Atũmwo 21
Na rĩrĩ, thutha wa gwĩtigithũkania nao, tũkĩhaica marikabu tũgĩthiĩ tũrũngĩrĩirie tũgĩkinya Kosi. Mũthenya ũcio ũngĩ warũmĩrĩire tũgĩkinya Rodo, na twoima kũu tũgĩthiĩ nginya Patara.
Tũgĩkora marikabu yaringaga ĩthiĩ Foinike, na ithuĩ tũkĩmĩhaica tũgĩthiĩ
Na rĩrĩa tuonire Kuporo, tũkĩhĩtũkĩra mwena wa gũthini wakuo, tũgĩthiĩ nginya Suriata. Tũgĩkinya Turo, kũrĩa marikabu iitũ yarutagĩrwo mĩrigo ĩrĩa yarĩ nayo.
Tũgĩkora arutwo kuo, na tũgĩikara nao mĩthenya mũgwanja. Nao arutwo acio na ũndũ wa kũmenyithio nĩ Roho Mwamũre magĩthaitha Saũlũ ndagathiĩ Yahrushalayim.
No ihinda riitũ rĩathira, tũkiuma kũu, tũgĩthiĩ na mbere na rũgendo rwitũ. Arutwo othe, hamwe na atumia ao na ciana ciao, magĩtuumagaria, magĩtũkinyia nja ya itũũra, na tũrĩ hau hũgũrũrũ-inĩ cia iria, tũgĩturia ndu, tũkĩhoya Yahweh.
Twarĩkia kuganĩra ũhoro, tũkĩhaica marikabu, nao makĩinũka.
Twoima Turo, tũgĩthiĩ na mbere na rũgendo rwitũ, tũgĩkinya Putolemai, tũkĩgeithia ariũ na aarĩ a Ithe witũ kuo na tũgĩikarania nao mũthenya ũmwe.
Mũthenya ũyũ ũngĩ tũkiuma kuo, tũgĩthiĩ, tũgĩkinya Kaisarea, na tũgĩikara mũciĩ kwa Filipu ũrĩa warĩ mũhunjia ũmwe wa arĩa Mũgwanja.
Nake nĩ aarĩ na airĩtu ake ana mataarĩ ahiku, nao nĩ maarathaga mohoro.
Na thutha wa gũkorwo kuo matukũ maingĩ-rĩ, gũgĩũka mũnabii wetagwo Agabo oimĩte Yahuda
Rĩrĩa aakinyire harĩ ithuĩ, akĩoya mũcibi wa Saũlũ, akĩwĩĩoha moko na magũrũ, akiuga atĩrĩ, “Roho Mwamũre aroiga atĩrĩ, ‘Ũũ nĩguo Ayahudi a Yahrushalayim marĩoha mwene mũcibi ũyũ, na macoke mamũneane kũrĩ andũ-a-Ndũrĩrĩ.’ ”
Hĩndĩ ĩrĩa twaiguire ũguo, ithuĩ na andũ arĩa angĩ maarĩ ho tũgĩthaitha Saũlũ ndakae kwambata Yahrushalayim.
Hĩndĩ ĩyo Saũlũ agĩcokia atĩrĩ, “Nĩ kĩ kĩratũma mũrĩre, na mũkanjũraga ngoro? To kuohwo gwiki ndĩĩhaarĩirie, no nĩ ndĩĩhaarĩirie o na gũkua ndĩ kũu Yahrushalayim nĩ ũndũ wa rĩĩtwa rĩa Mwathi Yahshua.”
Hĩndĩ ĩrĩa aaregire kũigua ũrĩa twamwĩraga-rĩ, tũgĩtigana nake tũkiuga atĩrĩ, “Wendi wa Yahweh ũrohinga.”
Thutha wa ũguo, tũkĩĩhaarĩria tũkĩambata Yahrushalayim.
Arutwo amwe a kuuma Kaisarea magĩthiĩ hamwe na ithuĩ, na magĩtũtwara kwa mũndũ wetagwo Mũnasoni, tũgaikare kuo. Aarĩ mũndũ woimĩte Kuporo, na aarĩ ũmwe wa arutwo arĩa a mbere.
Hĩndĩ ĩrĩa twakinyire Yahrushalayim, ariũ na aarĩ a Ithe witũ magĩtwamũkĩra na gĩkeno
Mũthenya ũyũ ũngĩ Saũlũ, na andũ arĩa twarĩ nao tũgĩthiĩ kuona Jakubu, nao athuri othe maarĩ ho.
Nake Saũlũ akĩmageithia na akĩmera ũrĩa wothe Yahweh eekĩire andũ-a-Ndũrĩrĩ agereire ũtungata-inĩ wake.
Rĩrĩa maaiguire ũguo, makĩgooca Yahweh. Magĩcoka makĩĩra Saũlũ atĩrĩ, “Mũrũ wa ithe witũ, nĩ wonete ũrĩa Ayahudi ngiri nyingĩ metĩkĩtie, na othe marĩ na kĩyo gĩa kũhingia watho.
Nao nĩ mamenyithĩtio atĩ nĩ ũrutaga Ayahudi othe arĩa matũũranagia na andũ-a-Ndũrĩrĩ atĩ magarũrũke matigane na Watho wa Musa, ũkĩmeraga matikaruithie ciana ciao na matigaikare kũringana na mĩtugo iitũ.
Tũgwĩka atĩa? Hatirĩ nganja nĩ mekũigua atĩ nĩ ũkĩte.
