Atũmwo 9
Ihinda-inĩ o rĩu Saũlũ no eehĩtagĩra kũũraga arutwo a Mũhonokia. Agĩthiĩ kũrĩ mũthĩnjĩri-Yahweh ũrĩa mũnene,
na akĩmũhoya marũa athiĩ namo thunagogi-inĩ iria ciarĩ Dameski, nĩgetha angĩkora andũ a Njĩra Ĩyo kuo, marĩ arũme kana andũ-a-nja, amanyite amatware Yahrushalayim marĩ ohe
Na arĩ rũgendo-inĩ aakuhĩrĩria Dameski-rĩ, o rĩmwe ũtheri ũkiuma na igũrũ, ũkĩmwarĩra mĩena yothe
Akĩgũa thĩ, na akĩigua mũgambo ũkĩmwĩra atĩrĩ, “Saũlũ, Saũlũ, ũũnyariraga nĩkĩ?”
Saũlũ akĩũria atĩrĩ, “Nĩwe ũ, Mwathi?” Nake akĩmũcokeria atĩrĩ, “Nĩ niĩ Yahshua ũrĩa ũnyariraga.
No rĩrĩ, rĩu ũkĩra ũtonye itũũra rĩrĩ inene, na nĩ ũkwĩrũo ũrĩa wagĩrĩirũo nĩ gwĩka.”
Nao andũ arĩa maatwaranaga hamwe na Saũlũ makĩrũgama hau maagĩte ũrĩa mangiuga; o nĩ maiguire mũgambo no matiigana kuona mũndũ o na ũrĩkũ.
Nake Saũlũ agĩũkĩra, akĩrũgama, no rĩrĩa aahingũririe maitho ndoonaga o na hanini. Nĩ ũndũ ũcio makĩmũnyita guoko makĩmũtwara Dameski
Ihinda rĩa matukũ matatũ aarĩ mũtumumu, na ndarĩ kĩndũ aarĩĩaga kana akanyua.
Na rĩrĩ, kũu Dameski nĩ kwarĩ na mũrutwo wetagwo Anania. Yahshua akĩmwarĩria na kĩoneki, akĩmwĩra atĩrĩ, “Anania!” Nake agĩcokia atĩrĩ, “Niĩ ũyũ Mwathi.”
Nake Yahshua akĩmwĩra atĩrĩ, “Thiĩ kwa Yahuda o kũu njĩra ĩrĩa ĩtagwo Nũngarũ, ũrie mũndũ uumĩte Tariso wĩtagwo Saũlũ, nĩ ũndũ nĩ kũhoya arahoya
Nĩ onete mũndũ kĩoneki-inĩ wĩtagwo Anania agĩũka kũmũigĩrĩra moko, nĩguo acoke kuona.”
Anania akĩmũcokeria atĩrĩ, “Mwathi, nĩ njiguĩte ũhoro mũingĩ ũkoniĩ mũndũ ũcio, na maũndũ maingĩ mooru marĩa aaneka andũ aku arĩa aamũre kũũrĩa Yahrushalayim.
Na okĩte gũkũ arĩ na wathani kuuma kũrĩ athĩnjĩri-Yahweh arĩa anene, nĩgetha anyite andũ arĩa othe makayagĩra rĩĩtwa rĩaku.”
No Yahshua akĩĩra Anania atĩrĩ, “Thiĩ, tondũ mũndũ ũcio nĩ kĩndũ gĩakwa kĩrĩa ndĩĩthuurĩire gĩa gũtwara ũhoro wa rĩĩtwa rĩakwa kũrĩ andũ-a-Ndũrĩrĩ, na athamaki, o na kũrĩ andũ a Isiraeli.
Nĩ ngũmuonia ũrĩa arĩ o nginya anyamaarĩke nĩ ũndũ wa rĩĩtwa rĩakwa.”
Hĩndĩ ĩyo Anania agĩthiĩ na agĩtonya nyũmba ĩyo. Akĩigĩrĩra Saũlũ moko, akĩmwĩra atĩrĩ, “Saũlũ, mũrũ wa Ithe witũ, Mwathi, o we Yahshua ũrĩa ũrakuumĩrĩire ũrĩ njĩra-inĩ ũgĩũka gũkũ, nĩ andũmĩte nĩguo ũcoke kuona, na ũiyũrio na Roho Mwamũre.”
O hĩndĩ ĩyo, tũnyamũ twahaanaga ta ngaracũ tũkiuma maitho-inĩ ma Saũlũ, tũkĩgũa thĩ, nake akĩhota kuona rĩngĩ. Agĩũkĩra na akĩbatithio,
O na aarĩkia kũrĩa irio, akĩgĩa na hinya. Saũlũ agĩikara mĩthenya ĩigana ũna marĩ hamwe na arutwo kũu Dameski.
Na hĩndĩ ĩyo akĩambĩrĩria kũhunjia thunagogi-inĩ atĩ Yahshua nĩ Mũrũ wa Yahweh.
Andũ othe arĩa maamũiguire makĩgega makĩũria atĩrĩ, “Githĩ mũndũ ũyũ tiwe ũraagithĩtie andũ thayũ kũu Yahrushalayim gatagatĩ-inĩ ka arĩa makayagĩra rĩĩtwa rĩu? Na githĩ ndokĩte gũkũ nĩgetha amanyite amatware marĩ ohe kũrĩ athĩnjĩri-Yahweh arĩa anene?”
