Gũcokerithia Maathani 29
Ici nĩcio ciugo cia kĩrĩkanĩro kĩrĩa Yahweh aathire Musa arĩkanĩre na ciana cia Isiraeli bũrũri-inĩ wa Moabi, hamwe na kĩrĩkanĩro kĩrĩa aarĩkanĩire nao Horebu.
Musa agĩgĩta Isiraeli othe , makĩũngana hamwe akĩmeera ũũ: “Nĩ mwĩyoneire maũndũ mothe marĩa Yahweh eekire mbere ya maitho manyu bũrũri-inĩ wa Misiri harĩ Firauni na ndungata ciake ciothe na bũrũri wake wothe,
matuĩro manene marĩa mweyoneire na maitho manyu, imenyithia nene o na ciama
No Yahweh ndarĩ amũhe ngoro ĩrĩ na ũtaũku na maitho ma kuona na matũ ma kũigua, nginyagia mũthenya ũyũ wa ũmũthĩ
‘Rĩrĩa ndamũtongoragia werũ-inĩ mĩaka 40, nguo cianyu itiigana gũthira o na iratũ cia magũrũ manyu itiigana gũthira
Mũtiarĩire mũgate, na mũtianyuire ndibei kana njohi, nĩgetha mũmenye atĩ niĩ nĩ niĩ Yahweh Kĩhoti wanyu.’
Thutha-inĩ tũgĩkinya gũkũ, na Sihoni mũthamaki wa Heshiboni marĩ na Ogu mũthamaki wa Bashani magĩũka gũtũtũnga nĩguo marũe na ithuĩ, no tũkĩmatooria
Thutha ũcio tũkĩoya bũrũri wao na tũkĩũheana ũrĩ igai kũrĩ Arubeni, Agadi, na nuthu ya mũhĩrĩga wa Amanase
Nĩ ũndũ ũcio, rũmagiai ciugo cia kĩrĩkanĩro gĩkĩ na mũciathĩkagĩre, nĩgetha maũndũ mothe marĩa mũrĩkaga magaacagĩre.
“Inyuothe mũrũgamĩte haha mbere ya Yahweh Kĩhoti wanyu ũmũthĩ, atongoria a mĩhĩrĩga yanyu, athuri anyu, anene anyu, arũme othe a Isiraeli,
ciana cianyu, atumia anyu, na andũ a kũngĩ arĩa maikaranagia na inyuĩ kambĩ-inĩ yanyu, kuuma mũndũ ũrĩa ũmuunagĩra ngũ o nginya ũrĩa ũmũtahagĩra maĩ
Mũrĩ haha nĩgetha mũgĩe na kĩrĩkanĩro na Yahweh Kĩhoti wanyu na mwĩhĩtwa wake, kĩrĩa Yahweh Kĩhoti wanyu ararĩkanĩra na inyuĩ ũmũthĩ
nĩguo ũmũthĩ amũtue andũ ake nake atuĩke Kĩhoti wanyu, o ta ũrĩa amwĩrĩire na o ta ũrĩa eehĩtire harĩ maithe manyu ma tene, Iburahimu, Isaaka, na Jakubu.
“Na rĩrĩ, to inyuĩ inyuiki ndĩrarĩkanĩra na inyuĩ kĩrĩkanĩro gĩkĩ na mwĩhĩtwa ũyũ,
no nĩ arĩa marũgamĩte haha na ithuĩ ũmũthĩ mbere ya Yahweh Kĩhoti witũ o hamwe na arĩa matarĩ haha na ithuĩ ũmũthĩ
(Nĩ gũkorũo nĩ mũĩ wega ũrĩa twatũũraga tũrĩ bũrũri-inĩ wa Misiri na ũrĩa twatuĩkanĩirie gatagatĩ-inĩ ka ndũrĩrĩ itiganĩte tũrĩ rũgendo-inĩ rũu rwitũ.
Na nĩ mweyonagĩra indo ciao irĩ thahu na mĩhianano yao ĩrĩ magigi ya mbaũ na mahiga, betha na thahabu, iria ciarĩ gatagatĩ-inĩ kao.
