Gũcokerithia Maathani 15

“Na rĩrĩ, o thutha wa mĩaka mũgwanja, wagĩrĩirũo kũrekanĩra thiirĩ

Ũũ nĩguo kũrĩrekanagĩrũo thiirĩ: Mũkombanĩri o wothe agĩrĩire kũrekera mũndũ wa itũũra rĩake ũrĩa ũrĩ na thiirĩ wake. Ndagĩrĩirũo kwĩra mũndũ wa itũũra rĩake kana mũrũ wa ithe amũrĩhe thiirĩ, nĩ gũkorũo nĩ kũrĩanagĩrĩrũo atĩ rĩu nĩ ihinda rĩa kũrekanĩra thiirĩ mbere ya Yahweh

No wĩtie mũndũ wa kũngĩ thiirĩ waku, no mũrũ wa thoguo wagĩrĩirũo kũmũrekera thiirĩ waku ũrĩa wothe arĩ naguo

Ĩndĩ gũtirĩ mũndũ o na ũmwe gatagatĩ-inĩ gaku wagĩrĩire gũgaakorũo arĩ mũthĩni, nĩ gũkorũo hatarĩ nganja Yahweh nĩ agaakũrathima bũrũri-inĩ ũrĩa Yahweh Kĩhoti waku arakũhe wĩgwatĩre ũtuĩke igai rĩaku,

no nĩ angĩkorũo tu nĩ ũgaathĩkĩra mũgambo wa Yahweh Kĩhoti waku na kinyi, na ũrũmĩrĩre biũ maathani maya mothe ndĩrakũhe ũmũthĩ

Nĩ gũkorũo Yahweh Kĩhoti waku nĩ agaakũrathima o ta ũrĩa akwĩrĩire, na nĩ ũgaakombagĩra ndũrĩrĩ nyingĩ, no wee ndũkabataraga gũkomba; na nĩ ũgaatha ndũrĩrĩ nyingĩ, no cio itigaagwatha.

“Mũrũ wa thoguo angĩgaatuĩka mũthĩni gatagatĩ-inĩ gaku thĩinĩ wa itũũra rĩmwe bũrũri-inĩ ũrĩa Yahweh Kĩhoti waku arakuhe, ndũkanomie ngoro kana ũkorũo ũrĩ mũkarĩ harĩ mũrũ wa thoguo ũcio mũthĩni

Nĩ gũkorũo wagĩrĩirũo kũmũkũnjũrĩra guoko gwaku ũrĩ na ũtaana na ũtigĩrĩre atĩ nĩ wamũkombithia kĩrĩa gĩothe arabatara kana atarĩ

Wĩmenyerere ndũkaneĩre na ngoro ũndũ ũyũ mũũru, ‘Mwaka wa mũgwanja, mwaka wa kũrekanĩra thiirĩ nĩ ũkuhĩrĩirie,’ na wage kuonania ũtaana harĩ mũrũ wa thoguo ũrĩa mũthĩni wage kũmũhe kĩndũ. Angĩgaakaĩra Yahweh nĩ ũndũ waku, ũgaakorũo wĩhĩtie

Wagĩrĩirũo kũmuonia ũtaana ũmũhe kĩndũ, na ndwagĩrĩirũo kũmũhe ta ũtarenda, nĩ gũkorũo ũndũ ũcio nĩguo ũrĩtũmaga Yahweh Kĩhoti waku arathime ũndũ o wothe ũrĩa ũrĩĩkaga

Nĩ gũkorũo hingo ciothe nĩ kũrĩkoragwo na athĩni bũrũri-inĩ ũcio. Nĩkĩo ndĩragwatha ngakwĩra ũũ, ‘Nĩ wagĩrĩirũo gũkũnjũra guoko gwaku ũrĩ na ũtaana harĩ mũrũ wa thoguo ũrĩa mũhinyĩrĩrĩku na mũthĩni thĩinĩ wa bũrũri wanyu.’

“Mũrũ wa thoguo angĩkorũo endetio kũrĩ wee, mũndũrũme Mũhibirania kana mũndũ-wa-nja Mũhibirania, na nĩ agũtungatĩire mĩaka ĩtandatũ, mwaka wa mũgwanja wagĩrĩirũo kũmũrekereria

Na angĩkorũo nĩ ũkũmũrekereria, ndwagĩrĩirũo kũmũrekereria moko matheri

Wagĩrĩirũo kũmũgaĩra kĩndũ ũrĩ na ũtaana, kuuma rũũru-inĩ rwaku, kuuma kĩhuuhĩro-inĩ gĩaku, na kuuma kĩhihĩro-inĩ gĩaku kĩa maguta na kĩa ndibei. O ta ũrĩa Yahweh Kĩhoti waku akũrathimĩte, noguo wagĩrĩirũo kũmũhe

Ririkana atĩ warĩ ngombo bũrũri-inĩ wa Misiri na Yahweh Kĩhoti waku agĩgũkũũra. Nĩkĩo ũmũthĩ ndĩragwatha wĩkage ũguo.

“No ngombo ĩyo ĩngĩgaakwĩra atĩrĩ, ‘Ndikwenda gũgũtiga!’ tondũ nĩ ĩkwendete mũrĩ hamwe na andũ a nyũmba yaku, nĩ gũkorũo nĩ ĩkeneire gũkorũo hamwe nawe,

wagĩrĩirũo kuoya mũkuha ũmĩtũrĩre gũtũ mũrango-inĩ, nayo ĩtuĩke ngombo yaku ũtũũro-inĩ wayo wothe. Ũguo noguo wagĩrĩirũo gwĩka ngombo yaku ya mũirĩtu

Ndũkanaigue hinya kũmĩrekereria ĩgũtige, tondũ ũrĩa ĩgũtungatĩire mĩaka ĩtandatũ ũkĩrĩte na maita merĩ ũtungata wa mũruti wĩra wa mũcara, na Yahweh Kĩhoti waku nĩ akũrathimĩte maũndũ-inĩ mothe marĩa mekĩtwo.

“Nĩ wagĩrĩirũo kwamũragĩra Yahweh Kĩhoti waku marigithathi mothe ma rũũru rwaku rwa ng’ombe na rũũru rwaku rwa mbũri kana ng’ondu. Ndũkanarute wĩra o wothe na marigithathi ma rũũru rwaku rwa ng’ombe o na kana wenje marigithathi ma rũũru rwaku rwa mbũri kana ng’ondu

Wee o hamwe na andũ a nyũmba yaku mwagĩrĩirũo kũrĩĩra irigithathi rĩu mbere ya Yahweh Kĩhoti waku mwaka o mwaka mũrĩ handũ harĩa Yahweh agaathuura

No angĩkorũo nyamũ ĩyo ĩrĩ na wathe—wonje, ũtumumu, kana wathe ũngĩ o wothe —ndũkanamĩrutĩre Yahweh Kĩhoti waku igongona

Wagĩrĩirũo kũmĩrĩĩra thĩinĩ wa matũũra manyu, mũndũ ũrĩ na thahu na ũrĩa ũtarĩ na thahu no mamĩrĩe o ta thiya kana thwariga

No ndwagĩrĩirũo kũrĩa thakame yayo; wagĩrĩirũo kũmĩita thĩ o ta maĩ.