Gũcokerithia Maathani 28

“Na angĩkorũo nĩ ũgaathikĩrĩria mũgambo wa Yahweh Kĩhoti waku na njĩra ya gũtigĩrĩra atĩ nĩ wahingia maathani make mothe marĩa ndĩragwatha ũmũthĩ, hatarĩ nganja Yahweh Kĩhoti waku nĩ agaakwambararia igũrũ rĩa ndũrĩrĩ iria ingĩ ciothe cia thĩ

Irathimo ici ciothe nĩ igooka harĩ wee na ikũiyũrĩrĩre, tondũ wa gũkorũo ũthiĩte na mbere gũthikĩrĩria mũgambo wa Yahweh Kĩhoti waku:

“Nĩ ũkaarathimwo ũrĩ itũũra-inĩ, na nĩ ũkaarathimwo ũrĩ mũgũnda-inĩ.

“Ciana ciaku nĩ ikaarathimwo o hamwe na maciaro ma mũgũnda waku na rũciaro rwa mahiũ maku, njaũ ciaku na tũgondu twaku.

“Gĩkabu gĩaku na mbakũri yaku ya gũkimĩra mũtu nĩ ikaarathimwo.

“Nĩ ũkaarathimagwo rĩrĩa wahũndũka, na nĩ ũkaarathimagwo rĩrĩa woimagara.

“Yahweh nĩ agaatũma thũ ciaku iria igaagũũkĩrĩra itoorio irĩ mbere yaku. Igaagũtharĩkĩra ciumĩte na mwena ũmwe, no ikaagera mĩena mũgwanja ngũrani igĩkũũrĩra

Yahweh nĩ agaatũma kĩrathimo makũmbĩ-inĩ maku na ũndũ-inĩ ũrĩa wothe ũgeekaga, na hatarĩ nganja nĩ agaakũrathima ũrĩ bũrũri-inĩ ũrĩa Yahweh Kĩhoti waku arakũhe

Yahweh nĩ agaagũtua rũrĩrĩ rwa andũ ake amũre, o ta ũrĩa eehĩtire harĩ wee, tondũ wa gũkorũo ũthiĩte na mbere kũrũmia maathani ma Yahweh Kĩhoti waku na ũkagerera njĩra-inĩ ciake

Ikundi ciothe cia andũ thĩinĩ wa thĩ nĩ ikoona atĩ nĩ wĩtanĩtio na rĩĩtwa rĩa Yahweh, na nĩ igaagwĩtigĩra.

“Yahweh nĩ agaatũma ũgĩe na ciana nyingĩ na mahiũ maingĩ na mũgũnda ũrĩ na maciaro bũrũri-inĩ ũrĩa Yahweh eehĩtire harĩ maithe manyu ma tene atĩ nĩ agaakũhe

Yahweh nĩ agaakũhingũrĩra igũrũ, ikũmbĩ rĩake rĩiyũru, oirie mbura bũrũri-inĩ waku ihinda rĩayo rĩakinya na akũrathime maũndũ-inĩ maku mothe. Nĩ ũgaakombagĩra ndũrĩrĩ nyingĩ, no wee ndũkabataraga gũkomba

Yahweh nĩ agaatũma ũtuĩke mũtwe no ti mũting’oe; na ũgaakorũo ũrĩ wa mbere, no ndũkaarigia, angĩkorũo nĩ ũgaathiĩ na mbere gwathĩkĩra maathani ma Yahweh Kĩhoti waku marĩa ndĩragwatha ũmũthĩ nĩguo ũmarũmagie na ũmahingagie

Ndũkanaagarare ciugo iria ciothe ndĩramwatha ũmũthĩ, ũrore mwena wa ũrĩo kana wa ũmotho, ũrũmĩrĩre ihoti ingĩ ũcitungatĩre.

“No angĩkorũo ndũgathikĩrĩria mũgambo wa Yahweh Kĩhoti waku wage gũtigĩrĩra atĩ nĩ wahingia maathani make na mawatho make mothe marĩa ndĩragwatha ũmũthĩ, irumi ici ciothe nĩ igaagũkora na ikũiyũrĩrĩre:

“Nĩ ũkaanyitwo nĩ kĩrumi ũrĩ itũũra-inĩ, na nĩ ũkaanyitwo nĩ kĩrumi ũrĩ mũgũnda-inĩ.

“Gĩkabu gĩaku na mbakũri yaku ya gũkimĩra mũtu nĩ ikaanyitwo nĩ kĩrumi.

“Ciana ciaku nĩ ikaanyitwo nĩ kĩrumi o hamwe na maciaro ma mũgũnda waku na njaũ ciaku na tũgondu twaku.

