Gũcokerithia Maathani 14
“Inyuĩ mũrĩ ariũ a Yahweh Kĩhoti wanyu. Mũtiagĩrĩirũo gwĩtemanga kana kwenja thiithi wanyu ng’ũrũtũ nĩ ũndũ wa mũndũ mũkuũ
Nĩ gũkorũo mũrĩ andũ amũre harĩ Yahweh Kĩhoti wanyu, na Yahweh nĩ amũthuurĩte mũtuĩke andũ ake, mũtuĩke kĩndũ gĩake kĩa mwanya, kuuma harĩ ikundi ciothe cia andũ arĩa marĩ thĩinĩ wa thĩ.
“Ndũkanarĩe kĩndũ o na kĩ kĩrĩ magigi
Ici nĩcio nyamũ iria mũngĩrĩa: ndegwa, ng’ondu, mbũri,
thwariga, thiya, thuni, mbũri ya gĩthaka, thwara, ng’ondu ya gĩthaka, na ng’ondu ya irĩma-inĩ
No mũrĩe nyamũ o yothe ĩrĩ mahũngũ marekanĩtie makagayũkana maita merĩ na nĩ ĩcokagia ithagumia
No rĩrĩ, mũtiagĩrĩirũo kũrĩa nyamũ ici iria icokagia ithagumia kana iria irĩ mahũngũ marekanĩtie: ngamĩra, mbũkũ, na gĩkami, tondũ nĩ icokagia ithagumia no itirĩ mahũngũ marekanĩtie. Icio nĩ indo irĩ thahu harĩ inyuĩ
O na ngũrũe tondũ ĩkoragwo na mahũngũ marekanĩtie no ndĩcokagia ithagumia. Kĩu nĩ kĩndũ kĩrĩ thahu harĩ inyuĩ. Mũtiagĩrĩirũo kũrĩa nyama ciacio o na kana kũhutia ciimba ciacio.
“Harĩ nyamũ iria ciothe cikaraga maĩ-inĩ, ici nĩcio mũngĩrĩa: Kĩndũ o gĩothe kĩrĩ mathagu na ngũũcĩ no mũrĩe
No mũtiagĩrĩirũo kũrĩa kĩndũ o gĩothe gĩtarĩ mathagu na ngũũcĩ. Kĩu nĩ kĩndũ kĩrĩ thahu harĩ inyuĩ.
“No mũrĩe nyoni o yothe ĩtarĩ thahu
No ici nĩcio mũtagĩrĩirũo kũrĩa: nderi, ndiyũ, ngoru ĩrĩa njirũ,
hũngũ ĩrĩa ndune, hũngũ ĩrĩa njirũ, mũthemba wothe wa hũngũ,
mũthemba wothe wa ihuru,
nyaga, ndundu, gĩthimambũri, mũthemba wothe wa rwĩgĩ,
ndundu ĩrĩa nini, ndundu ĩrĩa ĩrĩ matũ maraihu, thambĩri,
gakuua-ũrogi, ngoru, cua,
njũũ, mũthemba wothe wa cũcũ wa njoka, hudihuda, na rũhuhu
Kĩũmbe gĩothe kĩrĩ mathagu harĩ iria ithiaga irĩ gĩkundi o nakĩo nĩ kĩndũ kĩrĩ thahu harĩ inyuĩ. Itiagĩrĩire kũrĩo
Nyamũ o yothe ĩtarĩ thahu harĩ iria ciũmbũkaga no mũrĩe.
“Mũtikanarĩe nyamũ o yothe yonetwo handũ ĩrĩ nguũ. No ũmĩhe mũndũ wa kũngĩ ũrĩa ũikaraga thĩinĩ wa matũũra manyu, na no amĩrĩe, kana yenderio mũndũ wa kũngĩ. Nĩ gũkorũo inyuĩ mũrĩ andũ aamũre harĩ Yahweh Kĩhoti wanyu. “Ndũkanatherũkie kori iria-inĩ rĩa nyina.
“No mũhaka ũrutage gĩcunjĩ gĩa ikũmi kĩa maciaro mothe ma mbegũ cia mũgũnda waku mwaka o mwaka
Wagĩrĩirũo kũrĩaga gĩcunjĩ gĩa ikũmi kĩa mũtu waku, kĩa ndibei yaku ya mũhihano, kĩa maguta maku, na marigithathi ma rũũru rwaku rwa ng’ombe na rũũru rwaku rwa mbũri kana ng’ondu, ũrĩ mbere ya Yahweh Kĩhoti waku handũ harĩa agaathuura rĩĩtwa rĩake rĩkoragwo ho, nĩgetha wĩrute gwĩtigĩra Yahweh Kĩhoti waku hingo ciothe.
“No rũgendo rũu rũngĩkorũo rũrĩ rũraihu mũno harĩ wee na ũremwo gũkuua indo icio ũcitware handũ harĩa Yahweh Kĩhoti waku agaathuura rĩĩtwa rĩake rĩkoragwo ho, nĩ ũndũ wa gũkorũo hakũraihĩrĩirie mũno (tondũ Yahweh Kĩhoti waku nĩ agaakũrathima),
no ũkũũranie indo icio na mbeca, ũthiĩ na mbeca icio ciaku handũ harĩa Yahweh Kĩhoti waku agaathuura irĩ moko-inĩ maku
Na no ũcoke ũhũthĩre mbeca icio kũgũra kĩrĩa gĩothe ũngĩĩrirĩria—ng’ombe, ng’ondu, mbũri, ndibei ona kana mbinyũ, na kĩndũ kĩngĩ o gĩothe ũngĩenda; na ũrĩĩre hau mbere ya Yahweh Kĩhoti waku ũkenete, wee o hamwe na andũ a nyũmba yaku
Na ndũkanatiganĩrie Mũlawii ũrĩa ũrĩ thĩinĩ wa matũũra manyu, nĩ gũkorũo ndarĩ gĩcunjĩ kana igai agaĩirũo hamwe nawe.
“O thutha wa mĩaka ĩtatũ, wagĩrĩirũo kũrehaga gĩcunjĩ gĩothe gĩa ikũmi kĩa maciaro maku ma mwaka ũcio na ũkĩige thĩinĩ wa matũũra manyu
Nake Mũlawii, o we ũcio ũtakoragwo na gĩcunjĩ kana igai agaĩirũo hamwe nawe, na mũndũ wa kũngĩ, mwana ũtarĩ ithe, na mũtumia wa ndigwa arĩa maikaraga matũũra-inĩ maku nĩ marĩũkaga makarĩa na makaigania, nĩgetha Yahweh Kĩhoti waku akũrathimage maũndũ-inĩ mothe marĩa ũrĩĩkaga.