa meetĩkirie makĩyumĩria na makiumbũra waganu wao matekũhitha.

Andũ aingĩ arĩa maaragũraga, magĩcokanĩrĩria mabuku mao na makĩmacinĩra mbere ya andũ othe. Rĩrĩa maatarire thogora wa mabuku macio, magĩkinyia durakima ngiri mĩrongo ĩtano.

Kiugo kĩa Yahweh gĩkĩhunja mũno na njĩra ĩyo na gĩkĩgĩa na hinya.

Thutha wa maũndũ macio mothe gwĩkĩka, Saũlũ agĩtua itua rĩa gũthiĩ Yahrushalayim, atuĩkanĩirie Makedonia na Akaia. Akiuga atĩrĩ, “Ndaarĩkia gũkinya kũu, no nginya ngaacoka thiĩ Roma.”

Agĩtũma andũ erĩ a arĩa maamũteithagĩrĩria, na nĩo Timotheo na Erasito, mathiĩ Makedonia, nake agĩikaranga kũu bũrũri wa Asia gwa kahinda kanini.

Ihinda-inĩ rĩu nĩ kwagĩire na thogothogo nene ĩkoniĩ ũhoro wa Njĩra ĩyo

Mũturi wa indo cia betha wetagwo Demeterio, ũrĩa wathondekaga tũmĩhianano twa betha twa Aritemi, nĩ atũmaga andũ arĩa maaturaga indo icio magĩe na wonjoria mũnene

Nake agĩcokanĩrĩria andũ acio maaturaga indo icio, hamwe na aruti a wĩra arĩa maarutaga wĩra ũhaanaine na wao, akĩmera atĩrĩ, “Andũ aya, inyuĩ nĩ mũũĩ nĩ tuonaga uumithio mũnene kuuma kũrĩ wonjoria ũyũ.

Na nĩ mũrona na mũkaigua ũrĩa mũndũ ũyũ ũretwo Saũlũ aiguithĩtie na akahĩtithia andũ aingĩ gũkũ Efeso, na makĩria bũrũri wothe wa Asia akiugaga atĩ ihoti iria ithondeketwo nĩ mũndũ ti ihoti o na hanini

Ũgwati ũrĩa ũrĩ ho nĩ atĩ to wonjoria witũ wiki ũkũmenererio, no o na hekarũ ya kĩhoti mũndũ-wa-nja ĩrĩa nene ĩĩtagwo Aritemi nĩ ĩkwagithio kĩene, na hoti ĩyo ya mũndũ-wa-nja yo nyene, ĩrĩa ĩhoyagwo bũrũri-inĩ wothe wa Asia, na thĩ yothe, nĩ ĩkũimwo ũkaru wayo.”

Rĩrĩa maaiguire ũguo, makĩngʼũrĩka mũno na makĩanĩrĩra, makiugaga atĩrĩ: “Aritemi wa Aefeso nĩ mũnene!”

Na thutha wa kahinda kanini itũũra rĩu rĩkĩiyũra inegene. Andũ acio othe makĩnyita Gayo na Arisitariko arĩa moimĩte Makedonia na Saũlũ, nao makĩhanyũka marĩ ngoro ĩmwe magĩtonya nyũmba ĩrĩa yagomanagwo nĩ ũndũ wa kuona mĩago

Saũlũ nĩ endaga kwĩyumĩria mbere ya kĩrĩndĩ kĩu, no arutwo makĩmũgiria.

O na anene amwe a bũrũri wa Asia arĩa maarĩ arata a Saũlũ makĩmũtũmanĩra, makĩmũthaitha ndakagerie gũtonya nyũmba ĩyo yagomanagwo nĩ ũndũ wa kuona mĩago.

Kĩũngano kĩu gĩkĩaga ũiguano: Amwe maanagĩrĩra makoiga ũũ, na arĩa angĩ makoiga ũũ. Andũ arĩa aingĩ o na matiamenyaga gĩtũmi gĩa gũkorwo hau.

Ayahudi makiumĩria Alekisanda mbere ya kĩrĩndĩ, na andũ amwe a kĩrĩndĩ kĩu makĩanĩrĩra makĩmwĩra ũrĩa egwĩka. Nake akĩmakiria na moko nĩgetha eyarĩrĩrie mbere yao

No rĩrĩa maamenyire atĩ aarĩ Mũyahudi, othe makĩanĩrĩra na mũgambo ũmwe ihinda ta rĩa mathaa merĩ makiugaga atĩrĩ, “Aritemi wa Aefeso nĩ mũnene!”

Karani wa kĩama gĩa itũũra rĩu agĩkiria kĩrĩndĩ kĩu, agĩcoka akĩmera atĩrĩ: “Andũ aya a Efeso, githĩ thĩ yothe ndĩũĩ atĩ itũũra rĩa Efeso nĩrĩo rĩene hekarũ ĩrĩa ĩtũũragwo nĩ Aritemi ũrĩa mũnene, na mũhianano wake ũrĩa waharũrũkire kuuma igũrũ

Nĩ ũndũ ũcio, kuona atĩ maũndũ macio matingĩkaanĩka-rĩ, mwagĩrĩirwo nĩ gũkira, na mũtikae gwĩka ũndũ wa ihenya.

Inyuĩ mwarehe andũ aya haha, o na gũtuĩka ti kũiya maiyĩte indo cia hekarũ, kana makaruma hoti iitũ ya mũndũ-wa-nja.

Hakĩrĩ ũguo-rĩ, angĩkorwo Demeterio na andũ acio angĩ marutaga wĩra nake marĩ na mateta igũrũ rĩa mũndũ o wothe, macirĩro nĩ mahingũre na acirithania marĩ ho. No mamathitange.

Angĩkorwo harĩ na ũndũ ũngĩ mũngĩenda kuuga makĩria ma ũguo, ũcio no ũcirĩirwo kĩama-inĩ kĩa watho.

Ũrĩa kũrĩ rĩu nĩ atĩ, tũrĩ ũgwati-inĩ wa gũthitangĩrwo ngũĩ ĩno ya ũmũthĩ. Na kũrĩ ũguo tũtingĩhota kũheana ũhoro wa thogothogo ĩno, tondũ hatirĩ na gĩtũmi kĩayo.”

Aarĩkia kuuga ũguo, akĩĩra kĩũngano kĩu gĩthiĩ, akĩnina mũcemanio.