Atũmwo 22
“Ariũ a Baba, o na inyuĩ maithe makwa, thikĩrĩriai ngĩĩyarĩrĩria.”
Rĩrĩa maaiguire akĩmaarĩria na rũthiomi rwa Kĩhibirania-rĩ, magĩkira ki. Hĩndĩ ĩyo Saũlũ akiuga atĩrĩ,
“Niĩ ndĩ Mũyahudi, wa gũciarĩrwo Tariso itũũra rĩa bũrũri wa Kilikia, no ndaarereirwo itũũra-inĩ rĩrĩ. Nĩ ndathomithirio wega nĩ Gamalieli ũhoro wa Watho wa maithe maitũ, na ndaarĩ na kĩyo kĩa maũndũ ma Kĩhoti o ta ũrĩa inyuĩ inyuothe mũtariĩ ũmũthĩ.
Nĩ ndanyariraga arũmĩrĩri a Njĩra ĩno o nginya magakua na nganyita arũme na andũ-a-nja ngamaikia njera,
o ta ũrĩa mũthĩnjĩri-Yahweh ũrĩa mũnene na Kĩama gĩothe gĩa athuri o nao mangĩheana ũira ũcio. O na nĩ maheire marũa ndwarĩre andũ ao kũu Dameski, na niĩ ngĩthiĩ kuo nganyite andũ acio ndĩmarehe Yahrushalayim nĩguo maherithio.
“Ta thaa thita ndĩ hakuhĩ gũkinya Dameski-rĩ, o rĩmwe gũkĩgĩa ũtheri mũnene woimire igũrũ, naguo ũkĩnjarĩra mĩena yothe
Ngĩgũa thĩ, na ngĩigua mũgambo mũnene ũkĩnjarĩria, ũkĩnjĩĩra atĩrĩ, ‘Saũlũ! Saũlũ! Ũũnyariraga nĩkĩ?’
“Na niĩ ngĩũria atĩrĩ, ‘Wee nĩ we ũ, Mwathi?’ “Nake akĩnjokeria atĩrĩ, ‘Nĩ niĩ Yahshua wa Nazarethi, ũrĩa ũranyarira.’
Nao andũ arĩa twarĩ nao nĩ moonire ũtheri ũcio, no matiataũkĩirwo nĩ mũgambo wa ũcio wanjaragĩria.
“Na niĩ ngĩũria atĩrĩ, ‘Mwathi ngwĩka atĩa?’ “Nake Yahshua akĩnjĩĩra atĩrĩ, ‘Ũkĩra ũtonye Dameski. Kũu nĩkuo ũrĩĩrĩrwo maũndũ marĩa mothe wathĩrĩirwo gwĩka.’
Na rĩrĩ, andũ arĩa twarĩ nao makĩĩnyita guoko makĩndwara Dameski, tondũ ũkengu wa ũtheri ũcio nĩ wanduĩte mũtumumu.
“Mũndũ wetagwo Anania nĩ ookire kũnyona, na aarĩ mũndũ weamũrĩire Kĩhoti na ũndũ wa kũrũmia Watho, na nĩ aheetwo gĩtĩo nĩ Ayahudi othe arĩa maatũũraga kũu.
Agĩũka na akĩrũgama hakuhĩ na niĩ akĩnjĩĩra atĩrĩ, ‘Mũrũ wa ithe witũ Saũlũ, coka kuona!’ Na hĩndĩ o ro ĩyo ngĩhota kũmuona.
“Agĩcoka akĩnjĩĩra atĩrĩ, ‘Kĩhoti wa maithe maitũ nĩ agũthuurĩte nĩguo ũmenye wendi wake na wone Ũrĩa Mũthingu, o na ũigue ciugo kuuma kanua gake
Nĩ ũgũtuĩka mũira wake kũrĩ andũ othe wa kũmoimbũrĩra ũrĩa wonete na ũrĩa ũiguĩte.
Rĩu nĩ kĩ wetereire? Ũkĩra, ũbatithio na ũthambio mehia maku, ũgĩkayagĩra rĩĩtwa rĩake.’
