Hosea 9

“Ndũgakene, wee Isiraeli, Ndũgakũngũĩre ta ikundi cia andũ. Tondũ kũgerera ũmaraya nĩ ũtiganĩte na Kĩhoti waku. Nĩ wendete mũcara wa ũmaraya ũrĩa wamũkagĩra kĩhuuhĩro-inĩ o gĩothe kĩa ngano.

Ĩndĩ kĩhuuhĩro o na kĩhihĩro kĩa ndibei itirĩmahũnagia, Na ndarĩkoragwo na ndibei ya mũhihano.

Matigaathiĩ na mbere gũtũũra bũrũri-inĩ wa Yahweh; Handũ ha ũguo, andũ a Efiraimu magaacoka Misiri, Na nĩ makaarĩa indo iria irĩ thahu marĩ Ashuri.

Matigaacoka gũitĩra Yahweh magongona ma ndibei; Magongona mao matirĩmũkenagia. Matariĩ ta mũgate wa macakaya; Andũ arĩa othe marĩũrĩaga nĩ marĩĩthahagia. Tondũ mũgate wao nĩ wao oiki; Ndũkaarehwo nyũmba-inĩ ya Yahweh.

Hihi mũgeeka atĩa mũthenya wa gũcemania, Mũthenya wa gĩathĩ kĩa Yahweh?

Tondũ rĩrĩ, nĩ makoora nĩ ũndũ wa mwanangĩko. Misiri nĩ ĩkaamacokanĩrĩria hamwe, nayo Memufisi ĩmathike. Thabai nĩ ũkeegwatĩra indo ciao cia goro cia betha, Na hema-inĩ ciao gũgaakorũo na ihinga cia mĩigua.

Matukũ ma ituĩro nĩ magaakinya, Matukũ ma kũherithio nĩ magaakinya, Na andũ a Isiraeli nĩ makaamenya. Mũnabii wao agaakorũo arĩ mũkĩgu, na mũndũ ũrĩa uugaga arĩ na roho agaatuĩka mũgũrũki; Tondũ mahĩtia manyu nĩ maingĩ, nĩ mũmenetwo mũno.”

Mũrangĩri wa Efiraimu aakoragwo hamwe na Kĩhoti wakwa. No njĩra ciothe cia anabii ake rĩu itariĩ ta mĩtego ya mũtegi wa nyoni; Kũrĩ na rũmena thĩinĩ wa nyũmba ya Kĩhoti wake.

Nĩ marikĩire mũno ũũru-inĩ, o ta matukũ-inĩ ma Gibea. Nĩ akaaririkana mahĩtia mao na amaherithie nĩ ũndũ wa mehia mao.

“O ta thabibũ irĩ werũ-inĩ, nĩ ndonire Isiraeli. O ta ngũyũ cia mbere iria ciambaga kwĩruha cia mũtĩ wa mũkũyũ, nĩ ndonire maithe manyu ma tene. No nĩ maathiire kũrĩ Baali ya Peori; Makĩĩyamũrĩra kĩndũ kĩrĩa gĩa gĩconoko, Na magĩtuĩka kĩndũ kĩrĩ magigi o ta kĩndũ kĩu mendete.

Riri wa Efiraimu ũmbũkaga ũgathiĩ o ta nyoni; Gũtirĩ gũciara, gũtirĩ kũgĩa nda, na gũtirĩ kuoha nda.

O na mangĩrera ciana, Nĩ ngaatũma morũo nĩcio nginya kwage mũndũ ũgũtigara; Rĩrĩa ngaamatiganĩria-rĩ, kaĩ nĩ magaakorũo na haaro-ĩ!

Efiraimu, ahandĩtwo kũndũ gwa kũrĩithia, aatariĩ ta Turo harĩ niĩ; Rĩu Efiraimu no mũhaka arute ciana ciake ithiĩ ikooragwo.”

Atĩrĩrĩ Yahweh, mahe kĩrĩa wagĩrĩirũo kũmahe; Ũmahe nda ĩrĩa ĩhunaga na nyondo itarĩ iria.

“Waganu wao wothe wekĩirũo Giligali, tondũ marĩ kũu nĩ ndamathũrire. Tondũ wa ciĩko ciao njũru nĩ ngaamaingata moime nyũmba-inĩ yakwa. Ndigaacoka kũmenda rĩngĩ; Anene ao othe nĩ aremi.

Efiraimu nĩ akaahũũrũo. Mũri wao nĩ ũkooma, na matikaaruta maciaro. O na mangĩgaaciara ciana, nĩ ngooraga rũciaro rũu rwao mendete.”

Kĩhoti wakwa nĩ akaamarega, Nĩ gũkorũo nĩ maregete kũmũthikĩrĩria, Na magaatuĩka andũ a kũũrũra gatagatĩ-inĩ ka ndũrĩrĩ.