Ezara 6

Hĩndĩ ĩyo nĩrĩo Mũthamaki Dario aarutire watho, na gũgĩĩkwo ũthuthuria nyũmba-inĩ ya kũiga mĩthithũ kũrĩa indo cia bata ciaigagwo kũu Babuloni

Na gũkĩoneka gĩkũnjo nyũmba-inĩ njirigĩre thĩinĩ wa itũũra rĩa Ekibatana, gĩcigo kĩa bũrũri wa Media, na ndũmĩrĩri ĩno nĩyo yaandĩkĩtwo gĩkũnjo-inĩ kĩu:

“Mwaka-inĩ wa mbere wa Mũthamaki Kurusu, Mũthamaki Kurusu nĩ aarutire watho ũyũ wĩgiĩ nyũmba ya Kĩhoti thĩinĩ wa Yahrushalayim: ‘Nyũmba ĩyo nĩ yakwo rĩngĩ, nĩgetha marutagĩre magongona ho, na mĩthingi yayo yakwo; ũraihu wa nyũmba ĩyo ũkorũo ũrĩ mĩkono 60, naguo wariĩ wayo mĩkono 60,

ĩkorũo na mahiga manene mĩhari ĩtatũ na mbaũ mũhari ũmwe; na mahũthĩro marĩhwo kuuma nyũmba-inĩ ya mũthamaki

Ningĩ, indo cia thahabu na betha cia nyũmba ya Kĩhoti iria Nebukadineza ooete hekarũ-inĩ ĩrĩa yarĩ Yahrushalayim agacirehe Babuloni icokio, nĩgetha ciigwo harĩa ciagĩrĩirũo gũkorũo hekarũ-inĩ thĩinĩ wa Yahrushalayim na ciigwo nyũmba-inĩ ya Kĩhoti.’

“Kwoguo-rĩ, wee Tatenai ngavana wa gĩcigo kĩa Mũrĩmo wa Rũũĩ, Shetharu-bozenai, na acio angĩ mũrĩ nao, anini a ngavana a gĩcigo kĩa Mũrĩmo wa Rũũĩ—ikarai kũraya na kũu

Mũtikaingĩrĩre wĩra wa nyũmba ĩyo ya Kĩhoti. Ngavana wa Ayahudi o hamwe na athuri a Ayahudi nĩ megwaka rĩngĩ nyũmba ĩyo ya Kĩhoti o harĩa yarĩ

Ningĩ-rĩ, nĩ ndaruta watho wĩgiĩ ũrĩa mũgwĩka harĩ athuri acio a Ayahudi nĩguo maake rĩngĩ nyũmba ĩyo ya Kĩhoti: Kuuma kĩgĩna-inĩ kĩa mũthamaki, kuuma harĩ mbeca cia igooti iria ciũnganagio gĩcigo kĩa Mũrĩmo wa Rũũĩ, mahũthĩro magĩrĩirũo kũnengerũo athuri acio na ihenya nĩguo mathiĩ na mbere matekũhĩngĩcĩka

Na kĩrĩa gĩothe mekũbatara, tũtegwa o hamwe na ndũrũme na tũgondu, cia kũrutĩra Kĩhoti wa igũrũ magongona ma njino, ngano, cumbĩ, ndibei, na maguta, o ta ũrĩa athĩnjĩri-Yahweh arĩa marĩ Yahrushalayim mariugaga, manengagĩrũo indo icio mũthenya o mũthenya itekwaga,

nĩgetha hĩndĩ ciothe marutage magongona marĩa makenagia Kĩhoti wa igũrũ na makahoera ũtũũro wa mũthamaki o na wa ariũ ake

Ningĩ nĩ ndaruta watho atĩ mũndũ o na ũrĩkũ ũgũkararia watho ũyũ, rũbaũ rũkũũrũo nyũmba-inĩ yake na rũrũgamio ohererũo harĩ ruo, nayo nyũmba yake ĩtuuo kĩoro kĩa mũingĩ nĩ ũndũ wa kuuna watho ũcio

Nake Kĩhoti ũrĩa ũtũmĩte rĩĩtwa rĩake rĩkorũo kũu aroeheria mũthamaki o wothe o na andũ arĩa mangĩoya guoko na igũrũ maregane na watho ũyũ na mathũkangie nyũmba ĩyo ya Kĩhoti, ĩrĩa ĩrĩ Yahrushalayim. Niĩ Dario, nĩ niĩ ndaruta watho ũyũ. Nĩ ũhingio o na ihenya.”

