Atũmwo 4
Nao athĩnjĩri-Yahweh, na mũnene wa arangĩri a hekarũ, o na Asadukai magĩthiĩ harĩ Kepha na Johana rĩrĩa maaragĩria andũ
Nĩ maiguĩte ũũru mũno tondũ atũmwo nĩ marutaga andũ na makahunjia ũhoro wa kũriũka kuuma kũrĩ arĩa akuũ thĩinĩ wa Yahshua.
Makĩnyita Kepha na Johana, na tondũ kwarĩ hwaĩ-inĩ, makĩmaikia njera nginya mũthenya ũyũ ũngĩ warũmĩrĩire.
No rĩrĩ, andũ aingĩ arĩa maiguire ndũmĩrĩri ĩyo nĩ metĩkirie, naguo mũigana wa arũme ũkĩongerereka magĩkinya ta 5,000.
Mũthenya ũyũ ũngĩ, aathani ao na athuri, na aandĩki-marũa makĩgomana kũu Yahrushalayim.
Nake Anasi, mũthĩnjĩri-Yahweh ũrĩa mũnene, aarĩ ho, marĩ na Kaiafa, na Johana, na Alekisandero, na andũ arĩa angĩ maarĩ a nyũmba ya mũthĩnjĩri-Yahweh ũrĩa mũnene
Magĩathana atĩ Kepha na Johana mareehwo mbere yao, na makĩambĩrĩria kũmoria ciũria. Makĩmoria atĩrĩ, “Mũrahotire gwĩka ũndũ ũcio na hinya ũrĩkũ, kana na rĩĩtwa rĩrĩkũ?”
Nake Kepha, aiyũrĩtwo nĩ Roho Mwamũre, akĩmera atĩrĩ, “Inyuĩ aathani na athuri a andũ
Angĩkorwo twĩtĩtwo ũmũthĩ nĩgetha tũtaarĩrie ũhoro wa gĩĩko kĩega kĩrĩa gĩĩkĩirwo mũndũ ũcio ũratũũrĩte arĩ mwonju, na tũũrio ũrĩa arahonirio-rĩ,
kĩmenyei inyuĩ, o na andũ othe a Isiraeli atĩrĩ: Mũndũ ũyũ arũngiĩ mbere yanyu arĩ mũhonu nĩ ũndũ wa rĩĩtwa rĩa Yahshua Messiya wa Nazarethi, ũrĩa mwacuurithirie, nake Yahweh akĩmũriũkia kuuma kũrĩ arĩa akuũ.
We nĩwe ‘ihiga rĩrĩa inyuĩ aaki mwaregire, na nĩrĩo rĩtuĩkĩte ihiga rĩrĩa inene rĩa koine.’
Naguo ũhonokio ndũngĩoneka harĩ mũndũ ũngĩ o wothe, nĩ ũndũ gũtirĩ rĩĩtwa rĩngĩ gũkũ thĩ rĩheanĩtwo kũrĩ andũ rĩngĩtũhonokia.”
Rĩrĩa monire ũũmĩrĩru wa Kepha na Johana, na makĩmenya atĩ matiarĩ athomu, na atĩ maarĩ andũ o ũguo-rĩ, makĩgega na makĩmenya atĩ andũ acio maakoretwo marĩ na Yahshua
No rĩrĩ, mona mũndũ ũcio wahonetio arũgamĩte hamwe nao-rĩ, matingĩahotire kuuga ũndũ
Nĩ ũndũ ũcio makĩmaatha mehere Kĩama-inĩ, nao athuri magĩcira marĩ oiki.
Makĩũrania atĩrĩ, “Andũ aya tũkũmeeka atĩa? Andũ othe arĩa matũũraga Yahrushalayim nĩ moĩ atĩ nĩ maringĩte kĩama kĩnene na tũtingĩhota gũkaana ũhoro wakĩo
No nĩguo tũgirie ũndũ ũyũ gũthiĩ na mbere makĩria gatagatĩ-inĩ ka andũ-rĩ, no nginya tũkaanie andũ aya kwarĩria mũndũ o na ũrĩkũ na rĩĩtwa rĩu.”
Magĩcoka makĩmeta thĩinĩ rĩngĩ na makĩmaatha atĩ matikaarie kana marutane o na atĩa na rĩĩtwa rĩa Yahshua.
