Atũmwo 6
Na rĩrĩ, matukũ-inĩ macio rĩrĩa mũigana wa arutwo wongererekaga-rĩ, Ayahudi amwe arĩa maaciarĩirwo kwa Ayunani nĩ matetirie Ayahudi a Kĩhibirania tondũ atumia ao a ndigwa matiagayagĩrwo irio rĩrĩa ikũgayanwo o mũthenya
Nĩ ũndũ ũcio, atũmwo acio ikũmi na erĩ magĩcokanĩrĩria arutwo othe hamwe na makĩmera atĩrĩ, “Gũtiagĩrĩire tũtiganĩrie ũtungata wa kiugo kĩa Yahweh nĩguo tũtungatage metha-inĩ.
Ariũ na aarĩ a Ithe witũ, thuurai andũ mũgwanja kuuma gatagatĩ-inĩ kanyu, andũ arĩa moĩkaine atĩ nĩ maiyũrĩtwo nĩ Roho, o na ũũgĩ, na nĩ tũkũmehokera wĩra ũcio,
na ithuĩ tũrũmbũiye ũhoro wa mahoya na ũtungata wa kiugo.”
Ũndũ ũcio moigire nĩ wakenirie gĩkundi kĩu gĩothe. Nao magĩthuura Stefano, mũndũ waiyũrĩtwo nĩ wĩtĩkio na Roho Mwamũre, na Filipu, na Porokoro, na Nikanora, na Timoni, na Paramena, na Nikola, mũndũ wa kuuma Antiokia ũrĩa wagarũrũkĩte agatuĩka Mũyahudi.
Makĩneana andũ acio kũrĩ atũmwo, nao atũmwo makĩmahoera na makĩmaigĩrĩra moko.
Nĩ ũndũ ũcio kiugo kĩa Yahweh gĩkĩhunja. Mũigana wa arutwo kũu Yahrushalayim ũkĩongerereka mũno, nakĩo gĩkundi kĩnene kĩa athĩnjĩri-Yahweh gĩgĩathĩkĩra ũhoro wa wĩtĩkio.
Na rĩrĩ, Stefano, mũndũ waiyũrĩtwo nĩ wega wa Yahweh na ũhoti, nĩ ekire morirũ manene na akĩringa ciama gatagatĩ-inĩ ka andũ.
No rĩrĩ, nĩ kuoimĩrire ngarari kuuma kũrĩ andũ a Thunagogi ya Andũ arĩa Oohore (ta ũrĩa yetagwo), nao nĩ Ayahudi a kuuma Kurene na Alekisanderia o hamwe na mabũrũri ma Kilikia na Asia. Andũ aya makĩambĩrĩria gũkararania na Stefano,
no matingĩetiiririe ũũgĩ wake kana Roho ũrĩa aaragia naguo.
Hĩndĩ ĩyo makĩringĩrĩria andũ amwe na hitho moige atĩrĩ, “Nĩ tũiguĩte Stefano akĩaria ciugo cia kũruma Musa, o na Kĩhoti.”
Nĩ ũndũ ũcio magĩtũma okĩrĩrwo nĩ andũ, na athuri, na aandĩki-marũa. Makĩnyita Stefano makĩmũrehe mbere ya Kĩama.
Magĩcoka makĩrehe aira a maheeni, arĩa maarutire ũira makiuga atĩrĩ, “Mũndũ ũyũ ndatigithagĩria kwaria agĩũkagĩrĩra handũ haha hamũre, o na gũũkĩrĩra Watho.
Nĩgũkorwo nĩ tũiguĩte akiuga atĩ Yahshua ũyũ wa Nazarethi nĩ agatharia handũ haha, na agarũre mĩtugo ĩrĩa Musa aatũtigĩire.”
Andũ arĩa othe maarĩ Kĩama-inĩ magĩkũũrĩra Stefano maitho, nao makĩona ũthiũ wake ũtarĩi ta ũthiũ wa mũraika.