“Nĩ ũkaanyitwo nĩ kĩrumi rĩrĩa wahũndũka, na nĩ ũkaanyitwo nĩ kĩrumi rĩrĩa woimagara.

“Yahweh nĩ agaakũrehithĩria kĩrumi, gũtukanĩrũo, na ihera ũndũ-inĩ ũrĩa wothe ũgeekaga o nginya wanangĩke na ũthire narua, tondũ wa ciĩko ciaku njũru na tondũ wa kũndiganĩria

Yahweh nĩ agaatũma ũnyitwo nĩ mũrimũ o nginya akũniine bũrũri-inĩ ũrĩa ũrathiĩ kwĩgwatĩra

Yahweh nĩ agaakũhũũra na mũrimũ wa kũninana, mũrimũ wa kũhiũha mwĩrĩ, mahĩa, ũrugarĩ mũnene, rũhiũ rwa njora, kũrugĩka, na mbuu; na maũndũ macio magaagũthingata nginya ũthire

Matu marĩa marĩ igũrũ rĩaku makaahaana o ta gĩcango, nayo thĩ ĩrĩa ĩrĩ rungu rwaku ĩhaane o ta kĩgera

Yahweh nĩ agaatũma mbura ya bũrũri waku ĩtuĩke mũtutu na rũkũũngũ, ĩkuurĩre yumĩte igũrũ o nginya wanangwo

Yahweh nĩ agaatũma ũtoorio ũrĩ mbere ya thũ ciaku. Ũgaacitharĩkĩra uumĩte na mwena ũmwe, no ũkaagera mĩena mũgwanja ngũrani ũgĩciũrĩra; na ũgaatuĩka kĩndũ gĩa kũguoyohia harĩ mothamaki mothe ma thĩ

Na ciimba ciaku igaatuĩka irio cia nyoni o yothe ya rĩera-inĩ na nyamũ cia gũkũ thĩ, na gũtirĩ mũndũ ũgaacingata.

“Yahweh nĩ agaakũhũũra na mahũha ma Misiri, mũrimũ wa kũimba, kuomboka ngothi, na ironda cia ngothi, na ndũkaahona

Yahweh nĩ agaakũhũũra na ũgũrũki na ũtumumu na gũtukanĩrũo

Ũgaathiaga ũkĩhambataga kũrĩ mũthenya gatagatĩ, o ta ũrĩa mũtumumu athiaga akĩhambataga nduma-inĩ, na ndũkagaacĩra ũndũ-inĩ o wothe ũrĩa ũgeekaga; na hingo ciothe nĩ ũgaatunyagwo na ũkaiywo, na gũtirĩ mũndũ ũgaakũhonokia

Ũkaagĩa kĩrĩko gĩa kũhikania na mũirĩtu, no mũndũrũme ũngĩ amũnyite kĩa hinya. Ũgaaka nyũmba, no ndũkaamĩtũũra. Ũkaahanda mũgũnda wa mĩthabibũ, no ndũkaarĩa maciaro maguo

Ndegwa yaku ĩgaathĩnjwo wĩroreire na maitho maku, no ndũkaarĩa o na kĩ kĩayo. Ndigiri yaku ĩkaaiywo ũrĩ o hau ũkĩĩyonagĩra, no ndĩgaacoka kũrĩ wee. Ng’ondu yaku ĩkaaneanwo kũrĩ thũ ciaku, no ndũkaagĩa mũndũ wa gũkũhonokia

Ariũ aku na aarĩ aku makaaneanwo kũrĩ andũ angĩ wĩroreire, na nĩ ũkeeriragĩria kũmona, no guoko gwaku gũtigaakorũo na hinya

Maciaro ma mũgũnda waku na kĩrĩa gĩothe ũkaagethaga gĩkaarĩagwo nĩ andũ ũtoĩ, na hingo ciothe ũgaatunyagwo na ũkahehenjwo

Ũkaagũrũkio nĩ kĩrĩa maitho maku makoonaga.

“Yahweh nĩ agaakũhũũra maru-inĩ na magũrũ-inĩ na mahũha marĩ na ruo na matangĩhonwo, kuuma ikinya rĩa kũgũrũ gwaku o nginya ruototia rwa mũtwe waku

Yahweh nĩ agaakũruta wee o hamwe na mũthamaki ũrĩa wĩthuurĩire, agũtware kũrĩ rũrĩrĩ ũtoĩ o na kana maithe manyu ma tene makarũmenya, na ũrĩ kũu nĩ ũgaatungatĩra ihoti ingĩ, ihoti cia mbaũ na cia mahiga

Na nĩ ũgaatuĩka kĩndũ gĩa kũguoyohia na gĩa kũnyararũo, na ũnyũrũrio gatagatĩ-inĩ ga ikundi ciothe cia andũ arĩa Yahweh agaagũtwara kũrĩ o.