Nĩ ũndũ ũcio ĩka ũrĩa tũgũkwĩra. Tũrĩ na andũ ana mehĩtĩte mwĩhĩtwa
Thiĩ na andũ aya, ũgwatanĩre nao igongona-inĩ rĩao rĩa gwĩtheria, na ũmarĩhĩre mahũthĩro mao, nĩgetha menjwo mĩtwe. Hĩndĩ ĩyo andũ othe nĩ mekũmenya atĩ ũhoro ũrĩa maiguĩte ũgũkoniĩ ti wa ma, no atĩ wee mwene nĩ wathĩkĩire Watho.
Ha ũhoro wa andũ-a-Ndũrĩrĩ arĩa metĩkĩtie-rĩ, nĩ twamandĩkĩire, tũkĩmamenyithia itua riitũ, atĩ o metheme kũrĩa irio iria irutĩirwo mĩhianano, na thakame, na nyama cia nyamũ cia gũitwo, o na ũmaraya.”
Mũthenya ũyũ ũngĩ Saũlũ agĩthiĩ na andũ acio, na agĩĩtheria hamwe nao. Agĩcoka agĩthiĩ hekarũ-inĩ akamenyithanie rĩrĩa mĩthenya ya gwĩtheria ĩkaarĩka, na o ũmwe wao arutĩrwo igongona.
Rĩrĩa matukũ macio mũgwanja maakuhĩrĩirie gũthira-rĩ, Ayahudi amwe moimĩte bũrũri wa Asia makĩona Saũlũ hekarũ-inĩ. Magĩthogotha kĩrĩndĩ gĩothe na makĩmũnyita,
makĩanagĩrĩra atĩrĩ, “Andũ a Isiraeli, tũteithiei! Mũndũ ũyũ nĩwe ũrutaga andũ kũndũ guothe ũhoro wa gũũkĩrĩra andũ aitũ, na Watho witũ, na handũ haha. Na hamwe na ũguo-rĩ, nĩ arehete Ayunani hekarũ-inĩ, agathahia handũ haha hamũre.”
(Nĩ monete Tirofimo ũrĩa Mũefeso marĩ na Saũlũ kũu itũũra-inĩ, no magĩĩciria atĩ Saũlũ nĩ amũtonyetie hekarũ-inĩ.)
Narĩo itũũra rĩothe rĩkĩambũrũrũka nao andũ magĩũka mahanyũkĩte moimĩte mĩena yothe. Makĩnyita Saũlũ, makĩmũguucũrũria makĩmũruta hekarũ, na o hĩndĩ ĩyo ihingo ikĩhingwo
Na rĩrĩ, rĩrĩa maageragia kũmũũraga ũhoro ũgĩkinya harĩ mũnene wa mbũtũ ya thigari cia Roma atĩ itũũra rĩothe rĩa Yahrushalayim rĩarĩ na ngũĩ.
Nake o rĩmwe akĩoya anene na thigari magĩikũrũka harĩ kĩrĩndĩ matengʼerete. Rĩrĩa andũ acio maarutaga ngũĩ moonire mũnene ũcio na thigari ciake magĩtiga kũhũũra Saũlũ.
Mũnene ũcio wa thigari agĩũka akĩmũnyita na agĩathana ohwo na mĩnyororo ĩĩrĩ. Agĩcoka akĩũria aarĩ ũ na nĩ atĩa ekĩte.
Andũ amwe thĩinĩ wa kĩrĩndĩ maanagĩrĩra makoiga ũũ na arĩa angĩ makoiga ũũ; na tondũ mũnene ũcio wa thigari ndangĩamenyire ma ya ũhoro nĩ ũndũ wa mbugĩrĩrio, agĩathana Saũlũ ahingĩrwo nyũmba ya thigari.
Hĩndĩ ĩrĩa Saũlũ aakinyire ngathĩ-inĩ kĩrĩndĩ kĩu gĩgĩthũka mũno o nginya Saũlũ agĩkuuo nĩ thigari.
Kĩrĩndĩ kĩrĩa kĩamuumĩte thutha kĩanagĩrĩra gĩkoiga atĩrĩ, “Mweheriei!”
Rĩrĩa thigari ciarĩ o hakuhĩ gũtonyia Saũlũ nyũmba ya thigari-rĩ, akĩũria mũnene wacio atĩrĩ, “Nĩ ũkũnjĩtĩkĩria ngwĩre ũndũ?” Nake mũnene ũcio akĩmũũria atĩrĩ, “Wee anga nĩ waragia Kĩyunani?
Githĩ we tiwe Mũmisiri ũrĩa wambĩrĩirie ngũĩ hĩndĩ ĩmwe, na ũgĩtongoria itoi ngiri inya, mũkiumagara nacio mũgĩthiĩ werũ-inĩ?”
Saũlũ akĩmũcokeria atĩrĩ, “Niĩ ndĩ Mũyahudi wa kuuma Tariso, bũrũri wa Kilikia, na itũũra rĩrĩa ndaciarĩirwo rĩrĩ igweta. Ndagũthaitha, reke njarĩrie andũ aya.”
Saũlũ aarĩkia kũheo rũtha nĩ mũnene ũcio wa thigari, akĩrũgama ngathĩ-inĩ agĩkiria kĩrĩndĩ kĩu na moko. Rĩrĩa kĩrĩndĩ gĩakirire, agĩkĩarĩria na rũthiomi rwa Kĩhibirania. Agĩkĩĩra atĩrĩ: