Atũmwo 8
Nake Saũlũ aarĩ ho, na agĩĩtĩkĩra atĩ ooragwo.
Andũ etigĩri Yahweh magĩthika Stefano na makĩmũcakaĩra mũno.
No Saũlũ akĩambĩrĩria kwananga Ũngano. Aathiiaga nyũmba o nyũmba, akĩrutũrũraga arũme na andũ-a-nja, akĩmaikagia njera.
Nao andũ arĩa maahurunjĩtwo nĩ mahunjirie kiugo kĩa Yahweh o kũrĩa guothe maathiiaga.
Filipu agĩikũrũka agĩthiĩ itũũra rĩarĩ Samaria, akĩhunjia ũhoro wa Messiya kuo
Rĩrĩa ikundi cia andũ ciaiguire Filipu na ikĩona ciama iria aaringaga, othe magĩthikĩrĩria ũrĩa oigaga.
Maroho mathũku nĩ moimaga andũ aingĩ magĩkayũrũrũkaga, na andũ aingĩ maarũarĩte mũrimũ wa gũkua ciĩga, na andũ arĩa maarĩ onju makĩhonio.
Nĩ ũndũ ũcio gũkĩgĩa na gĩkeno kĩnene itũũra-inĩ rĩu.
Na rĩrĩ, itũũra-inĩ rĩu nĩ kwarĩ na mũndũ wetagwo Simoni, nake nĩ aragũrĩte kwa ihinda na akagegia andũ othe a Samaria. Nake nĩ etĩĩaga na ageetua atĩ aarĩ mũndũ mũnene mũno,
nao andũ othe, arĩa anini na arĩa anene, makamũthikagĩrĩria na makoiga na mũgambo mũnene atĩrĩ, “Mũndũ ũyũ nĩwe hinya wa Kĩhoti.”
Maatũũrĩte mamuumaga thutha tondũ nĩ amagegetie hĩndĩ ndaya na ũragũri wake.
No rĩrĩa meetĩkirie Filipu akĩhunjia Ũhoro-ũrĩa-Mwega wa ũthamaki wa Yahweh na wa rĩĩtwa rĩa Yahshua Messiya-rĩ, makĩbatithio, arũme o hamwe na andũ-a-nja
Simoni we mwene agĩĩtĩkia na akĩbatithio. Nake akĩrũmĩrĩra Filipu kũrĩa guothe aathiiaga, agegetio nĩ imenyithia cia hinya na ciama iria onaga.
Rĩrĩa atũmwo arĩa maarĩ kũu Yahrushalayim maiguire atĩ andũ a Samaria nĩ metĩkĩrĩte kiugo kĩa Yahweh-rĩ, makĩmatũmĩra Kepha na Johana
Nao maakinya kuo, makĩmahoera nĩguo maamũkĩre Roho Mwamũre,
tondũ nginya hĩndĩ ĩyo Roho Mwamũre ndaakoretwo aikũrũkĩire mũndũ o na ũmwe wao; tiga o kũbatithio maabatithĩtio thĩinĩ wa rĩĩtwa rĩa Mwathi Yahshua.
Hĩndĩ ĩyo Kepha na Johana makĩmaigĩrĩra moko, nao makĩamũkĩra Roho Mwamũre.
Rĩrĩa Simoni onire atĩ Roho aaheanagwo na ũndũ wa kũigĩrĩrwo moko nĩ atũmwo-rĩ, akĩenda amahe mbeca,
akiuga atĩrĩ, “Heei ũhoti ũyũ o na niĩ nĩgetha ũrĩa wothe ndaigĩrĩra moko makwa akaamũkĩra Roho Mwamũre.”
Kepha akĩmũcokeria atĩrĩ, “Mbeca ciaku irothiranĩra hamwe nawe, nĩgũkorwo wĩcirĩtie no ũgũre kĩheo kĩa Yahweh na mbeca!
Wee ndũrĩ na handũ, o na ndũrĩ na igai ũtungata-inĩ ũyũ, tondũ ngoro yaku ti njagĩrĩru mbere ya Yahweh
Wĩrire waganu ũyũ na ũhoe Yahweh. Hihi nĩ egũkũrekera nĩ ũndũ wa gũkorwo na rĩciiria ta rĩu ngoro-inĩ yaku
Nĩgũkorwo nguona ũiyũrĩtwo nĩ marũrũ na ũgatuĩka ngombo ya mehia.”
Hĩndĩ ĩyo Simoni akĩmũcokeria atĩrĩ, “Hoerai harĩ Yahweh nĩgetha ndikae gũkorwo nĩ ũndũ o na ũmwe wa macio mwagweta.”
