Isaiya 10
Kaĩ arĩa mathondekaga mawatho moru marĩ na haaro-ĩ! Arĩa maikaraga o makĩandĩkaga mawatho ma kũhinyanĩrĩria,
Nĩguo mahotomie ciira wa andũ arĩa athĩni, Nĩguo magirĩrĩrie kĩhooto kĩa arĩa matarĩ hinya gatagatĩ-inĩ ka andũ akwa, Magatahaga atumia a ndigwa O na magataha ciana iria itarĩ maithe!
Mũgeeka atĩa mũthenya wa ituĩro, Rĩrĩa mwanangĩko ũgooka uumĩte kũraihu? Mũkoorĩra kũrĩ ũ amũteithie, Na mũgaatiga ũtonga wanyu kũ?
Itarĩ nao, gũtirĩ ũndũ ũgaakorũo ũtigarĩte o tiga mainamĩrĩrie mothiũ mao harĩ arĩa mohetwo Kana kũgũa harĩ arĩa moragĩtwo. Nĩ ũndũ wa maũndũ macio mothe, marakara make matirĩ marathira, Na no atambũrũkĩtie guoko gwake nĩguo ahũũrane.
“Atĩrĩrĩ, Mũashuri, O ũcio rũthanju rwa kuonania marakara makwa Na mũkwanjũ ũrĩa ũrĩ moko-inĩ mao wa mang’ũrĩ makwa!
Nĩ ngaamũtũma okĩrĩre rũrĩrĩ rũrĩa rũregenyũki, Okĩrĩre andũ arĩa mandakaragia; Nĩ ngaamwatha eyoere indo nyingĩ cia gũtahwo na atunyane indo nyingĩ Na acirangĩrĩrie o ta ndoro njĩra-inĩ.
No ũguo tiguo we agaakorũo akĩenda gwĩka Na ũguo tiguo ngoro yake ĩkaabanga gwĩka; Tondũ muoroto wa ngoro yake nĩ kũniina, Kweheria ndũrĩrĩ nyingĩ, no ti nini.
Nĩ gũkorũo oigĩte ũũ, ‘Githĩ anene arĩa marĩ rungu rwakwa othe ti athamaki?
Na githĩ itũũra rĩa Kalino rĩtitariĩ o ta Karikemishi? Githĩ Hamathu rĩtitariĩ o ta Aripadi? Githĩ Samaria rĩtitariĩ o ta Dameski?
Guoko gwakwa nĩ gũtooretie mothamaki ma mĩhianano ĩtarĩ kĩene, Marĩa maarĩ na mĩhianano mĩingĩ ya gwacũhio gũkĩra ya Yahrushalayim na Samaria!
Githĩ ndigeeka itũũra rĩa Yahrushalayim na mĩhianano yarĩo O ta ũrĩa ndekire Samaria na mĩhianano yakuo ĩtarĩ kĩene?’
“Rĩrĩa Yahweh akaarĩkia wĩra wake wothe Kĩrĩma-inĩ gĩa Zayuni na thĩinĩ wa Yahrushalayim, nĩ akaaherithia mũthamaki wa Ashuri nĩ tondũ wa mwĩtĩo wake wa ngoro, na ũrĩa eyonaga atũũgĩrĩte
Nĩ gũkorũo oigĩte ũũ, ‘Ngwĩka ũguo na hinya wa guoko gwakwa Ningĩ na ũũgĩ wakwa, tondũ ndĩ mũũgĩ. Nĩ ngweheria mĩhaka ya ikundi cia andũ Na ndĩcitunye mĩthithũ yacio, Na ndoorie aikari a kuo o ta njamba ĩrĩ hinya.
O ta ũrĩa mũndũ akinyagĩra gĩtara, Guoko gwakwa nĩ gũgaakinyĩra ũtonga wa ikundi icio cia andũ; Na o ta ũrĩa mũndũ acokanagĩrĩria matumbĩ matiganĩirio, Nĩ ngaacokanĩrĩria thĩ yothe! Gũtirĩ mũndũ o na ũmwe ũkaabatabatia mathagu make kana athamie kanua gake kana arie na mĩhehũ.’”
Kaĩ ithanwa rĩngĩĩtũũgĩria igũrũ rĩa ũrĩa ũtemaga narĩo? Kaĩ thoo ĩngĩĩtũũgĩria igũrũ rĩa ũrĩa ũrengaga nayo? Kaĩ mũkwanjũ ũngĩhiũria mũndũ ũrĩa ũwoyaga na igũrũ? Kana hihi rũthanju no ruoe na igũrũ ũrĩa ũtathondeketwo na mũtĩ?
