Atũmwo 26
Nake Agiripa akĩĩra Saũlũ atĩrĩ, “Ũrĩ na rũtha rwa kwĩyarĩrĩria.”
“Mũthamaki Agiripa, nĩ ngũigua ndĩ mũtĩĩku kũrũgama mbere yaku ũmũthĩ ndĩyarĩrĩrie igũrũ rĩa maũndũ mothe marĩa thitangĩirwo nĩ Ayahudi,
na makĩria nĩ tondũ wee nĩ ũũĩ mĩtugo yothe ya Ayahudi na maũndũ marĩa makararanagĩria. Nĩ ũndũ ũcio nĩ ndakũhoya ũũthikĩrĩrie ũtegũthethũka.
“Ayahudi othe nĩ moĩ ũrĩa ndũũrĩte kuuma ndĩ mwana, kuuma kĩambĩrĩria kĩa mũtũũrĩre wakwa ndĩ bũrũri-inĩ wakwa kĩũmbe, o na ndĩ Yahrushalayim.
Nĩ manjũĩ hĩndĩ ndaya, na mangĩenda, no maheane ũira wakwa, atĩ kũringana na Watho ndaatũũrĩte ndĩ Mũfarisai, ndĩĩrutanĩirie na kĩyo kũrũmia maũndũ mothe ma ndini iitũ.
Na rĩrĩ, ndũgamĩte haha ũmũthĩ njiirithio nĩ ũndũ wa kwĩrĩgĩrĩra kĩĩranĩro kĩrĩa Yahweh eerĩire maithe maitũ.
Kĩĩranĩro kĩu no kĩo mĩhĩrĩga ĩrĩa iitũ ikũmi na ĩĩrĩ ĩĩrĩgagĩrĩra kuona gĩkĩhingio, rĩrĩa ĩtungatagĩra Yahweh na kĩyo ũtukũ na mũthenya. Na rĩrĩ, wee Mũthamaki, Ayahudi maathitangĩte nĩ ũndũ wa kĩĩrĩgĩrĩro kĩu
Nĩ kĩ kĩngĩtũma mũndũ o na ũrĩkũ wanyu atue atĩ nĩ ũndũ ũtangĩĩtĩkio, atĩ Yahweh nĩ ariũkagia arĩa akuũ?
“O na niĩ nĩ ndaiguithĩtio atĩ nĩ ndagĩrĩirwo nĩ gwĩka ũrĩa wothe ingĩahotire ndegane na rĩĩtwa rĩa Yahshua wa Nazarethi.
Na ũguo nĩguo ndeekire kũu Yahrushalayim. Ngĩikia andũ aingĩ a arĩa aamũre njera, heetwo rũtha nĩ athĩnjĩri-Yahweh arĩa anene, na rĩrĩa andũ acio mooragagwo, nĩ ndetĩkanagia na ituĩro rĩu
Mahinda maingĩ nĩ ndathiiaga kuuma thunagogi-inĩ ĩmwe nginya ĩrĩa ĩngĩ nĩgetha ndĩmaneane maherithio, na ngageria kũmahatĩrĩria marume Yahweh. Na tondũ wa ũrĩa ndaamarakarĩire mũno nĩ ndathiiaga kũmanyarira o na matũũra-inĩ marĩa manene ma kũngĩ.
“Hĩndĩ ĩmwe ndĩ rũgendo-inĩ ta rũu-rĩ, ndaathiiaga Dameski heetwo ũhoti na ngatũmwo nĩ athĩnjĩri-Yahweh arĩa anene
Kũrĩ thaa thita cia mũthenya, wee Mũthamaki, ndĩ njĩra-inĩ ngĩona ũtheri mũnene woimĩte igũrũ ũkengete gũkĩra riũa, ũkĩnjarĩra mĩena yothe, niĩ na andũ arĩa twarĩ nao
Ithuothe tũkĩgũa thĩ, na niĩ ngĩigua mũgambo ũkĩnjĩĩra atĩrĩ na rwario rwa Kĩhibirania, ‘Saũlũ, Saũlũ, ũũnyariraga nĩkĩ? Nĩ ũndũ ũrĩ hinya harĩwe kũhũũra mĩcengi na hati.’
“Na niĩ hĩndĩ ĩyo ngĩũria atĩrĩ, ‘Wee nĩwe ũ, Mwathi?’ “Nake Mwathi akĩnjokeria atĩrĩ, ‘Nĩ niĩ Yahshua ũrĩa ũnyariraga.