Nowe Saũlũ agĩkĩrĩrĩria kũgĩa na hinya, na akĩgegia Ayahudi arĩa maatũũrĩte kũu Dameski na ũndũ wa kũmaiguithia na ma atĩ Yahshua nĩwe Messiya.
Thutha wa mĩthenya mĩingĩ gũthira, Ayahudi magĩcokania ndundu mamũũrage,
no Saũlũ akĩmenya mũbango ũrĩa maarĩ naguo. Mũthenya na ũtukũ maaikaraga mamuoheirie ihingo-inĩ cia itũũra inene nĩguo mamũũrage.
No arutwo makĩmuoya ũtukũ, makĩmũharũrũkia arĩ gĩkabũ-inĩ mamũgereirie mwanya warĩ rũthingo-inĩ.
Hĩndĩ ĩrĩa aakinyire Yahrushalayim, akĩgeria kwĩgwatania na arutwo, no othe nĩ mamwĩtigagĩra, tondũ matietĩkagia atĩ kũna aarĩ mũrutwo.
No Bar-Naba akĩmuoya akĩmũtwara kũrĩ atũmwo. Akĩmera ũrĩa Saũlũ oonire Yahshua arĩ rũgendo-inĩ rwake, na ũrĩa Yahshua aamwarĩirie, na ũrĩa aahunjirie kũu Dameski thĩinĩ wa rĩĩtwa rĩa Yahshua ategwĩtigĩra
Nĩ ũndũ ũcio Saũlũ agĩikara na atũmwo, na agaceeraga kũu Yahrushalayim, akĩaragia na ũcamba thĩinĩ wa rĩĩtwa rĩa Yahshua, ategwĩtigĩra.
Ningĩ nĩ aaragia na agakararanagia na Ayahudi arĩa maaciarĩirwo kwa Ayunani, no nao makageria ũrĩa mangĩmũũraga.
Rĩrĩa ariũ na aarĩ a Ithe witũ maamenyire ũguo, makĩmuoya, makĩmũikũrũkia nginya Kaisarea, makĩmũtũma Tariso.
Hĩndĩ ĩyo Ũngano wa Yahuda guothe, na Galili, na Samaria ũgĩkenera ihinda rĩa thayũ. Nĩ wongereirwo hinya; na ũkĩũmĩrĩrio nĩ Roho Mwamũre, na ũkĩongererwo andũ, nao magĩtũũra metigĩrĩte Yahweh.
Na rĩrĩ, rĩrĩa Kepha aaceeraga kũndũ na kũndũ bũrũri-inĩ, nĩ athiire gũceerera andũ arĩa aamũre a kũu Lida
Arĩ kũu agĩkora mũndũ wetagwo Ainea warĩ na mũrimũ wa gũkua ciĩga, na aatũũrĩte akomete gĩtanda-inĩ ihinda rĩa mĩaka ĩnana.
Kepha akĩmwĩra atĩrĩ, “Ainea, Yahshua Messiya nĩ akũhonia. Ũkĩra ũkũnje kĩbarĩ gĩaku.” O hĩndĩ ĩyo Ainea akĩrũgama.
Andũ othe arĩa maatũũraga Lida na Sharoni makĩmuona na makĩgarũrũkĩra Yahweh.
Kũu Jopa nĩ kwarĩ mũrutwo wetagwo Tabitha (narĩo rĩĩtwa rĩu rĩgĩtaũrwo nĩ kuuga Dorokasi), nake aatũũrĩte ekaga maũndũ mega, na agateithagia athĩni.
O ihinda-inĩ rĩu nĩ arũarire na agĩkua, naguo mwĩrĩ wake ũgĩthambio, ũkĩigwo nyũmba ya igũrũ.
Lida kwarĩ hakuhĩ na Jopa; nĩ ũndũ ũcio rĩrĩa arutwo maaiguire atĩ Kepha aarĩ kũu Lida, magĩtũma andũ erĩ makamũringĩrĩrie mamwĩre atĩrĩ, “Twagũthaitha ũka narua!”
Nake Kepha agĩthiĩ hamwe nao, na aakinya agĩtwarwo nyũmba ya igũrũ. Atumia othe a ndigwa makĩrũgama, makĩmũthiũrũrũkĩria makĩrĩraga, na makĩmuonagia kanjũ na nguo ingĩ iria Tabitha aatumĩte rĩrĩa aarĩ nao.
Nake Kepha akĩmera othe moime nja ya nyũmba; agĩcoka agĩturia maru akĩhoya Yahweh. Agĩcoka akĩgarũrũkĩra mũndu-wa-nja ũcio wakuĩte, akĩmwĩra atĩrĩ, “Tabitha, ũkĩra,” nake Tabitha akĩhingũra maitho, na oona Kepha, agĩĩtiira
Nake Kepha akĩmũnyita guoko, akĩmũrũgamia. Agĩcoka agĩĩta andũ arĩa meetĩkĩtie, na atumia acio a ndigwa, akĩmũneana kũrĩ o arĩ muoyo
Naguo ũhoro ũcio ũkĩmenyeka Jopa guothe, nao andũ aingĩ magĩĩtĩkia Yahweh.
Nake Kepha agĩikara Jopa mĩthenya mĩingĩ kwa mũndũ wetagwo Simoni, ũrĩa warĩ mũtanduki wa njũa.