Mwĩmenyererei hatikanagĩe mũndũrũme kana mũndũ-wa-nja, nyũmba kana mũhĩrĩga gatagatĩ-inĩ kanyu ũkaareka ngoro yake ĩhutatĩre Yahweh Kĩhoti witũ athiĩ atungatĩre ihoti cia ndũrĩrĩ icio, nĩgetha gũtikanagĩe mũri gatagatĩ-inĩ kanyu ũkũruta maciaro marĩ na thumu na mũmera mũrũrũ.
“No mũndũ angĩigua ciugo cia mwĩhĩtwa ũyũ na agĩe na mwĩtĩo ngoro-inĩ yake, oige ũũ, ‘Nĩ ngũgĩa na thayũ, o na gũtuĩka ngũrũmĩrĩra njĩra cia ngoro yakwa,’ arehe mwanangĩko harĩ kĩrĩa gĩothe kĩrĩ njĩra-inĩ yake,
Yahweh ndakeenda kũmuohera. Ithenya rĩa ũguo, marakara manene ma Yahweh nĩ makaarĩrĩmbũkĩra mũndũ ũcio, na kĩrumi kĩrĩa gĩothe kĩandĩkĩtwo ibuku-inĩ rĩrĩ nĩ gĩkaamũnyita na hatarĩ nganja Yahweh nĩ agaatharia rĩĩtwa rĩa mũndũ ũcio mũhuro wa riũa
Yahweh nĩ akaamũrania mũndũ ũcio kuuma harĩ mĩhĩrĩga yothe ya Isiraeli atũme akorũo nĩ mwanangĩko kũringana na kĩrumi gĩothe gĩa kĩrĩkanĩro kĩrĩa kĩandĩkĩtwo ibuku-inĩ rĩrĩ rĩa Watho.
“Rĩrĩa rũciaro rũrĩa rũgooka thutha-inĩ rwa ariũ anyu na andũ a kũngĩ moimĩte bũrũri wa kũraya makoona mahũũra ma bũrũri ũcio, mĩrimũ ĩrĩa Yahweh agaakorũo aũreheire—
ũbiriti na cumbĩ na kũhĩa, ũũ atĩ bũrũri waguo wothe ndũkaahandwo kana ũthundũke kĩndũ, kana kũgĩe mũmera o na ũmwe ũkũmera kuo, o ta kwanangwo gwa Sodomu na Gomora, Adima na Zeboimu, iria Yahweh aanangire na marakara na mang’ũrĩ make
marĩ hamwe na ndũrĩrĩ ciothe nĩ makooria atĩrĩ, ‘Yahweh eekire bũrũri ũyũ ũũ nĩkĩ? Nĩ kĩĩ kĩarehire marakara maya mahiũ ũũ?
Macoke moige ũũ, ‘Nĩ tondũ nĩ maatiganĩirie kĩrĩkanĩro kĩa Yahweh, o we Kĩhoti wa maithe mao ma tene, kĩrĩa aarĩkanĩire nao rĩrĩa aamarutire bũrũri wa Misiri
Ĩndĩ o maathiire na magĩtungatĩra ihoti ingĩ na magĩcinamĩrĩra, ihoti matooĩ ũhoro wacio na ataameetĩkĩrĩtie gũcithathaiya
Namo marakara mahiũ ma Yahweh makĩrĩrĩmbũkĩra bũrũri ũcio na njĩra ya kũũrehera kĩrumi kĩrĩa gĩothe kĩandĩkĩtwo ibuku-inĩ rĩrĩ
Nĩ ũndũ ũcio Yahweh akĩmamunya kuuma tĩri-inĩ wao arĩ na marakara na mang’ũrĩ na mathũgũta manene na akĩmatwara ithamĩrio bũrũri-inĩ ũngĩ, kũrĩa matũire nginya ũmũthĩ.’
“Maũndũ marĩa matarĩ maguũrie nĩ ma Yahweh Kĩhoti witũ, ĩndĩ maũndũ marĩa maguũrie nĩ maitũ na njiarũa citũ tene na tene, nĩgetha tũrũmagie ciugo ciothe cia Watho ũyũ.