Gũcokerithia Maathani 12

“Maya nĩ mawatho na matuĩro ma ciira marĩa mwagĩrĩirũo kũrũmagĩrĩra na kinyi matukũ-inĩ marĩa mothe mũgũtũũra bũrũri-inĩ ũrĩa Yahweh Kĩhoti wa maithe manyu ma tene ekũmũhe mwĩgwatĩre

Mwagĩrĩirũo gũkaananga kũndũ guothe kũrĩa ndũrĩrĩ iria mũkeegwatĩra bũrũri wacio itungatagĩra ihoti ciacio, o na angĩkorũo nĩ irĩma-inĩ ndaya kana tũrĩma-inĩ kana rungu rwa mũtĩ o wothe mũruru

Mwagĩrĩirũo gũgaatharia igongona ciacio, mwanange itugĩ ciacio cia kũhoywo, na mũcine mĩtĩ yacio ya kũhoywo, na mũtemange mĩhianano ya gwacũhio ya ihoti ciacio, mũniine marĩĩtwa ma cio kũu.

“Mũtikanathathaiye Yahweh Kĩhoti wanyu na njĩra ta ĩyo

Handũ ha ũguo, caragiai Yahweh Kĩhoti wanyu harĩa hothe arĩthuuraga rĩĩtwa rĩake rĩkoragwo ho na handũ hake ha gũikara gatagatĩ-inĩ ka mĩhĩrĩga yanyu yothe, mũgathiaga ho

Hau nĩho mũrĩtwaraga magongona manyu ma njino, maruta manyu, icunjĩ cianyu cia ikũmi, mĩhothi kuuma moko-inĩ manyu, magongona manyu ma mĩĩhĩtwa, magongona manyu ma kwĩyendera, na marigithathi ma rũũru rwanyu rwa ng’ombe na ma rũũru rwanyu rwa mbũri kana ng’ondu

No mũhaka inyuĩ hamwe na andũ a nyũmba cianyu mũkarĩagĩra handũ hau mũrĩ mbere ya Yahweh Kĩhoti wanyu na mũgakenagĩra maũndũ mothe marĩa mũreka, tondũ Yahweh Kĩhoti wanyu nĩ amũrathimĩte.

“Mũtikaneke ta ũrĩa ũmũthĩ tũreka gũkũ, o mũndũ gwĩka ũrĩa arona kwagĩrĩire maitho-inĩ make,

tondũ mũtirĩ mũrakinya kũrĩa kũrĩ na ũhurũko na igai-inĩ rĩrĩa Yahweh Kĩhoti wanyu aramũhe

Rĩrĩa mũkaaringa Jorodani na mũikare bũrũri-inĩ ũrĩa Yahweh Kĩhoti wanyu aramũhe mwĩgwatĩre, hatarĩ nganja nĩ akaamũhe ũhurũko kuuma kũrĩ thũ cianyu ciothe iria igaakorũo imũthiũrũrũkĩirie, na nĩ mũgaaikaraga mũrĩ na ũgitĩri

Indo icio ciothe ndĩramwatha ũhoro wacio mũgaacitwaraga handũ hau Yahweh Kĩhoti wanyu agaathuura rĩĩtwa rĩake rĩkoragwo ho—magongona manyu ma njino, maruta manyu, icunjĩ cianyu cia ikũmi, mĩhothi kuuma moko-inĩ manyu, na igongona o rĩothe rĩa mwĩhĩtwa ũrĩa ũrĩĩhĩtaga harĩ Yahweh

Mwagĩrĩirũo gũgaakenaga mũrĩ mbere ya Yahweh Kĩhoti wanyu, mũrĩ hamwe na ariũ anyu, aarĩ anyu, ngombo cianyu cia arũme na cia atumia, o hamwe na Mũlawii ũrĩa ũrĩ thĩinĩ wa matũũra manyu, nĩ gũkorũo ndarĩ gĩcunjĩ kana igai agaĩirũo hamwe na inyuĩ

Wĩmenyagĩrĩre ndũkanarutĩre magongona maku ma njino kũndũ kũngĩ o guothe ũkoona

Wagĩrĩirũo kũrutĩra magongona maku handũ harĩa tu Yahweh agaathuura thĩinĩ wa gĩcigo kĩmwe harĩ icigo ciothe cia mũhĩrĩga wanyu, na hau nĩho ũrĩkagĩra maũndũ mothe marĩa ndĩragwatha.

