Atũmwo 20
Na rĩrĩ, ngũĩ ĩyo yarĩkia gũthira, Saũlũ agĩtũmanĩra arutwo, na aarĩkia kũmomĩrĩria, akĩmoigĩra ũhoro agĩthiĩ Makedonia.
Agĩtuĩkanĩria mĩena ya kuo, akĩaragia ciugo nyingĩ cia kũũmĩrĩria andũ, na marigĩrĩrio agĩkinya bũrũri wa Ũyunani,
kũrĩa aaikarire mĩeri ĩtatũ. Hĩndĩ ĩrĩa Saũlũ eeharagĩria kũhaica marikabu athiĩ Suriata, agĩtua itua gũcokera Makedonia, tondũ Ayahudi nĩ macirĩire kũmwĩka ũũru.
Saũlũ aathiire marĩ hamwe na Sopatiro mũrũ wa Puro, mũndũ wa kuuma Berea, na Arisitariko, na Sekundo, andũ a kuuma Thesalonike, na Gayo wa kuuma Deribe, o hamwe na Timotheo, ningĩ na Tikiko, na Tirofimo, andũ a kuuma bũrũri wa Asia
Andũ acio magĩthiĩ mbere magĩtweterera kũu Teroa.
No ithuĩ tũkĩhaica marikabu, tũkiuma Filipi thutha wa Gĩathĩ kĩa Mĩgate ĩtarĩ Mĩĩkĩre Ndawa ya Kũimbia, na thutha wa mĩthenya ĩtano, tũgĩkora andũ arĩa angĩ kũu Teroa, nakuo tũgĩikara mĩthenya mũgwanja.
Mũthenya wa mbere wa kiumia nĩ twagomanire hamwe nĩguo twenyũre mũgate. Saũlũ akĩarĩria andũ, na tondũ nĩ atanyĩte gũthiĩ mũthenya ũcio warũmĩrĩire-rĩ, agĩthiĩ na mbere kwaria nginya ũtukũ gatagatĩ.
Nĩ kwarĩ na matawa maingĩ maakanaga kũu nyũmba ya igũrũ kũrĩa twagomanĩte.
Nake mwanake wetagwo Eutiko aikarĩte ndirica-inĩ, na o ũrĩa Saũlũ aathiaga na mbere na kwaria-rĩ, noguo mwanake ũcio akĩragĩrĩria gũtoorio nĩ toro. Rĩrĩa aakomire, akĩgũa thĩ kuuma ngoroba ya gatatũ nao mamuoya magĩkora nĩ mũkuũ.
Saũlũ agĩikũrũka, agĩkomera mwanake ũcio akĩmũkumbatĩria akĩmera atĩrĩ, “Tigai kũmaka, arĩ muoyo!”
Agĩcoka akĩambata nyũmba ya igũrũ, akĩenyũra mũgate na akĩrĩa. Na thutha wa kũmaarĩria nginya gũgĩkĩa-rĩ, akiuma kũu, agĩthiĩ.
Nao andũ makĩinũkia mwanake ũcio arĩ muoyo, na mahoreire ngoro mũno.
No ithuĩ tũgĩthiĩ mbere tũgĩtonya marikabu tũgĩthiĩ nginya Aso, kũrĩa twathiire tũkĩoyaga Saũlũ. Aathondekete mũbango ũyũ mbere tondũ we athiĩte kũu magũrũ
Hĩndĩ ĩrĩa aatũtũngire kũu Aso, tũkĩmũkuua na marikabu, tũgĩthiĩ nginya Mitilene.
Mũthenya ũcio ũngĩ warũmĩrĩire tũkĩhaica marikabu, tũgĩthiĩ tũgĩkinya harĩa haaringaine na Kio, na thutha wa mũthenya ũcio tũgĩkinya Samo, naguo mũthenya ũcio ũngĩ warũmĩrĩire, tũgĩkinya Mileto.
Saũlũ nĩ atuĩte itua rĩa gũthiĩ ahĩtũkĩte Efeso na marikabu nĩguo ndagate mahinda kũu bũrũri wa Asia, nĩ ũndũ nĩ ehĩkaga nĩguo kwahoteka akinye Yahrushalayim, mũthenya wa Gĩathĩ gĩa Ciũmia.
Saũlũ arĩ kũu Mileto, agĩtũmana Efeso, agĩĩta athuri a Ũngano moke harĩ we.
Nao maakinya, akĩmera atĩrĩ, “Inyuĩ nĩ mũũĩ ũrĩa ndaatũũraga ihinda rĩrĩa rĩothe ndaikarire na inyuĩ, kuuma o mũthenya wa mbere ũrĩa ndokire bũrũri wa Asia.