“Ũkaahanda mbegũ nyingĩ mũgũnda-inĩ no ũkaagetha o tũnini, tondũ ngigĩ nĩ igaaciananga

Ũkaahanda na ũrĩmĩre mĩgũnda ya mĩthabibũ, no ndũkanyua ndibei kana ũnganie kĩndũ, tondũ kĩgunyũ nĩ gĩkaamĩrĩa

Nĩ ũgaakorũo na mĩtamaiyũ gĩcigo-inĩ gĩaku gĩothe, no ndũrĩ maguta ũkeehaka, tondũ ndamaiyũ ciaku nĩ igaaitĩka

Nĩ ũgaaciara ariũ na aarĩ, no matigaatũũra marĩ aku, tondũ nĩ magaatahwo

Ikundi cia tũtaambi nĩ igaatharĩkĩra mĩtĩ yaku yothe na maciaro ma mũgũnda waku

Mũndũ wa kũngĩ ũrĩa ũikaraga gatagatĩ-inĩ kanyu agaakĩrĩrĩria gũtũũgĩra igũrũ rĩaku, nawe ũkĩrĩrĩrie o kũharũrũka na thĩ

Nĩ agaagũkombera, no wee ndũkaamũkombera. Agaatuĩka mũtwe, nawe ũtuĩke mũting’oe.

“Irumi ici ciothe nĩ igooka harĩ wee na ikũrũmĩrĩre na ikũiyũrĩrĩre o nginya wanangĩke, tondũ wa gũkorũo wagĩte gũthikĩrĩria mũgambo wa Yahweh Kĩhoti waku, ũkaga kũhingia maathani make na mawatho make marĩa agwathĩte

Na nĩ igaathiĩ na mbere gũkũnyita wee hamwe na rũciaro rwaku irĩ kĩmenyithia gĩa gũtũũra na ũrirũ,

tondũ wa kwaga gũtungatĩra Yahweh Kĩhoti waku ũcanjamũkĩte na ũrĩ na gĩkeno kĩa ngoro rĩrĩa warĩ na indo nyingĩ

Yahweh nĩ agaatũma thũ ciaku igũũkĩrĩre, na nĩ ũgaacitungatĩra ũrĩ mũhũtu na ũnyotiĩ na wĩhumbĩte ta mũthĩni na ũtarĩ o na kĩ. Nĩ agaagwĩkĩra icoki rĩa kĩgera ngingo o nginya akwanange.

“Yahweh nĩ akaarahũra rũrĩrĩ rwa kũraya rũgũũkĩrĩre, ruumĩte mũico wa thĩ; rũgaagũtharĩkĩra o ta nderi, rũrĩrĩ ũtagaataũkĩrũo nĩ rũthiomi rwaruo,

rũrĩrĩ rwa gwĩtigĩrũo, rũtakaiguĩra mũndũ mũkũrũ tha o na kana rũcaĩre mũndũ mwĩthĩ

Andũ a rũrĩrĩ rũu makaarĩa rũciaro rwa mahiũ maku na maciaro ma mũgũnda waku o nginya wanangĩke. Gũtirĩ ngano magaagũtigĩria, ndibei ya mũhihano kana maguta, njaũ kana tũgondu o nginya makũniine

Magaakũrigicĩria, makũhingĩrĩrie thĩinĩ wa matũũra maku mothe bũrũri-inĩ waku o nginya thingo ciaku iria ndaya na irĩ na ũgitĩri iria wĩhokete igwe. Hatarĩ nganja nĩ magaakũrigicĩria thĩinĩ wa matũũra maku mothe bũrũri-inĩ ũrĩa Yahweh Kĩhoti waku arakũhe

Nawe nĩ ũkaarĩa ciana ciaku mwene, nyama cia ariũ aku na airĩtu aku arĩa Yahweh Kĩhoti waku akũheete, tondũ wa ũrĩa mũgaakorũo mũrigicĩirio na njĩra nene na tondũ wa mĩtangĩko ĩrĩa thũ yaku ĩgaakorũo ĩkũreheire.

