Atũmwo 27
Na rĩrĩa gwatuirwo atĩ nĩ tũkũhaica marikabu tũthiĩ Italia, Saũlũ na andũ arĩa angĩ moohetwo makĩneanwo kũrĩ mũnene-wa-thigari-igana rĩmwe, warĩ wa mbũtũ ya Agusito, wetagwo Juliasi.
Tũkĩhaica marikabu yoimĩte Aduramutio ĩrĩa yakirie gũthiĩ icukĩro-inĩ cia marikabu iria ciarĩ ndwere-inĩ cia iria rĩrĩa inene bũrũri-inĩ wa Asia, na ithuĩ tũkĩambĩrĩria rũgendo tũgĩthiĩ. Nake Arisitariko, Mũmakedonia woimĩte Thesalonike, aarĩ hamwe na ithuĩ.
Mũthenya ũyũ ũngĩ tũgĩkinya Sidoni; nake Juliasi, nĩ ũndũ wa kũiguĩra Saũlũ tha, akĩmwĩtĩkĩria athiĩ kũrĩ arata ake nĩguo mamũhe kĩrĩa angĩabatarire.
Twoima kũu tũkĩambĩrĩria rũgendo rĩngĩ, tũgereire mwena ũrĩa ũtaarĩ rũhuho wa Kuporo, tondũ huho cioimaga na mwena ũrĩa twathiiaga.
Twarĩkia gũtuĩkania iria rĩrĩa inene rĩrĩa rĩarĩ gũkuhĩ na mabũrũri ma Kilikia na Pamufilia tũgĩkinya itũũra rĩa Mira, bũrũri-inĩ wa Likia.
Tũrĩ kũu mũnene ũcio wa thigari igana rĩmwe akĩona marikabu ya Alekisanderia yathiiaga Italia, nake agĩtũhaicia yo.
Tũgĩthiĩ kahora ihinda rĩa mĩthenya mĩingĩ na tũrĩ na thĩna mũingĩ nginya tũgĩkinya gũkuhĩ na Kinido. Na rĩrĩa rũhuho rwagiririe tũthiĩ ũrĩa twendaga-rĩ, tũgĩthiĩ tũgereire mwena ũrĩa ũtaarĩ rũhuho wa Kirete, kũngʼethera Salimone.
Nĩ twathiire na thĩna mũingĩ tũgereire ndwere-inĩ cia iria rĩrĩa inene na tũgĩkinya handũ heetagwo Gĩcukĩro Kĩega, hakuhĩ na itũũra rĩa Lasea.
Mahinda maingĩ nĩ maathirĩte, na gũthiĩ na marikabu kwarĩ na ũgwati tondũ ihinda rĩa Gĩathĩ gĩa Kwĩhinga kũrĩa Irio nĩ rĩahĩtũkĩte. Nĩ ũndũ ũcio Saũlũ akĩmataara akĩmera atĩrĩ,
“Athuri aya, nĩ nguona atĩ rũgendo rwitũ nĩ rũgũkorwo na mũtino na rũrehe hathara nene kũrĩ marikabu na mĩrigo o na nginya kũrĩ mĩoyo iitũ yo mĩene.”
No mũnene ũcio wa thigari igana rĩmwe, handũ ha gũthikĩrĩria ũrĩa Saũlũ oigaga, aarũmĩrĩire ũtaari wa mũtwarithia wa marikabu o na wa mwene marikabu ĩyo
Tondũ gĩcukĩro kĩu gĩtiarĩ kĩega gĩa gũikarwo hĩndĩ ya heho-rĩ, andũ aingĩ magĩtua itua tũthiĩ na mbere, twĩhokete gũkinya Foinike, tũikare kuo hĩndĩ ĩyo ya heho. Gĩkĩ kĩarĩ gĩcukĩro kĩa meeri gĩa Kirete, nakĩo kĩangʼetheire mwena wa gũthini wa ithũĩro, o ũndũ ũmwe na mwena wa gathigathini wa ithũĩro.
