Atũmwo 24
Na rĩrĩ, thutha wa mĩthenya ĩtano, Anania, mũthĩnjĩri-Yahweh ũrĩa mũnene, agĩikũrũka agĩthiĩ Kaisarea marĩ na athuri amwe na wakiri wetagwo Teritulo, na makĩrehe thitango ciao cia gũũkĩrĩra Saũlũ kũrĩ barũthi
Rĩrĩa Saũlũ eetirwo thĩinĩ, Teritulo akĩambĩrĩria kũmũthitanga mbere ya Felike, akiuga atĩrĩ: “Nĩ tũkeneire ihinda iraya rĩa thayũ tũrĩ rungu rwaku, na ũũgĩ waku wa kuona na kabere nĩ ũgarũrĩte maũndũ marĩa mooru magatuĩka mega bũrũri-inĩ ũyũ.
Kũndũ guothe na maũndũ-inĩ mothe, wee mũgathe Felike, nĩ twamũkĩrĩte ũndũ ũyũ tũrĩ na ngatho nene
No nĩgetha ndigakũnogie makĩria, nĩ ngũkũũria na gĩtĩo ũtũthikĩrĩrie hanini.
“Nĩ tuonete mũndũ ũyũ arĩ mũndũ wa kũrehe thĩna, na nĩ arehete ngũĩ gatagatĩ-inĩ ka Ayahudi kũndũ guothe thĩinĩ wa thĩ. We nĩ mũtongoria wa gĩkundi kĩrĩa gĩĩtagwo Anazari,
na ningĩ nĩ ageragia gũthahia hekarũ; nĩ ũndũ ũcio tũkĩmũnyita. (Na nĩ tũngĩamũtuĩrĩire kũringana na watho witũ
No Lisia, mũnene ũcio wa mbũtũ agĩũka akĩmũruta moko-inĩ maitũ na hinya akĩmweheria, na agĩathana athitangi ake moke kũrĩ wee.)
Wee mwene wamũũrangia nĩ ũkũmenya ma ya ũhoro ũyũ wothe tũmũthitangĩire.”
Nao Ayahudi makĩnyitanĩra na thitango ĩyo, makiuga atĩ maũndũ macio maarĩ ma ma.
Rĩrĩa barũthi aaheneirie Saũlũ na moko aarie-rĩ, Saũlũ oigire atĩrĩ, “Nĩ njũĩ atĩ nĩ ũkoretwo ũrĩ mũtui cira wa rũrĩrĩ rũrũ ihinda rĩa mĩaka mĩingĩ, nĩ ũndũ ũcio nĩ ngwĩyarĩrĩria ngenete
Nĩ ũndũ mũhũthũ harĩwe kũmenya atĩ ti makĩria ma mĩthenya ikũmi na ĩĩrĩ ĩthirĩte kuuma ndambata Yahrushalayim kũhoya Yahweh.
Andũ arĩa maathitangĩte matianyonire ngĩkararania na mũndũ o na ũrĩkũ hekarũ-inĩ, kana ngĩtũma kĩrĩndĩ kĩgĩe na ngũĩ thunagogi-inĩ, o na kana handũ hangĩ o hothe itũũra-inĩ
Na matingĩhota kuonania ihooto harĩwe cia thitango icio maathitangĩire.
No rĩrĩ, nĩ ngwĩtĩkĩra atĩ nĩ hoyaga Kĩhoti wa maithe maitũ ndĩ mũrũmĩrĩri wa Njĩra ĩyo, o ĩyo metaga ya gĩkundi kĩa nyamũkano. Niĩ nĩ njĩtĩkĩtie maũndũ mothe marĩa megiĩ Watho na marĩa mandĩkĩtwo mabuku-inĩ ma Anabii,
na ndĩ na kĩĩrĩgĩrĩro thĩinĩ wa Yahweh o ta kĩrĩa andũ aya marĩ nakĩo, atĩ nĩ gũgakorwo na kũriũka kwa andũ arĩa athingu na arĩa aaganu.
Nĩ ũndũ ũcio nĩ ndĩĩrutanagĩria hĩndĩ ciothe kũiga thamiri yakwa ĩtarĩ na ũcuke mbere ya Yahweh na mbere ya andũ.
“Thutha wa gũkorwo itarĩ kuo mĩaka mĩingĩ, nĩ ndokire Yahrushalayim nĩgetha ndehere andũ akwa iheo nĩ ũndũ wa athĩni na ndute maruta nĩ ũndũ wa Yahweh.
Na rĩrĩa ndarũmbũyanagia na maũndũ macio nĩ mangorire kũu hekarũ-inĩ ndĩtheretie. Gũtiarĩ na gĩkundi kĩa andũ ndaarĩ nakĩo, o na kana ngĩkorwo ngĩruta thĩna
No nĩ kũrĩ Ayahudi a kuuma bũrũri wa Asia arĩa magĩrĩirwo nĩgũkorwo marĩ haha mbere yaku na maathitange angĩkorwo nĩ marĩ ũndũ mangĩnjukĩra.
Akorwo ti ũguo, aya marĩ haha nĩ magĩrĩirwo moige ihĩtia rĩrĩa maanyonire narĩo rĩrĩa ndaarũgamire mbere ya Kĩama,
tiga ũkorirwo nĩ ũndũ ũyũ ũmwe ndanĩrĩire rĩrĩa ndaarũngiĩ mbere yao ngiuga atĩrĩ: ‘Ũmũthĩ ndũgamĩte mbere yanyu njiirithio nĩ ũndũ nĩ njĩrĩgĩrĩire ũhoro wa kũriũka kwa arĩa akuũ.’ ”
Nake Felike, nĩ ũndũ nĩ amenyete wega ũhoro wa Njĩra ĩyo, agĩtĩĩria cira. Akiuga atĩrĩ, “Hĩndĩ ĩrĩa Lisia, ũcio mũnene wa mbũtũ agoka-rĩ, nĩguo ngaatua cira waku.”
Agĩatha mũnene ũcio wa thigari igana rĩmwe aige Saũlũ arĩ mũrangĩre, no amũhe wĩyathi mũnini na etĩkĩrie arata ake marũmbũiye mabata make.
Na rĩrĩ, thutha wa mĩthenya mĩnini, Felike agĩũka marĩ na mũka Dirusila, ũrĩa warĩ Mũyahudi mũndu-wa-nja. Agĩtũmanĩra Saũlũ, na akĩmũthikĩrĩria akĩaria ũhoro wa wĩtĩkio thĩinĩ wa Messiya Yahshua.
Rĩrĩa Saũlũ aaragia ũhoro wa ũthingu, na wa kwĩgirĩrĩria merirĩria ma mwĩrĩ, o na wa cira ũrĩa ũgoka, Felike akĩigua etigĩra, akiuga atĩrĩ, “Nĩ ũguo! Rĩu no ũthiĩ. Rĩrĩa ndĩrĩgĩa na ihinda rĩagĩrĩire, nĩ ndĩgũtũmanĩra ũũke.”
Ihinda-inĩ o rĩu no ehokaga atĩ Saũlũ nĩ angĩamũheire ihaki, na nĩ ũndũ ũcio nĩ aikaraga akĩmũtũmanagĩra, akaaria nake.
Hĩndĩ ĩrĩa mĩaka ĩĩrĩ yathirire-rĩ, Porikio Fesito agĩcoka ithenya rĩa Felike, no tondũ Felike nĩ endaga gũkenia Ayahudi, agĩtiga Saũlũ njera.