“Nginya mũndũrũme ũrĩa mũbarĩrĩri na mũhooreri gatagatĩ-inĩ gaku ndakaiguĩra mũrũ wa nyina tha kana mũtumia wake ũrĩa endete kana ariũ ake arĩa magaakorũo matigarĩte,

na ndakaamagaĩra nyama cia ariũ ake iria akaarĩa, tondũ ndagaakorũo na kĩndũ kĩngĩ nĩ ũndũ wa ũrĩa mũgaakorũo mũrigicĩirio na njĩra nene na tondũ wa mĩtangĩko ĩrĩa thũ yaku ĩgaakorũo ĩreheire matũũra manyu

Na mũtumia ũrĩa mũbarĩrĩri na mũhooreri gatagatĩ-inĩ gaku ũrĩa ũtangĩĩciria gũkinyithia kũgũrũ gwake thĩ nĩ ũndũ wa ũrĩa arĩ mũbarĩrĩri, ndagaakorũo na tha kwerekera mũthuri wake ũrĩa endete kana mũrũwe kana mwarĩ,

tondũ ndakaamagaĩra njogu ĩrĩa yumaga gatagatĩ ka magũrũ make thutha wa gũciara na nyama cia ariũ arĩa aciarĩte, nĩ gũkorũo agaacirĩa na hitho nĩ ũndũ wa ũrĩa mũgaakorũo mũrigicĩirio na njĩra nene na tondũ wa mĩtangĩko ĩrĩa thũ yaku ĩgaakorũo ĩreheire matũũra manyu.

“Angĩkorũo ndũkaahingia ciugo ciothe cia Watho ũyũ iria ciandĩkĩtwo ibuku-inĩ rĩrĩ na wage gwĩtigĩra rĩĩtwa rĩrĩ inene na rĩa magegania, o rĩo rĩĩtwa rĩa Yahweh Kĩhoti waku,

Yahweh nĩ agaakũrehera wee o hamwe na rũciaro rwaku mahũũra moru mũno, mahũũra manene na ma gũtũũra, na mĩrimũ mĩũru ya gũtũũra

Agaakũrehera mĩrimũ yothe ya Misiri ĩrĩa wetigĩrĩte, na nĩ ũkaanyitwo nĩyo

Makĩria ma ũguo, Yahweh nĩ agaakũrehera nginya mĩrimũ kana mahũũra mothe marĩa matarĩ maandĩke ibuku-inĩ rĩrĩ rĩa Watho o nginya wanangĩke

O na gũtuĩka nĩ mũingĩhĩte o ta njata cia igũrũ, mũgaatigara o andũ anini tu, tondũ wa kwaga gũthikĩrĩria mũgambo wa Yahweh Kĩhoti wanyu.

“Na o ta ũrĩa Yahweh aakenagĩra gũtũma mũgaacĩre na mũingĩhe, noguo Yahweh agaakenera kũmũniina na kũmwananga; na nĩ mũkeeherio bũrũri-inĩ ũrĩa mũkiriĩ kwĩgwatĩra.

“Yahweh nĩ agaakũhurunja gatagatĩ-inĩ ka ndũrĩrĩ ciothe, kuuma mũico ũmwe wa thĩ nginya mũico ũrĩa ũngĩ wa thĩ, na ũrĩ kũu ũgaatungatĩra ihoti cia mbaũ na cia mahiga, iria wee ũtoĩ o na kana maithe manyu ma tene magacimenya

Ndũgaakorũo na thayũ ũrĩ gatagatĩ-inĩ ka ndũrĩrĩ icio o na kana handũ ha kũhurũkia ikinya rĩa kũgũrũ gwaku. Ithenya rĩa ũguo, Yahweh agaakũhe ngoro ĩrĩ na mĩtangĩko na maitho matarĩ na hinya na atũme ũigue ũkuĩte ngoro

Ũtũũro waku ũgaakoragwo ũrĩ ũgwati-inĩ mũnene, na nĩ ũkaaiguaga guoya ũtukũ na mũthenya; na ndũgaakoragwo na ũũma na ũhonokio waku

Rũcinĩ ũkoigaga atĩrĩ, ‘Na arĩ korũo nĩ hwaĩ-inĩ!’ narĩo hwaĩ-inĩ ũkoiga atĩrĩ, ‘Na arĩ korũo nĩ rũcinĩ!’ tondũ wa guoya ũrĩa ũkaiguaga ngoro-inĩ yaku na tondũ wa kĩrĩa maitho maku makoonaga

Na hatarĩ nganja Yahweh nĩ agaagũcokia Misiri na meri, kũgerera njĩra ĩrĩa ndaakwĩrire ũũ ũhoro-inĩ wayo, ‘Ndũkamĩona rĩngĩ,’ na mũrĩ kũu nĩ mũkeyendia kũrĩ thũ cianyu mũtuĩke ngombo cia arũme na andũ-a-nja, no gũtigaakorũo na mũndũ wa kũmũgũra.”