“Hĩndĩ ĩrĩa ndacokire Yahrushalayim, ndĩ hekarũ-inĩ ngĩhoya nĩ ndagĩire na iringi,
ngĩkĩona akĩaria, nake akĩnjĩĩra atĩrĩ, ‘Ũkĩra narua uume Yahrushalayim, tondũ matigwĩtĩkĩra kumbũrĩrwo ũhoro wakwa nĩwe.’
“Na niĩ ngĩcokia atĩrĩ, ‘Yahshua, andũ aya nĩ moĩ atĩ ndoimaga thunagogi ĩmwe ngathiĩ ĩrĩa ĩngĩ nĩguo nyitithie na hũũre andũ arĩa magwĩtĩkĩtie.
Na rĩrĩa Stefano mũira waku aaitirũo thakame, ndaarũngiĩ ho ngĩĩtĩkĩra ũndũ ũcio wĩkwo, na ngaikaria nguo cia andũ arĩa maamũũragire.’
“Nake Yahshua akĩnjĩĩra atĩrĩ, ‘Thiĩ, tondũ nĩ ngũgũtũma kũndũ kũraya kwa andũ-a-Ndũrĩrĩ.’ ”
Kĩrĩndĩ kĩu gĩgĩthikĩrĩria Saũlũ o nginya rĩrĩa oigire ũguo. Hĩndĩ ĩyo gĩkĩaria na mũgambo mũnene kĩanĩrĩire, atĩrĩ, “Mweheriei thĩ! Ndagĩrĩirwo nĩ gũtũũra muoyo!”
Na rĩrĩa kĩanagĩrĩra gĩgĩteaga nguo ciakĩo na gĩkĩũmbũraga rũkũngũ,
mũnene ũcio wa mbũtũ agĩathana Saũlũ aingĩrio nyũmba ya thigari. Ningĩ agĩathana atĩ Saũlũ ahũũrwo iboko na orio ciũria nĩguo kũmenyeke kĩrĩa gĩatũmaga andũ mamugĩrĩrie ũguo.
Na rĩrĩa maamũkomagia mamũhũũre-rĩ, Saũlũ akĩũria mũnene ũcio wa thigari igana rĩmwe warũngiĩ hau atĩrĩ, “Watho nĩ wĩtĩkĩrĩtie mũhũũre raiya wa Roma na kĩboko atanyitĩkanĩte na ihĩtia?”
Rĩrĩa mũnene ũcio wa thigari igana rĩmwe aaiguire ũguo, agĩthiĩ kũrĩ mũnene wa mbũtũ, akĩmũhe ũhoro ũcio. Nake akĩmũũria atĩrĩ, “Rĩu ũgwĩka atĩa? Mũndũ ũyũ nĩ raiya wa Roma.”
Mũnene ũcio wa mbũtũ agĩthiĩ kũrĩ Saũlũ, akĩmũũria atĩrĩ, “Ta njĩĩra atĩrĩ, wee ũrĩ raiya wa Roma?” Nake akĩmũcokeria atĩrĩ, “Ĩĩ, ndĩ raiya wa Roma.”
Nake mũnene ũcio wa mbũtũ akĩmwĩra atĩrĩ, “Ndarĩhire thogora mũnene nĩgetha nduĩke raiya wa Roma.” Nake Saũlũ akĩmũcokeria atĩrĩ, “No niĩ ndaaciarirwo ndĩ raiya wa Roma.”
Nao andũ arĩa meendaga kũmũũria ciũria magĩtigana nake o rĩmwe. Mũnene ũcio wa mbũtũ we mwene akĩmaka aamenya atĩ nĩ ohete Saũlũ na mĩnyororo, na aarĩ raiya wa Roma.
Mũthenya ũcio ũngĩ warũmĩrĩire, nĩgũkorwo mũnene ũcio wa mbũtũ nĩ eendaga kũmenya wega kĩrĩa Ayahudi maathitangagĩra Saũlũ, akĩmuohora na agĩathana athĩnjĩri-Yahweh arĩa anene na athuri othe a Kĩama magomane. Agĩcoka akĩrehe Saũlũ, na akĩmũrũgamia mbere yao.