Nĩ ndatungatĩire Yahweh ndĩnyihĩtie mũno na ndĩ na maithori, o na gũtuĩka nĩ ndageririo mũno nĩ ũndũ Ayahudi nĩ maathugundaga kũnjĩka ũũru.
Inyuĩ nĩ mũũĩ atĩ ndirĩ ndatithia kũhunjia ũndũ o wothe ũngĩmũguna no ndĩmũrutagĩra mbere ya andũ othe na ngathiiaga o nyũmba o nyũmba.
Na ngoimbũrĩra Ayahudi o hamwe na Ayunani atĩ no nginya magarũrũkĩre Yahweh na ũndũ wa kwĩrira na magĩe na wĩtĩkio thĩinĩ wa Mwathi witũ Yahshua.
“Na rĩrĩ, nĩ ũndũ wa kũringĩrĩrio nĩ Roho Mwamũre, ndĩrathiĩ Yahrushalayim itekũmenya maũndũ marĩa makaangora ndĩ kũu
Ũndũ ũrĩa njũĩ tu nĩ atĩ, Roho Mwamũre nĩ andaaraga atĩ matũũra-inĩ mothe, njera na mathĩna nĩcio injetereire.
No rĩrĩ, ndirona gũtũũra muoyo kũrĩ na bata harĩ niĩ, korwo no ndĩkie ihenya na ndĩkie wĩra ũrĩa Mwathi Yahshua aaheete, na nĩguo wĩra wa kuumbũra Ũhoro-ũrĩa-Mwega wa wega wa Yahweh.
“Na rĩu nĩ njũũĩ gũtirĩ o na ũmwe thĩinĩ wanyu wa andũ arĩa ndanathiĩ ngĩhunjagĩria ũhoro wa ũthamaki ũgacoka kũnyona rĩngĩ.
Nĩ ũndũ ũcio, ngũmwĩra ũmũthĩ atĩ gũtirĩ thakame ya mũndũ o na ũmwe ngoorio.
Nĩ ũndũ niĩ ndirĩ ndatithia kũmũhunjĩria ũtaaro wa Yahweh ũrĩ wothe.
Mwĩmenyererei inyuĩ ene, na mũmenyerere rũũru ruothe rũrĩa Roho Mwamũre amũtuĩte arori aruo. Tuĩkai arĩithi a Ũngano wa Yahweh, ũrĩa aagũrire na thakame yake mwene
Nĩ njũĩ atĩ ndaarĩkia gũthiĩ, njũũi ndĩani nĩ igoka gatagatĩ-inĩ kanyu na itigacaĩra rũũru rũrũ.
O na ningĩ kuuma harĩ inyuĩ nĩ gũkoimĩra andũ, na mogomie ũhoro-wa-ma nĩgetha magucĩrĩrie arutwo mamarũmĩrĩre.
Nĩ ũndũ ũcio ikaragai mwĩhũgĩte! Ririkanai atĩ ihinda rĩa mĩaka ĩtatũ ndirĩ ndatigithĩria gũtaara o ũmwe wanyu ũtukũ na mũthenya ngĩitaga maithori.
“Na rĩu ngũmũneana kũrĩ Yahweh o na kũrĩ ũhoro wa wega wake, ũrĩa ũngĩhota kũmwaka wega mũrũme na mũgĩe na igai hamwe na andũ arĩa othe matheretio makamũrĩrwo Yahweh.
Niĩ ndirĩ ndacumĩkĩra betha kana thahabu, o na kana nguo ya mũndũ o wothe.
Inyuĩ ene nĩ mũũĩ atĩ ndaarutaga wĩra na moko makwa nĩ ũndũ wa mabata makwa niĩ mwene, na mabata ma andũ arĩa ndakoragwo nao.
Maũndũ-inĩ marĩa mothe ndeekire, nĩ ndamuonirie atĩ no nginya tũteithagie andũ arĩa matarĩ hinya, na ũndũ wa kũruta wĩra mũritũ ta ũcio, tũkĩririkanaga ciugo iria ciaririo nĩ Mwathi Yahshua we mwene rĩrĩa oigire atĩrĩ, ‘Kũheana nĩ kũrĩ irathimo nyingĩ gũkĩra kũheo.’ ”
Aarĩkia kuuga ũguo, agĩturia ndu hamwe nao othe makĩhoya
Nao othe makĩrĩra makĩmũhĩmbagĩria na makĩmũmumunya.
Ũndũ ũrĩa wamekĩrire kĩeha mũno makĩria, nĩ ũrĩa aamerire atĩ matigacoka kũmuona ũthiũ rĩngĩ. Magĩcoka makĩmumagaria nginya marikabu-inĩ.