Nake Tatenai ngavana wa gĩcigo kĩa Mũrĩmo wa Rũũĩ, Shetharu-bozenai, na acio angĩ maarĩ nao, makĩhingia o na ihenya maũndũ marĩa mothe maathanĩtwo nĩ Mũthamaki Dario

Nao athuri a Ayahudi magĩthiĩ na mbere gwaka na gũtwarithia wĩra ũcio na mbere, magĩĩkĩrũo hinya nĩ ũrathi wa mũnabii Hagai na Zakaria mũcũkũrũ wa Ido; magĩkĩrĩkia kũmĩaka nĩ ũndũ wa watho wa Kĩhoti wa Isiraeli na nĩ ũndũ wa watho wa Kurusu, na Dario na Mũthamaki Aritashashita wa Perisia

Maarĩkirie nyũmba ĩyo mũthenya wa gatatũ wa mweri wa Adari, mwaka-inĩ wa gatandatũ wa wathani wa Mũthamaki Dario.

Thutha ũcio andũ a Isiraeli, athĩnjĩri-Yahweh, Alawii, na andũ acio angĩ mooimĩte ithamĩrio makĩrugũria nyũmba ĩyo ya Kĩhoti marĩ na gĩkeno

Na nĩ ũndũ wa kũrugũria nyũmba ĩyo ya Kĩhoti, makĩruta ndegwa 100, ndũrũme 200, tũgondu 400, na thenge 12 irĩ igongona rĩa mehia nĩ ũndũ wa andũ a Isiraeli othe, kũringana na mũigana wa mĩhĩrĩga ya Isiraeli

Na magĩthuura athĩnjĩri-Yahweh kũringana na ikundi ciao na Alawii kũringana na ikundi ciao cia ũtungata wa Kĩhoti thĩinĩ wa Yahrushalayim, o ta ũrĩa kwandĩkĩtwo ibuku-inĩ rĩa Musa.

Na andũ acio arĩa mooimĩte ithamĩrio magĩkũngũĩra Bathaka mũthenya wa 14 wa mweri wa mbere

Na athĩnjĩri-Yahweh, na Alawii hatarĩ o na ũmwe watigĩrĩirũo, nĩ meyamũrĩire Yahweh, kwoguo othe matiarĩ na thahu; magĩthĩnja nyamũ ya igongona rĩa Bathaka nĩ ũndũ wa andũ acio othe mooimĩte ithamĩrio, na nĩ ũndũ wa athĩnjĩri-Yahweh arĩa angĩ, na nĩ ũndũ wao ene

Nao andũ a Isiraeli acio mooimĩte ithamĩrio makĩmĩrĩa, o hamwe na mũndũ wothe wanyitanĩire nao na akeyamũrania na mĩtugo ĩrĩ thahu ya ndũrĩrĩ cia bũrũri ũcio nĩguo athathayie Yahweh Kĩhoti wa Isiraeli

Ningĩ ihinda rĩa thikũ mũgwanja magĩkũngũĩra Gĩathĩ kĩa Mĩgate Ĩtarĩ Mĩimbie makenete, tondũ Yahweh nĩ aatũmĩte makene na agatũma metĩkĩrĩke ngoro-inĩ ya mũthamaki wa Ashuri, na akamanyita mbaru wĩra-inĩ ũcio wa nyũmba ya Kĩhoti ũrĩa wa ma, o we Kĩhoti wa Isiraeli.