Rĩrĩa rũhuho rumĩte mwena wa gũthini rwambĩrĩirie kũhurutana kahora-rĩ, magĩĩciria nĩ mona kĩrĩa mendaga, na nĩ ũndũ ũcio makĩohora marikabu magĩthiĩ magereire hũgũrũrũ-inĩ cia Kirete
Na ihinda rĩtanathiĩ mũno, rũhuho rwa hinya wa kĩhuhũkanio kĩnene rwetagwo “Eurakilo,” rũkĩhurutana ruumĩte gĩcigĩrĩra-inĩ kĩu.
Nayo marikabu ĩkĩnyitwo nĩ kĩhuhũkanio kĩu ĩkĩremwo nĩ gũthiĩ na kũrĩa rũhuho rwoimaga, nĩ ũndũ ũcio tũkĩmĩrekereria ĩtwarwo nĩ rũhuho.
Na rĩrĩa twahĩtũkagĩra gacigĩrĩra-inĩ kanini geetagwo Kauda, nĩ twarĩ na thĩna wa kũhaicia gatarũ ga kũhonokia andũ igũrũ wa marikabu
Hĩndĩ ĩrĩa andũ acio maakahaicirie marikabu-inĩ, makĩhĩtũkĩria mĩkanda rungu rwa marikabu yo nyene nĩgetha mamĩohe wega. Nĩ ũndũ wa gwĩtigĩra kũhata mũthanga-inĩ wa handũ heetagwo Siriti-rĩ, makĩharũrũkia matanga na makĩrekereria marikabu ĩyo ĩtwarwo o kũrĩa ĩngĩatwarirwo nĩ rũhuho.
Nĩ twanyarirĩkire mũno nĩ ũndũ wa kĩhuhũkanio kĩu o nginya mũthenya ũyũ ũngĩ makĩambĩrĩria gũikia mĩrigo iria-inĩ.
Naguo mũthenya wa gatatũ makĩambĩrĩria gũikia indo cia wĩra cia marikabu iria-inĩ na moko mao ene
Na rĩrĩa kwaagire kuoneka riũa kana njata ihinda rĩa mĩthenya mĩingĩ, nakĩo kĩhuhũkanio gĩgĩthiĩ na mbere kũhuhũkania-rĩ, tũkĩrigĩrĩria na kwaga mwĩhoko o wothe wa kũhonoka.
Thutha wa andũ gũikara ihinda iraya matekũrĩa, Saũlũ akĩrũgama mbere yao akĩmera atĩrĩ: “Andũ aya, nĩ kaba mũngĩetĩkĩrire ũtaaro wakwa mwage kuuma Kirete, hĩndĩ ĩyo nĩ mũngĩehonokirie kuumana na ũgwati ũyũ o na hathara ĩno.
No rĩrĩ, nĩ ngũmũthaitha mũthiĩ na mbere kũũmĩrĩria, tondũ gũtirĩ o na ũmwe wanyu ũkũũra; tiga marikabu iiki ĩkwanangĩka.
Ũtukũ ũyũ, mũraika wa Kĩhoti ũrĩa niĩ ndĩ wake na ũrĩa ndungataga nĩ arũgamire hakuhĩ na niĩ na
aanjĩra atĩrĩ, ‘Saũlũ ndũkae gwĩtigĩra. No nginya ũrũgame mbere ya Kaisari ũcirithio; na rĩrĩ, Yahweh tondũ wa wega wake, nĩ ekũhonokia mĩoyo ya andũ arĩa othe ũrĩ nao.’
Nĩ ũndũ ũcio, inyuĩ andũ aya, thiĩi na mbere kũũmĩrĩria, nĩgũkorwo ndĩ na wĩtĩkio thĩinĩ wa Yahweh atĩ nĩ gũkũhaana o ta ũguo aanjĩrĩte.
No o na kũrĩ ũguo no nginya tũhate gĩcigĩrĩra-inĩ kĩna.”
Na rĩrĩ, ũtukũ wa mũthenya wa ikũmi na ĩna wakinya, o tũgĩtwarithagio ũũ na ũũ nĩ rũhuho tũtuĩkanĩirie iria rĩrĩa rĩĩtagwo Adiria-rĩ, ũtukũ gatagatĩ atwarithia a marikabu makĩĩgereria nĩ makuhĩrĩirie thĩ nyũmũ.