“Ĩndĩ rĩrĩa rĩothe werirĩria kũrĩa nyama, no ũthĩnje na ũrĩe nyama ĩyo, kũringana na ũrĩa Yahweh Kĩhoti waku akũrathimĩte, matũũra-inĩ manyu mothe. Mũndũ ũrĩ na thahu na ũrĩa ũtarĩ na thahu no arĩe nyama ĩyo, o ta ũrĩa ũngĩrĩa thiya kana thwariga

No mũtiagĩrĩirũo kũrĩa thakame; wagĩrĩirũo kũmĩita thĩ o ta maĩ

No gĩcunjĩ gĩa ikũmi kĩa mũtu waku, kĩa ndibei yaku ya mũhihano, kĩa maguta maku, na marigithathi ma rũũru rwaku rwa ng’ombe kana ma rũũru rwaku rwa mbũri kana ng’ondu, igongona o rĩothe rĩa mwĩhĩtwa ũrĩa ũrĩĩhĩtaga, na magongona maku ma kwĩyendera, kana mĩhothi kuuma guoko-inĩ gwaku, ndũgeetĩkĩrio gũcirĩĩra thĩinĩ wa matũũra manyu

Wagĩrĩirũo kũrĩĩra indo icio mbere ya Yahweh Kĩhoti waku ũrĩ harĩa Yahweh Kĩhoti waku agaathuura—wee na mũrũguo, mwarĩguo, ngombo yaku ya mũndũrũme na ya mũndũ-wa-nja, o hamwe na Mũlawii ũrĩa ũrĩ thĩinĩ wa matũũra manyu; na ũkenere maũndũ marĩa mothe ũgaakorũo ũgĩka, ũrĩ mbere ya Yahweh Kĩhoti waku

Wĩmenyagĩrĩre ndũkanatiganĩrie Mũlawii ihinda rĩrĩa rĩothe ũgaatũũra bũrũri-inĩ wanyu.

“Rĩrĩa Yahweh Kĩhoti waku akaararamia bũrũri waku, o ta ũrĩa akwĩrĩire, na uuge atĩrĩ, ‘Nĩ ndĩrenda kũrĩa nyama,’ tondũ nĩ ũrerirĩria kũrĩa nyama, no ũrĩe nyama rĩrĩa rĩothe wamĩĩrirĩria

Angĩkorũo handũ harĩa Yahweh Kĩhoti waku athuurĩte rĩĩtwa rĩake rĩkoragwo ho nĩ haraihu nawe, wagĩrĩirũo gũthĩnja nyamũ kuuma rũũru-inĩ rwaku rwa ng’ombe kana rũũru-inĩ rwaku rwa mbũri kana ng’ondu rũrĩa Yahweh akũheete, o ta ũrĩa ngwathĩte, na wagĩrĩirũo kũrĩĩra nyama ĩyo thĩinĩ wa matũũra manyu rĩrĩa rĩothe wamĩĩrirĩria

Ũrĩmĩrĩaga o ta ũrĩa ũngĩrĩa thiya kana thwariga; mũndũ ũrĩ na thahu na ũrĩa ũtarĩ na thahu no marĩe nyama ĩyo

No wagĩrĩirũo gũtua itua irũmu rĩa kwaga kũrĩa thakame, tondũ thakame nĩyo muoyo, na ndwagĩrĩirũo kũrĩanĩria nyama na muoyo wayo

Ndũkanamĩrĩe. Wagĩrĩirũo kũmĩita thĩ o ta maĩ

Ndũkanamĩrĩe, nĩgetha maũndũ maku mathiĩ wega o hamwe na ciana ciaku iria igooka thutha waku, tondũ wa gwĩka ũrĩa kwagĩrĩire maitho-inĩ ma Yahweh

Na harĩ indo iria nyamũre, wagĩrĩirũo kuoya o ciaku tu hamwe na magongona maku ma mwĩhĩtwa, rĩrĩa woka handũ harĩa Yahweh agaathuura

Hau nĩho ũkaarutagĩra magongona maku ma njino, nyama o hamwe na thakame, igũrũ rĩa kĩgongona kĩa Yahweh Kĩhoti waku, thakame ya magongona maku yagĩrĩire gũitagwo hau mwena-inĩ wa kĩgongona kĩa Yahweh Kĩhoti waku, no nyama ciamo no ũrĩe.

“Wĩmenyerere ũgathĩkagĩra ciugo ici ciothe ndĩragwatha, nĩgetha maũndũ maku magathiaga wega hingo ciothe, o hamwe na ma ariũ aku arĩa magooka thutha waku, tondũ wa gwĩka ũndũ ũrĩa mwega na ũndũ ũrĩa wagĩrĩire maitho-inĩ ma Yahweh Kĩhoti waku.

“Rĩrĩa Yahweh Kĩhoti waku akaaniina ndũrĩrĩ ciothe cia bũrũri ũrĩa ũkeegwatĩra, na wambĩrĩrie gũikara bũrũri-inĩ wacio,

ũkeemenyerera nĩguo ndũkanagwe mũtego-inĩ thutha wacio kũniinwo ciehere mbere yaku. Ndũkanorĩrĩrie ũhoro wa ihoti ciacio uuge atĩrĩ, ‘Hihi ndũrĩrĩ icio ciatungatagĩra ihoti ciacio atĩa? O na niĩ noguo ngwĩka.’

Ndũkaneke ũguo harĩ Yahweh Kĩhoti waku, tondũ ciĩkagĩra ihoti ciacio maũndũ mothe marĩ magigi marĩa Yahweh athũire, nginya gũcina ariũ a cio na aarĩ a cio na mwaki marĩ magongona ma ihoti ciacio

Maũndũ marĩa mothe ndĩramwatha nĩmo mwagĩrĩirũo gũtigagĩrĩra nĩ mweka. Mũtikanongerere ũndũ harĩ mo kana mũrutarute ũndũ kuuma harĩ mo.