Atũmwo 3

Mũthenya ũmwe Kepha na Johana nĩ mambatire magĩthiĩ hekarũ-inĩ ihinda rĩa mahoya, na kwarĩ thaa kenda cia mũthenya.

Na rĩrĩ, mũndũ waciarĩtwo arĩ mwonju nĩ akuuagwo agatwarwo kĩhingo-inĩ kĩa hekarũ kĩrĩa gĩetagwo Gĩthaka, akaigwo ho o mũthenya nĩguo ahoe mbeca kũrĩ andũ arĩa maatonyaga hekarũ.

Na rĩrĩa onire Kepha na Johana marĩ hakuhĩ gũtonya-rĩ, akĩmahoya mbeca

Nao Kepha na Johana makĩmũkũũrĩra maitho. Hĩndĩ ĩyo Kepha akĩmwĩra atĩrĩ, “Ta tũrore!”

Nĩ ũndũ ũcio mũndũ ũcio akĩmarora, erĩgĩrĩire atĩ nĩ mekũmũhe kĩndũ.

Kepha agĩcoka akĩmwĩra atĩrĩ, “Betha na thahabu ndirĩ nacio, no kĩrĩa ndĩ nakĩo nĩkĩo ngũkũhe. Thĩinĩ wa rĩĩtwa rĩa Yahshua Messiya wa Nazarethi, ũkĩra wĩtware.”

Akĩmũnyita guoko gwake kwa ũrĩo, akĩmũrũgamia na igũrũ, na o hĩndĩ ĩyo magũrũ na thũngʼwa cia mũndũ ũcio ikĩgĩa na hinya.

Nake akĩrũga na igũrũ, akĩambĩrĩria gwĩtwara. Agĩcoka agĩthiĩ nao hekarũ-inĩ, etwarĩte na magũrũ, akĩrũgarũgaga na akĩgoocaga Yahweh.

Rĩrĩa andũ othe monire agĩĩtwara na magũrũ akĩgoocaga Yahweh,

makĩmenya atĩ nĩ mũndũ ũrĩa watũũraga aikarĩte kĩhingo-inĩ kĩa hekarũ kĩrĩa gĩetagwo Gĩthaka akĩhoya mbeca. Nao makĩgega mamakĩte nĩ kuona ũrĩa kwahanĩkĩte harĩ mũndũ ũcio.

Mũndũ ũcio watũũrĩte ahoyaga mbeca-rĩ, o enyiitĩrĩire Kepha na Johana, andũ othe makĩgega na magĩũka matengʼerete nginya hau maarĩ, naho heetagwo Gĩthaku gĩa Solomoni

Rĩrĩa Kepha onire ũguo, akĩmera atĩrĩ, “Andũ aya a Isiraeli, ũndũ ũyũ ũramũgegia nĩkĩ? Mũratũrora atĩa taarĩ hinya witũ kana ũthingu witũ watũma mũndũ ũyũ etware na magũrũ?

Kĩhoti wa Iburahĩmu, na Isaaka na Jakubu, o we Kĩhoti wa maithe maitũ, nĩ agoocithĩtie ndungata yake Yahshua. Inyuĩ nĩ mwamũneanire ooragwo, na mũkĩmũkaana mbere ya Pilato, o na gũtuĩka nĩ atuĩte itua rĩa kũmũrekereria.

Mwakaanire Ũrĩa Mwamũre na Mũthingu mũkiuga muohorerwo mũũragani.

Mworagire ũrĩa mũheani wa muoyo, no Yahweh nĩ amũriũkirie kuuma kũrĩ arĩa akuũ. Ithuĩ tũrĩ aira a ũhoro ũcio

Nĩ ũndũ wa wĩtĩkio thĩinĩ wa rĩĩtwa rĩa Yahshua, mũndũ ũyũ mũrona na mũũĩ, nĩ agĩĩte na hinya. Nĩ rĩĩtwa rĩa Yahshua na wĩtĩkio ũrĩa uumanaga nake watũma mũndũ ũyũ ahone o ta ũrĩa inyuothe mũreyonera.

“Na rĩrĩ, ariũ a Ithe witũ, nĩ njũĩ atĩ mwekire ũguo nĩ ũndũ wa kũrigwo, o ta ũrĩa atongoria anyu o nao meekire.

No rĩrĩ, ũguo nĩguo Yahweh aahingirie ũrĩa aarĩtie o mbere na tũnua twa anabii othe, akiuga atĩ Messiya wake nĩ akanyarirĩka.

Nĩ ũndũ ũcio mwĩrirei na mũgarũrũke kũrĩ Yahweh, nĩgetha mehia manyu meherio, nĩguo mũgĩe na mahinda ma kũrurumũkio moimĩte kũrĩ Yahweh, na

nĩguo atũme Messiya, o we ũrĩa wamũrĩtwo nĩ ũndũ wanyu, nake nĩwe Yahshua.

We no nginya aikare igũrũ o nginya ihinda rĩkinye rĩa Yahweh rĩa gũcokereria maũndũ mothe, o ta ũrĩa eranĩire o tene na tũnua twa anabii aake amũre.

Nĩgũkorwo Musa oigire atĩrĩ, ‘Yahweh Kĩhoti wanyu nĩ akamwarahũrĩra mũnabii o ta niĩ kuuma kũrĩ ariũ a thoguo. Na no nginya mũgaathikĩrĩria ũrĩa wothe akaamwĩra.

Na rĩrĩ, mũndũ o wothe ũrĩa ũtakamũthikĩrĩria, nĩ akeherio biũ kuuma kũrĩ andũ ao.’

“Ti-itherũ, anabii othe kuuma hĩndĩ ya Samũeli, arĩa manaaria, nĩ maaririe ũhoro wa matukũ maya.

Na inyuĩ mũrĩ ariũ a anabii, na a kĩrĩkanĩro kĩrĩa Yahweh aarĩkanĩire na maithe manyu. Eerire Iburahĩmu atĩrĩ, ‘Na nĩ ũndũ wa rũciaro rwaku, andũ othe a thĩ nĩ makarathimwo.’

Rĩrĩa Yahweh aariũkirie ndungata yake, aambire kũmĩtũma kũrĩ inyuĩ nĩgetha amũrathime na ũndũ wa kũgarũra o ũmwe wanyu kuuma kũrĩ mĩtũũrĩre yanyu ya waganu.”