Atũmwo 25
Na rĩrĩ, mĩthenya ĩtatũ yathira thutha wa Fesito gũkinya kũu bũrũri-inĩ, akiuma Kaisarea akĩambata agĩthiĩ Yahrushalayim.
Nao athĩnjĩri-Yahweh arĩa anene na atongoria a Ayahudi magĩũka harĩ we, makĩmwĩra maũndũ marĩa Saũlũ aathitangĩirwo.
Nĩ mahĩkire gũthaitha Fesito atĩ nĩ ũndũ wa wega wake kũrĩ o etĩkĩre Saũlũ atwarwo Yahrushalayim, nĩgũkorwo nĩ mahaaragĩria kũmuoheria njĩra-inĩ mamũũrage.
Nake Fesito akĩmacokeria atĩrĩ, “Saũlũ ahingĩirwo Kaisarea, na niĩ nĩ ngũcoka kuo o narua
Tondũ ũcio no tũthiĩ na atongoria amwe anyu nĩgetha mathiĩ magathitangĩre mũndũ ũcio kuo, angĩkorwo nĩ harĩ ũndũ mũũru ekĩte.”
Thutha wa gũikarania nao kũu ihinda ta rĩa mĩthenya ĩnana kana ikũmi, agĩikũrũka, agĩthiĩ Kaisarea, na mũthenya ũyũ ũngĩ akĩgomithania igooti, na agĩathana Saũlũ arehwo mbere yake.
Rĩrĩa Saũlũ aakinyire, Ayahudi arĩa maikũrũkĩte kuuma Yahrushalayim makĩmũrigicĩria, na makĩmũthitangĩra maũndũ maingĩ mooru, marĩa matangĩahotire kuonania atĩ nĩ ma ma.
Nake Saũlũ akĩĩyarĩrĩria, akiuga atĩrĩ: “Niĩ ndirĩ ũndũ njĩkĩte ũreganĩte na watho wa Ayahudi, o na kana wa hekarũ o na kana wa Kaisari.”
Nake Fesito, akĩenda gũkenia Ayahudi akĩũria Saũlũ atĩrĩ, “Wee nĩ ũkwenda kwambata ũthiĩ Yahrushalayim ngagũcirithĩrie kuo nĩ ũndũ wa maũndũ maya ũthitangĩirwo?”
Nake Saũlũ agĩcokia atĩrĩ, “Rĩu ndũgamĩte igooti-inĩ rĩa Kaisari, harĩa njagĩrĩirwo nĩ gũcirithĩrio. Niĩ ndihĩtĩirie Ayahudi, o ta ũrĩa wee mwene ũmenyete o wega.
No rĩrĩ, angĩkorwo ndĩ na ihĩtia rĩa gwĩka ũndũ o wothe wa gũtũma njũragwo-rĩ, ndingĩrega gũkua. No angĩkorwo maũndũ marĩa thitangĩirwo nĩ Ayahudi aya ti ma ma-rĩ, gũtikĩrĩ mũndũ ũrĩ na gĩtũmi gĩa kũũneana kũrĩ o. Ndacokia cira riiko kũrĩ Kaisari!”
Thutha wa Fesito gũcokania ndundu na kĩama gĩake, akiuga atĩrĩ, “Wacokia cira riiko kũrĩ Kaisari na kũrĩ Kaisari nĩkuo ũgũthiĩ!”
Mĩthenya mĩnini yathira Mũthamaki Agiripa na Berinike magĩũka kũu Kaisarea kũnyita Fesito ũgeni.
Na tondũ nĩ maikaraga kũu mĩthenya mĩingĩ-rĩ, Fesito akĩhe mũthamaki ũcio ũhoro wa cira wa Saũlũ, akĩmwĩra atĩrĩ, “Gũkũ kũrĩ na mũndũ watigirwo nĩ Felike arĩ muohe.
Rĩrĩa ndaathiire Yahrushalayim-rĩ, athĩnjĩri-Yahweh arĩa anene na athuri a Ayahudi nĩ mamũthitangire, na makĩnjũria ndĩmũtuĩre.
“Na niĩ ngĩmera atĩ ti mũtugo wa andũ a Roma kũneana mũndũ o wothe ataambĩte kũngʼethanĩra na andũ arĩa mamũthitangĩte na kũheo mweke wa kwĩyarĩrĩria ũhoro-inĩ ũrĩa athitangĩirwo.
Rĩrĩa tuokire nao gũkũ, ndiaikaririe cira ũcio, no ndaarokire kũgomithania igooti na ngĩathana mũndũ ũcio arehwo.
Rĩrĩa andũ arĩa maamũthitangĩte maarũgamire kwaria, matiamũthitangĩire ũndũ o na ũmwe mũũru ta ũrĩa nderĩgĩrĩire.
No handũ ha ũguo, o maarĩ na maũndũ mamwe maakararanagia nake makoniĩ ũhoro wa ũrutani wao na makoniĩ ũhoro wa mũndũ wakuĩte wetagwo Yahshua ũrĩa Saũlũ oigaga atĩ arĩ muoyo.
Nĩ ndarigirwo nĩ ũrĩa ingĩtuĩria maũndũ ta macio; nĩ ũndũ ũcio ngĩmũũria kana no eende gũthiĩ Yahrushalayim agacirithĩrio maũndũ macio aathitangĩirwo kuo.
Rĩrĩa Saũlũ aacokirie cira riiko etererio itua rĩa Mũthamaki-rĩ, ngĩathana ahingĩrwo nginya rĩrĩa ingĩahotire kũmũtwarithia kũrĩ Kaisari.”
Hĩndĩ ĩyo Agiripa akĩĩra Fesito atĩrĩ, “No nyende kwĩiguĩra mũndũ ũcio akĩaria.” Nake Fesito agĩcokia atĩrĩ, “Nĩ ũkamũigua rũciũ.”
Mũthenya ũyũ ũngĩ, Agiripa na Berinike magĩũka marĩ na mwago mũnene na magĩtonya nyũmba ya gũcirĩrwo marĩ hamwe na anene a thigari o na athuri a itũũra arĩa maarĩ igweta. Nake Fesito agĩathana Saũlũ arehwo.
Fesito akiuga atĩrĩ, “Mũthamaki Agiripa na andũ arĩa othe mũrĩ na ithuĩ haha, nĩ mũkuona mũndũ ũyũ! Nĩwe mũingĩ wothe wa Ayahudi wanjũririe, ndĩ kũu Yahrushalayim na ndĩ gũkũ Kaisarea, ngacire ũhoro wake, ũkĩanĩrĩra ũkiugaga atĩ ndagĩrĩirwo nĩ gũtũũra muoyo rĩngĩ.
No niĩ nĩ ndonire atĩ ndarĩ ũndũ eekĩte wa gũtũma ooragwo, no tondũ nĩ acokirie cira riiko kũrĩ Mũthamaki, ngĩtua itua rĩa kũmũtũma Roma.
No ndirĩ na ũndũ mũna ingĩandĩkĩra Mũthamaki Mũgathe igũrũ rĩake. Nĩ ũndũ ũcio-rĩ, ndamũrehe mbere yanyu inyuothe, na makĩria mbere yaku wee Mũthamaki Agiripa, nĩgetha ũhoro ũyũ warĩkia gũtuĩrio, ngĩe na ũndũ ingĩandĩka.
Nĩgũkorwo ndikuona kwagĩrĩire gũtũma mũndũ muohe itekuonania maũndũ marĩa athitangĩirwo.”