Rĩrĩa maarĩkirie kũheana ũira na kũhunjia kiugo kĩa Yahweh-rĩ, Kepha na Johana magĩcoka Yahrushalayim, o makĩhunjagia Ũhoro-ũrĩa-Mwega tũtũũra-inĩ tũingĩ twa Samaria.
Na rĩrĩ, mũraika wa Yahweh akĩĩra Filipu atĩrĩ, “Thiĩ werekeire gũthini, ũkinye njĩra-inĩ, njĩra ĩrĩa ya werũ-inĩ, ĩrĩa ĩikũrũkĩte kuuma Yahrushalayim ĩgathiĩ nginya Gaza.”
Nĩ ũndũ ũcio akiumagara, na arĩ njĩra-inĩ agĩcemania na Mũhabashi warĩ mũhakũre, mũndũ mũnene warĩ igweta ũrĩa warũgamĩrĩire kĩgĩna gĩa Kandake, mũthamaki-mũndũ-wa-nja wa Ahabashi. Mũndũ ũyũ aathiĩte Yahrushalayim kũhoya Yahweh;
na arĩ njĩra-inĩ akĩinũka, aaikarĩte ngaari-inĩ yake ya mbarathi agĩthoma ibuku rĩa Isaiya ũrĩa mũnabii.
Roho akĩĩra Filipu atĩrĩ, “Thiĩ ngaari-inĩ ĩĩrĩa ya mbarathi ũikare hakuhĩ nayo.”
Hĩndĩ ĩyo Filipu akĩhanyũka nginya ngaari-inĩ ĩyo ya mbarathi, akĩigua mũndũ ũcio agĩthoma ibuku rĩa Isaiya ũrĩa mũnabii, akĩmũũria atĩrĩ, “Nĩ ũrataũkĩrwo nĩ ũhoro ũcio ũrathoma?”
Nake agĩcokia atĩrĩ, “Ingĩtaũkĩrwo atĩa, tiga hagĩire mũndũ wa kũndaarĩria?” Nĩ ũndũ ũcio akĩĩra Filipu ahaice ngaari ĩyo ya mbarathi, aikaranie nake.
Mũndũ ũcio warĩ mũhakũre aathomaga gacunjĩ gaka ka Maandĩko: “Aatwarirwo o ta ngʼondu gĩthĩnjĩro-inĩ, na o ta ũrĩa gatũrũme gakiraga ki karĩ mbere ya mũndũ ũrĩa ũrakenja guoya, noguo o nake ataatumũrire kanua gake.
Nĩ aconorithirio na ndaigana gũtuĩrwo cira na ituĩro irũngĩrĩru. Nũ ũngĩaria ũhoro wa njiaro ciake? Nĩgũkorwo muoyo wake nĩ wehererio ũkiuma gũkũ thĩ.”
Mũndũ ũcio mũhakũre akĩũria Filipu atĩrĩ, “Ndagũthaitha, ta njĩĩra atĩrĩ, mũnabii araaria ũhoro wa ũ, nĩ ũhoro wake we mwene kana nĩ ũhoro wa mũndũ ũngĩ?”
Hĩndĩ ĩyo Filipu akĩrutia ũhoro hau, akĩmũhe Ũhoro-ũrĩa-Mwega ũkoniĩ Yahshua.
Na marĩ njĩra-inĩ magĩthiĩ-rĩ, magĩkinya handũ haarĩ na maĩ, nake mũndũ ũcio warĩ mũhakũre akĩmwĩra atĩrĩ, “Ta rora, maĩ nĩmo maya. Nĩ kĩ kĩngĩgiria mbatithio?”
(Nake Filipu akiuga atĩrĩ, “Ũngĩĩtĩkia na ngoro yaku yothe, no ũbatithio.” Nake agĩcokia atĩrĩ, “Nĩ njĩtĩkĩtie atĩ Yahshua Messiya nĩwe Mũrũ wa Yahweh.)”
Nake agĩathana ngaari ĩyo ya mbarathi ĩrũgame. Hĩndĩ ĩyo Filipu na mũndũ ũcio mũhakũre magĩikũrũka, magĩtonya maĩ-inĩ, nake Filipu akĩmũbatithia.
Na rĩrĩa moimĩrire maĩ-inĩ, Roho wa Yahweh o rĩmwe akĩoya Filipu, akĩmweheria, nake mũndũ ũcio mũhakũre akĩaga kũmuona rĩngĩ, no agĩthiĩ na mbere na rũgendo akenete.
No Filipu nĩ onekanire Azota, na agĩthiĩ akĩhunjagia Ũhoro-ũrĩa-Mwega matũũra-inĩ mothe nginya agĩkinya Kaisarea.