Nao makĩoya kĩgeri kĩa ũriku wa maĩ makĩona atĩ maĩ maarĩ na ũriku wa buti igana rĩa mĩrongo ĩĩrĩ. Thutha wa kahinda kanini magĩthima rĩngĩ makĩona atĩ maĩ maarĩ na ũriku wa buti mĩrongo kenda
Nĩ ũndũ wa gwĩtigĩra tũtikagũthithio rwaro rwa ihiga, makĩrekia nanga inya kuuma mwena wa na thutha wa marikabu, na makĩhoya gũkĩe.
Na rĩrĩa maageragia kũũra moime marikabu-inĩ, atwarithia a marikabu makĩharũrũkia gatarũ ga kũhonokia andũ iria-inĩ, metuĩte atĩ marenda kũharũrũkia nanga imwe kuuma mũthia wa na mbere wa marikabu
Hĩndĩ ĩyo Saũlũ akĩĩra mũnene ũcio wa thigari igana rĩmwe hamwe na thigari atĩrĩ, “Andũ aya maga gũikara marikabu-inĩ, inyuĩ mũtingĩhonoka.”
Nĩ ũndũ ũcio thigari igĩtinia mĩkanda ĩrĩa yanyitĩte gatarũ ga kũhonokia andũ, makĩreka kore.
Gwakuhĩrĩria gũkĩa, Saũlũ akĩmathaitha othe marĩe irio, akĩmera atĩrĩ, “Kwa ihinda rĩa mĩthenya ikũmi na ĩna mĩthiru, mũkoretwo mũikarĩte o ũguo mwĩimĩte irio, mũtekũrĩa kĩndũ.
Rĩu ndamũthaitha mũrĩe irio. Nĩ mũbatarĩte kũrĩa irio nĩguo imũige muoyo. Gũtirĩ rũcuĩrĩ rwa mũtwe wa mũndũ o na ũmwe wanyu rũkũũra.”
Aarĩkia kuuga ũguo, akĩoya mũgate, agĩcokeria Yahweh ngatho mbere yao othe. Agĩcoka akĩwenyũranga, akĩambĩrĩria kũrĩa.
Nao othe makĩigua momĩrĩria, makĩoya irio makĩrĩa.
Ithuothe twarĩ andũ 276 arĩa twarĩ marikabu-inĩ.
Rĩrĩa maarĩire makĩhũna, maacokire magĩikia ngano iria-inĩ nĩgetha marikabu ĩhũthe.
Kwaroka gũkĩa-rĩ, atwarithia matiigana kũmenya bũrũri ũcio, no makĩona gĩcongoco kĩarĩ na mũthanga hũgũrũrũ-inĩ, magĩĩciria magerie kũhatithia marikabu ho.
Nao makĩrenga nanga, igĩtigwo iria-inĩ, na o hau makĩohora mĩkanda ĩrĩa yohete thukani. Magĩcoka makĩhaicia tama ũrĩa wĩkagĩrwo mbere ya marikabu nĩguo ũnyite rũhuho, magĩthiĩ merekeire hũgũrũrũ-inĩ
No rĩrĩ, marikabu ĩkĩgũtha mũthanga na ĩkĩhata. Mũthia wa na mbere wayo ũkĩhata na ũkĩrũma biũ, naguo mũthia wa na thutha ũkiunĩkanga nĩ ũndũ wa kũhũũrwo nĩ makũmbĩ ma maĩ.
Thigari ikĩbanga ciũrage ohwo nĩgetha gũtikagĩe o na ũmwe wao ũngĩthambĩra ore.
No tondũ mũnene ũcio wa thigari igana rĩmwe nĩ endaga kũhonokia muoyo wa Saũlũ, agĩcigiria ciĩke ũguo ciabangĩte. Agĩathana atĩ andũ arĩa mangĩahotire gũthambĩra mambe marũge maĩ-inĩ mathiĩ thĩ nyũmũ.
Nao andũ acio angĩ makinye kuo menyiitĩrĩire mbaũ kana icunjĩ cia marikabu. Ũguo nĩguo andũ othe maakinyire thĩ nyũmũ matarĩ na ũũru.