Rĩu ũkĩra ũrũgame na magũrũ maku. Ndaakuumĩrĩra ngwamũre ũtuĩke ndungata na ũtuĩke mũira wa maũndũ marĩa wonete mangoniĩ na marĩa ngũkuonia.
Nĩ ngũkũhonokia kuuma kũrĩ andũ anyu na kuuma kũrĩ andũ-a-Ndũrĩrĩ arĩa ndĩragũtũma kũrĩ o,
ũkamahingũre maitho, na ũmagarũre moime nduma-inĩ mathiĩ ũtheri-inĩ, na ũmarute hinya-inĩ wa Shaitani ũmatware kũrĩ Yahweh, nĩgetha maamũkĩre ũrekanĩri wa mehia, na magĩe na handũ gatagatĩ-inĩ ka andũ arĩa maamũrĩtwo na ũndũ wa kũnjĩtĩkia.’
“Nĩ ũndũ ũcio, Mũthamaki Agiripa, ndiigana kwaga gwathĩkĩra kĩoneki kĩu kĩoimĩte igũrũ.
Ngĩambĩrĩria kũhunjĩria andũ arĩa maarĩ Dameski, ngĩcoka ngĩhunjĩria andũ a kũu Yahrushalayim o na a Yahuda guothe, na andũ-a-Ndũrĩrĩ o nao. Ndaahunjagia atĩ nĩ maagĩrĩirwo nĩ kwĩrira na magarũrũkĩre Yahweh, na monanie kwĩrira kwao na ũndũ wa ciĩko ciao.
Kĩu nĩkĩo gĩatũmire Ayahudi maanyitĩre hekarũ-inĩ, na magerie kũnjũraga.
No nĩ ngoretwo ndĩ na ũteithio wa Yahweh nginya ũmũthĩ ũyũ, na nĩkĩo nũngiĩ haha nĩguo heane ũira kũrĩ andũ arĩa anini na arĩa anene o ũndũ ũmwe. Ndirĩ ũndũ njugaga makĩria ma ũrĩa anabii na Musa moigĩte atĩ nĩ ũgekĩka,
atĩ Messiya nĩ akanyarirwo, na atuĩke wa mbere kũriũka kuuma kũrĩ arĩa akuũ, nĩguo ahunjie ũhoro wa ũtheri kũrĩ andũ ake kĩũmbe o na kũrĩ andũ-a-Ndũrĩrĩ.”
Fesito aigua ũguo, akĩmũgũthũkĩra akĩmwĩra atĩrĩ, “Wee Saũlũ nĩ kũgũrũka ũgũrũkĩte! Gĩthomo kĩu gĩaku kĩingĩ nĩ gĩtũmĩte ũgũrũke.”
Nake Saũlũ akĩmũcokeria atĩrĩ, “Toone mũgathe Fesito, niĩ ndigũrũkĩte. Ũndũ ũrĩa ndĩroiga nĩ wa ma na ti ũgũrũki
Mũthamaki nĩ oĩ maũndũ maya, na no ndĩmwarĩrie itegwĩtigĩra. Nĩ njũĩ atĩ gũtirĩ ũndũ o na ũmwe wa maũndũ maya aagĩte kũmenya, tondũ matiekĩirwo hitho-inĩ.
Mũthamaki Agiripa, wee nĩ wĩtĩkĩtie anabii? Nĩ njũĩ atĩ nĩ ũmetĩkĩtie.”
Hĩndĩ ĩyo Agiripa akĩũria Saũlũ atĩrĩ, “Nĩ ũgwĩciria atĩ kahinda-inĩ kanini ũguo no ũnjiguithie nduĩke Mũmessiya?”
Nake Saũlũ akĩmũcokeria atĩrĩ, “kahinda kanyihe kana karaihe, ndĩrahoya Yahweh atĩ to wee wiki, no o na andũ aya angĩ othe maraathikĩrĩria ũmũthĩ, ndenda matuĩke ta niĩ, tiga o mĩnyororo ĩno.”
Mũthamaki ũcio agĩũkĩra marĩ hamwe na barũthi, na Berinike, na andũ arĩa maikarĩte hamwe nao
Makiuma nyũmba ĩyo, na rĩrĩa maaranagĩria, makiuga atĩrĩ, “Mũndũ ũyũ ndarĩ ũndũ ekĩte wa gũtũma ooragwo kana ohwo.”
Agiripa akĩĩra Fesito atĩrĩ, “Mũndũ ũyũ nĩ angĩarekererio korwo ndaracoketie cira riiko kũrĩ Kaisari.”