No Kepha na Johana makĩmacokeria atĩrĩ, “Tuai cira inyuĩ ene kana nĩ kwagĩrĩire maitho-inĩ ma Yahweh tũmwathĩkĩre inyuĩ gũkĩra gwathĩkĩra Yahweh.
Nĩgũkorwo tũtingĩhota gũtiga kwaria ũrĩa tuonete na tũkaigua.”
Na thutha wa kũmakaania, mamehĩire mũno, makĩmarekereria mathiĩ. Matingĩahotire gũtua ũrĩa mangĩamaherithirie, tondũ andũ othe nĩ magoocaga Yahweh nĩ ũndũ wa ũrĩa gwekĩkĩte.
Nĩgũkorwo mũndũ ũcio wahonetio na njĩra ya kĩama aarĩ na ũkũrũ wa makĩria ma mĩaka mĩrongo ĩna.
Na rĩrĩa Kepha na Johana maarekereirio, magĩthiĩ kũrĩ andũ a thiritũ yao, na makĩmera ũrĩa wothe athĩnjĩri-Yahweh arĩa anene na athuri maameerĩte.
Rĩrĩa maiguire ũhoro ũcio, makĩanĩrĩra marĩ ngoro ĩmwe makĩhoya Yahweh, makiuga atĩrĩ, “Kĩhoti Yahweh, nĩwe wombire igũrũ na thĩ na iria, o na indo ciothe iria irĩ kuo
Nawe nĩ waririe na ũndũ wa Roho Mwamũre na kanua ka ndungata yaku, o we ithe witũ Daudi, ũkiuga atĩrĩ: “ ‘Nĩ kĩ gĩtũmaga ndũrĩrĩ irakare mũno, na andũ mathugunde mĩbango ya tũhũ?
Athamaki a thĩ nĩ matuĩte itua, na aathani magacokania ndundu, nĩguo mokĩrĩre Yahweh, na mokĩrĩre Ũrĩa wake Mũitĩrĩrie Maguta.’
Ti-itherũ, Herode na Pontio Pilato nĩ moonganire hamwe na andũ-a-Ndũrĩrĩ, na andũ a Isiraeli, itũũra-inĩ rĩrĩ inene nĩguo mathugunde ũrĩa megũũkĩrĩra Yahshua ndungata yaku nyamũre, o ĩrĩa wee waitĩrĩirie maguta
O mekire ũrĩa hinya waku na wendi waku watuĩte o mbere atĩ nĩguo gũgaatuĩka.
Na rĩrĩ, Yahweh, kĩone ũrĩa matwĩhĩire, na ũkĩhotithie ndungata ciaku kwaria kiugo gĩaku irĩ na ũũmĩrĩru mũingĩ.
Tambũrũkia guoko gwaku ũhonanie, na ũringe ciama na morirũ na ũndũ wa rĩĩtwa rĩa Yahshua, ndungata yaku nyamũre.”
Nao maarĩkia kũhoya, handũ hau moonganĩte hagĩthingitha. Nao othe makĩiyũrwo nĩ Roho Mwamũre, makĩaria kiugo kĩa Yahweh marĩ na ũcamba.
Nao andũ arĩa othe meetĩkĩtie maarĩ na ngoro ĩmwe na meciiria o mamwe. Gũtiarĩ mũndũ woigaga atĩ kĩndũ o na kĩrĩkũ kĩa indo ciake nĩ gĩake we mwene, no maahũthagĩra indo ciothe iria maarĩ nacio hamwe.
Nao atũmwo, marĩ na hinya mũingĩ, magĩthiĩ na mbere kũheana ũira wa kũriũka kwa Mwathi Yahshua, na wega mũingĩ wa Yahweh warĩ igũrũ rĩao.
Gũtiarĩ andũ maagaga kĩndũ gatagatĩ-inĩ kao. Nĩgũkorwo ihinda kwa ihinda andũ arĩa maarĩ na ithaka kana nyũmba nĩ maciendagia, makarehe mbeca icio mendetie,
magaciiga magũrũ-inĩ ma atũmwo, nacio ikagaĩrwo mũndũ o mũndũ kũringana na bata wake.
Jusufu, Mũlawii wa kuuma Kuporo, ũrĩa atũmwo meetaga Bar-Anaba (ũguo nĩ kuuga Mũrũ wa Ũũmanĩrĩria),
nĩ endirie gĩthaka gĩake na akĩrehe mbeca icio, agĩciiga magũrũ-inĩ ma atũmwo.