Hosea 11

“Rĩrĩa Isiraeli aarĩ kamwana, nĩ ndamwendete, Na nĩ ndetire mũrũ wakwa kuuma Misiri.

O ũrĩa maakĩragĩrĩria kũmeta, Noguo maathiaga kũraya nao. Magĩgĩthiĩ na mbere kũrutĩra Baali magongona Na kũrutĩra mĩhianano ya gwacũhio magongona.

Ĩndĩ nĩ niĩ ndarutire Efiraimu gwĩtwara, ndĩmanyitĩte na moko makwa; Na matiamenyire atĩ nĩ niĩ ndamahonetie.

Ndaikaraga ngĩmagucagia na mĩkwa ya andũ, ngamagucia na mĩhĩndo ya wendo; Na harĩ o ndatariĩ ta mũndũ ũreheria icoki thĩa-inĩ ciao, Na nĩ ndatugaga o ũmwe wao na nyama.

Matigaacoka bũrũri-inĩ wa Misiri, no Ashuri nĩyo ĩgaatuĩka mũthamaki wao, Tondũ nĩ maaregire kũnjokerera.

Na rũhiũ rwa njora nĩ rũkaabĩrĩrĩka rũũkĩrĩre matũũra mao Na rwanange mĩgamba yao na rũmatambure nĩ ũndũ wa njama ciao.

Andũ akwa mehotorete kũregenyũka mandiganĩrie. O na gũtuĩka nĩ maametire mokĩre na igũrũ, gũtirĩ mũndũ ũũkĩraga.

Ingĩkĩhota atĩa gũgũtiganĩria, wee Efiraimu? Ingĩkĩhota atĩa gũkũneana, wee Isiraeli? Ingĩkĩhota atĩa gũgwĩka ta Adima? Ingĩkĩhota atĩa gũgũtua ta Zeboimu? Ngoro yakwa nĩ ĩgarũrũkĩte; Na hĩndĩ o ĩyo ũcayanĩri wakwa ũkarahũrũo.

Ndigaaitũrũra marakara makwa mahiũ. Ndikaananga Efiraimu rĩngĩ, Nĩ gũkorũo niĩ ndĩ El no ndirĩ mũndũ, O niĩ Ũrĩa Mwamũre gatagatĩ-inĩ kanyu; Na ndigooka harĩ inyuĩ ndĩ na mangʼũrĩ.

Nĩ makaarũmĩrĩra Yahweh, nake nĩ akaararama ta mũrũthi; Rĩrĩa akaararama, ariũ ake magooka makĩinainaga kuuma mwena wa ithũĩro.

Makaainaina o ta nyoni makiuma Misiri, Mainaine o ta ndutura makiuma bũrũri wa Ashuri; Na nĩ ngaatũma maikarage nyũmba-inĩ ciao,” ũguo nĩguo Yahweh ekuuga.

“Efiraimu andigicĩirie na maheeni, Nayo nyũmba ya Isiraeli ĩkandigicĩria na maũndũ matarĩ ma ma. Ĩndĩ Yahuda no athanaga e hamwe na El, Na nĩ mwĩhokeku harĩ arĩa amũre.”