Gũcokerithia Maathani 13

“Kũngĩkagĩa mũnabii kana mũroti ũkwĩyumĩria gatagatĩ-inĩ gaku na akũhe kĩmenyithia kana ũhoro wĩgiĩ ũndũ mũna wa magegania,

nakĩo kĩmenyithia kĩu kana ũrirũ ũcio akwĩrĩte ũngĩhinga, na oige atĩrĩ, ‘Nĩ tũrũmĩrĩre ihoti ingĩ, ihoti iria ũtoĩ, na tũcitungatĩre,’

ndwagĩrĩirũo gũthikĩrĩria ciugo cia mũnabii ũcio kana mũroti ũcio, nĩ gũkorũo Yahweh Kĩhoti wanyu nĩ kũmũgeria aramũgeria nĩguo amenye kana nĩ mwendete Yahweh Kĩhoti wanyu na ngoro yanyu yothe na muoyo wanyu wothe

Mwagĩrĩirũo kũrũmagĩrĩra Yahweh Kĩhoti wanyu, nĩwe mwagĩrĩirũo gwĩtigagĩra, maathani make nĩmo mwagĩrĩirũo kũrũmagia, na mwagĩrĩirũo gũthikagĩrĩria mũgambo wake; nĩwe mwagĩrĩirũo gũtungatagĩra, na nĩwe mwagĩrĩirũo kwĩgwatania nake

No mũnabii ũcio kana mũroti ũcio agĩrĩire kũũragwo, tondũ nĩ gũtheremia aratheremia ũremi kwerekera Yahweh Kĩhoti wanyu—o we ũrĩa wamũrutire bũrũri-inĩ wa Misiri na akĩmũkũũra kuuma nyũmba-inĩ ya ũkombo—nĩguo akũgarũre ũtige kũrũmĩrĩra njĩra ĩrĩa Yahweh Kĩhoti waku agwathĩte ũrũmagĩrĩre. Na no mũhaka weherie kĩndũ kĩũru gatagatĩ-inĩ gaku.

“Mũndũ mũciaranĩirũo nake, mũrũ wa nyũkwa, kana mũrũguo kana mwarĩguo kana mũtumia waku ũrĩa wendete mũno kana mũrata waku ũrĩa wa hakuhĩ mũno angĩgeria gũkũheenereria na hitho, akwĩre atĩrĩ, ‘Nĩ tũthiĩ tũgatungatĩre ihoti ingĩ,’ ihoti iria wee ũtoĩ o na kana maithe manyu ma tene magacimenya,

kuuma harĩ ihoti cia ikundi cia andũ arĩa mamũthiũrũrũkĩirie mĩena yothe, arĩa marĩ hakuhĩ nawe kana arĩa marĩ kũraihu nawe, kuuma mũico ũmwe wa bũrũri o nginya mũico ũrĩa ũngĩ wa bũrũri,

ndwagĩrĩirũo gwĩtĩkania nake kana kũmũthikĩrĩria, o na ndwagĩrĩirũo kũmũiguĩra tha kana kũmũcaĩra o na kana kũmũgitĩra;

ithenya rĩa ũguo, wagĩrĩirũo kũmũũraga. Guoko gwaku nĩkuo kwagĩrĩirũo gũkorũo kũrĩ kwa mbere kũmũũkĩrĩra nĩguo ũmũũrage, gũcoke kũrũmĩrĩrũo nĩ moko ma andũ acio angĩ othe

Na no mũhaka ũmũhũũre na mahiga nginya akue, tondũ nĩ ageretie gũkũgarũra weherere Yahweh Kĩhoti waku, o we ũrĩa wakũrutire bũrũri-inĩ wa Misiri, agĩkũruta nyũmba-inĩ ya ũkombo

Nacio ciana ciothe cia Isiraeli nĩ cikũigua ũhoro ũcio na ciĩtigĩre, na itigeeka ũndũ mũũru ta ũcio rĩngĩ gatagatĩ-inĩ gaku.

“Ũngĩkaigua itũũra-inĩ rĩmwe rĩa marĩa Yahweh Kĩhoti waku akũheete ũikarage gũkĩrũo atĩrĩ,

‘Andũ matarĩ kĩene kuuma gatagatĩ-inĩ kanyu nĩ mathiĩte nĩguo makahĩtithie aikari a itũũra rĩao, makiugaga ũũ: “Nĩ tũthiĩi tũgatungatĩre ihoti ingĩ,” ihoti iria mũtoĩ,’

wagĩrĩirũo gũtuĩria ũhoro ũcio, ũthuthurie na kinyi na ũrĩrĩrie; na kũngĩtuĩka atĩ nĩ ma ũndũ ũcio ũrĩ magigi nĩ wĩkĩtwo gatagatĩ-inĩ gaku-rĩ,

wagĩrĩirũo kũũraga aikari a itũũra rĩu na rũhiũ rwa njora. Itũũra rĩu na kĩrĩa gĩothe kĩrĩ thĩinĩ warĩo, o hamwe na mahiũ ma rĩo, ciothe wagĩrĩirũo gũciananga na rũhiũ rwa njora

Thutha ũcio wagĩrĩirũo kuoya indo iria ciothe itahĩtwo kuo ũcicokanĩrĩrie gatagatĩ ga kĩhaaro kĩarĩo kĩa mũingĩ na ũcine itũũra rĩu na mwaki, nacio indo icio itahĩtwo kuo igũtuĩka igongona igima rĩa Yahweh Kĩhoti waku. Rĩgũtũũra rĩrĩ hĩba ya mwanangĩko. Rĩtiagĩrĩirũo gwakwo rĩngĩ o rĩ o rĩ

Guoko gwaku gũtiagĩrĩirũo kuoya kĩndũ o na kĩ kĩrĩa gĩtuĩrĩirũo kwanangwo, nĩgetha Yahweh atige gũcinwo nĩ marakara na akũiguĩre tha na agũcaĩre na atũme ũingĩhe, o ta ũrĩa eehĩtire kũrĩ maithe manyu ma tene

Nĩ gũkorũo nĩ wagĩrĩirũo gwathĩkĩra Yahweh Kĩhoti waku na njĩra ya kũrũmia maathani make mothe marĩa ndĩragwatha ũmũthĩ, na nĩ ũndũ ũcio wĩke ũndũ ũrĩa wagĩrĩire maitho-inĩ ma Yahweh Kĩhoti waku.