Gũcokerithia Maathani 10

“Na hĩndĩ ĩyo Yahweh akĩnjĩra atĩrĩ, ‘Icũhia ihengere igĩrĩ cia mahiga ta iria cia mbere, na wambate ũũke kũrĩ niĩ kĩrĩma-inĩ; ningĩ nĩ wagĩrĩirũo gũthondeka ithandũkũ rĩa mbaũ

Na niĩ nĩ ngwandĩka ihengere-inĩ icio ciugo o ta iria ciarĩ ihengere-inĩ iria cia mbere, iria woragire, nawe ũciige thĩinĩ wa ithandũkũ rĩu.’

Nĩ ũndũ ũcio ngĩthondeka ithandũkũ rĩa mbaũ cia mũgaa na ngĩicũhia ihengere igĩrĩ cia mahiga o ta iria cia mbere na ngĩambata kĩrĩma-inĩ nguuĩte ihengere icio igĩrĩ na guoko

Nake akĩandĩka ihengere-inĩ icio ciugo iria aandĩkĩte hau kabere, Maathani Marĩa Ikũmi, marĩa Yahweh aamũmenyithĩtie mũrĩ kĩrĩma-inĩ kuuma mwaki-inĩ mũthenya ũrĩa mwagomanĩte; na Yahweh akĩĩnengera ihengere icio

Ngĩcoka ngĩikũrũka kuuma kĩrĩma-inĩ na ngĩiga ihengere icio ithandũkũ-inĩ rĩrĩa ndathondekete, na noho irĩ nginya rĩu, o ta ũrĩa Yahweh aanjathire.

“Ciana cia Isiraeli igĩcoka ikiuma Beerothu Bene-jaakani igĩthiĩ Mosera. Kũu nĩkuo Haruni aakuĩrĩire na agĩthikwo, na mũrũwe Eliazaru akĩambĩrĩria gũtungata arĩ mũthĩnjĩri-Yahweh handũ-inĩ hake

Ikiuma kũu igĩthiĩ Gudugoda, igĩcoka ikiuma Gudugoda igĩthiĩ Jotibatha, bũrũri ũthereraga tũrũũĩ twa maĩ.

“Ihinda-inĩ rĩu Yahweh agĩthuura mũhĩrĩga wa Lawii nĩguo makuuage ithandũkũ rĩa kĩrĩkanĩro kĩa Yahweh, marũgamage mbere ya Yahweh nĩgetha mamũtungatagĩre, na marathimanage na rĩĩtwa rĩake, o ta ũrĩa mekaga nginya ũmũthĩ

Nĩkĩo Lawii atarĩ gĩcunjĩ kana igai hamwe na ariũ a ithe. Yahweh nĩwe igai rĩake, o ta ũrĩa Yahweh Kĩhoti waku aamwĩrire

Niĩ mwene ndaikarire kĩrĩma-inĩ o ta ũrĩa ndekĩte mbere ĩyo, matukũ 40 ũtukũ na mũthenya, na Yahweh agĩĩthikĩrĩria hĩndĩ ĩyo o nayo. Yahweh ndeendaga kũmũniina

Yahweh agĩcoka akĩnjĩra atĩrĩ, ‘Thiĩ ũrĩ mbere ya andũ aya, na mwĩhaarĩrie kuumagara, nĩguo maingĩre megwatĩre bũrũri ũrĩa ndehĩtire kũrĩ maithe mao ma tene atĩ nĩ ngaamahe.’

“Atĩrĩrĩ, wee Isiraeli, nĩ ũndũ ũrĩkũ Yahweh Kĩhoti waku arenda kuuma kũrĩ wee? No ũndũ ũyũ tu: wĩtigagĩre Yahweh Kĩhoti waku, ũrũmagĩrĩre njĩra ciake ciothe, ũmwendage, ũtungatagĩre Yahweh Kĩhoti waku na ngoro yaku yothe na muoyo waku wothe,

na ũrũmagie maathani na mawatho ma Yahweh marĩa ndĩragwatha ũmũthĩ nĩguo maũndũ maku mathiage wega

Atĩrĩrĩ, igũrũ rĩothe nĩ rĩa Yahweh Kĩhoti waku, o nginya igũrũ rĩrĩa rĩrĩ igũrũ biũ, hamwe na thĩ na kĩrĩa gĩothe kĩrĩ thĩinĩ wayo

Ĩndĩ maithe manyu ma tene no o tu Yahweh aakuhĩrĩirie na akĩmonia wendo wake, na nĩ amũthuurĩte inyuĩ, rũciaro rwao, kuuma harĩ ikundi ciothe cia andũ, o ta ũrĩa mũtariĩ ũmũthĩ

No mũhaka mũruithie ikonde cia ngoro cianyu na mũtige kũrema

Nĩ gũkorũo Yahweh Kĩhoti wanyu nĩ Kĩhoti ũkĩrĩte ihoti iria ingĩ ciothe na nĩ Mwathi wa aathi, Kĩhoti mũnene, ũrĩ hinya, na wa magegania, ũtarĩ mũthutũkanio na ndetĩkagĩra ihaki

Nĩ atuaga ciira wa mwana ũtarĩ ithe na wa mũtumia wa ndigwa na kĩhooto na nĩ endete mũndũ wa kũngĩ, akamũhe irio na nguo cia kwĩhumba

O na inyuĩ no mũhaka mwendage mũndũ wa kũngĩ, nĩ gũkorũo o na inyuĩ mwatũire mũrĩ ageni bũrũri-inĩ wa Misiri.

“Wagĩrĩirũo gwĩtigĩra Yahweh Kĩhoti waku, na nĩwe wagĩrĩirũo gũtungatĩra, na wagĩrĩirũo kwĩgwatania nake, na wagĩrĩirũo kwĩhĩta na rĩĩtwa rĩake

Nĩwe wagĩrĩirũo kũgooca. Nĩwe Kĩhoti waku, o we ũrĩa ũgwĩkĩire maũndũ macio mothe manene na ma kũgegania marĩa wĩyoneire na maitho maku

Maithe manyu ma tene maaikũrũkire Misiri marĩ andũ 70, na rĩu Yahweh Kĩhoti waku nĩ atũmĩte ũingĩhe o ta njata cia igũrũ.