Nĩ ũndũ ũcio Mwathi, Yahweh mũnene wa ita, Nĩ agaatũma andũ ake arĩa anoru mahĩnje, Na rungu rwa riri wake aakie mwaki ũrarĩrĩmbũka.
Ũtheri wa Isiraeli ũgaatuĩka mwaki, Na Ũrĩa Mwamũre wake atuĩke rũrĩrĩmbĩ; Ũgaakana na ũcine ria rĩake o na ihinga ciake cia mĩigua o mũthenya ũmwe.
Nĩ akaaniina biũ riri wa mũtitũ wake na mũgũnda wake wa matunda; Gũkaahaana o ta ũrĩa mũndũ mũrũaru ahinyĩrĩrĩkaga.
Nayo mĩtĩ ĩrĩa ĩgaatigara ya mũtitũ wake Ĩgaakorũo ĩrĩ mĩnini ũndũ kahĩĩ kangĩhota kũmĩtara.
Mũthenya ũcio andũ arĩa magaatigara a Isiraeli Na arĩa makaahonoka a nyũmba ya Jakubu Matigaacoka gwĩtiirĩrĩra harĩ ũrĩa wamahũũrire; No magetiiragĩrĩra harĩ Yahweh, Ũrĩa Mwamũre wa Isiraeli, marĩ na ũhoro wa ma.
No matigari tu magaacoka, Matigari ma Jakubu, nĩ magaacokerera El Mwene-Hinya.
Tondũ o na gũtuĩka andũ aku, wee Isiraeli, Nĩ aingĩ o ta mũthanga wa iria, No matigari tu magaacoka. Nĩ matuĩrĩirũo kũniinwo, Na nĩ makaiyũrĩrĩrũo nĩ ũthingu.
Na kũniinwo kũu gũtuĩtwo nĩ Mwathi, Yahweh mũnene wa ita, Gũgaakinyĩra bũrũri ũcio wothe.
Nĩ ũndũ ũcio Mwathi, Yahweh mũnene wa ita ekuuga ũũ: “Inyuĩ andũ akwa arĩa matũũraga Zayuni, mũtikaigue guoya nĩ ũndũ wa Mũashuri, ũrĩa wamũhũũraga na rũthanju na akoya mũkwanjũ na igũrũ nĩguo amũũkĩrĩre o ta ũrĩa mwekagwo nĩ Misiri
Nĩ gũkorũo thutha wa ihinda inini mũno mang’ũrĩ makwa nĩ megũkinya mũthia; marakara makwa nĩ mekwerekerio kũrĩ o, nĩguo maniinwo
Yahweh mũnene wa ita nĩ akamũhũũra na kĩboko, o ta ũrĩa eekire rĩrĩa aahootire Midiani rwaro-inĩ rwa ihiga rwa Orebu. Na mũkwanjũ wake ũkorũo ũrĩ igũrũ rĩa iria, na nĩ akaawoya na igũrũ o ta ũrĩa eekire Misiri.
Mũthenya ũcio mũrigo wake nĩ ũkeehera kĩande-inĩ gĩaku, Narĩo icoki rĩake rĩehere ngingo-inĩ yaku, Na icoki rĩu nĩ rĩkoinĩka nĩ ũndũ wa maguta.”
Nĩ athiĩte Aiathu; Na agatuĩkanĩria Migironi; Nakuo Mikimashi akaiga mũrigo wake.
Nĩ maringĩire iringĩro-inĩ; Na makararĩrĩra Geba; Rama nĩ kũinaina kũrainaina, nayo Gibea ya Saulu ĩkoora.
Ugĩrĩria na uuge mbu, wee mwarĩ wa Galimu! Thikĩrĩria, wee Laishi! O nawe Anathothi!
Madimena nĩ yũrĩte. Nao aikari a Gebimu magacaria gwa kwĩgitia.
Mũthenya wa ũmũthĩ nĩ ekũrũgama Nobu. Arathukathukĩra ngundi kĩrĩma-inĩ kĩa mwarĩ wa Zayuni, Karĩma-inĩ ka Yahrushalayim.
Na rĩrĩ, Mwathi, Yahweh mũnene wa ita, Nĩ gũtema aratema honge na hinya mũnene; Nayo mĩtĩ ĩrĩa mĩraihu biũ akamĩtema ĩkagũa thĩ, Na ĩrĩa mĩtũũgĩru ĩkanyihio.
Aratema ihinga cia mĩtitũ na kĩndũ gĩa kĩgera, Na Lebanoni ĩkaagũithio nĩ njamba ĩrĩ hinya.