Isaiya 9

No rĩrĩ, gũtigũkorwo na ihooru harĩ ũcio ũtangĩkĩte torĩa hau kabere-inĩ Anyihirie bũrũri wa Zebuluni na bũrũri wa Nafitali o hanini, na thutha ũcio agĩcoka Akĩmahinyĩrĩria mũno, kuma kũrĩa kũng'etheire iria, gwata mũkĩra ũrĩa ũngĩ wa Jorodani, o nginya Galili kwa andũ a ndũrĩrĩ.

Andũ arĩa marathiagĩra nduma-inĩ Nĩ monete ũtheri mũnene. Nao arĩa matũũraga bũrũri wa kĩĩruru gĩa gĩkuũ, Ũtheri nĩ ũmaarĩire.

Wee nĩ ũgatũma rũrĩrĩ rũu rũthegee; Nĩ ũgatũma gĩkeno kĩaruo kĩingĩhe mũno. Magakenaga marĩ mbere yaku O ta ũrĩa andũ makenaga hĩndĩ ya magetha, O ta ũrĩa arũme makenaga makĩgayana indo iria itahĩtwo.

Tondũ nĩ ũkahehenja icoki rĩa mũrigo wao, Rũthanju rũrĩa rũrĩ ciande-inĩ ciao, mũkwanjũ wa mũrũgamĩrĩri wa wĩra, O ta mũthenya wa Midiani.

Kĩratũ o gĩothe kĩrĩa gĩkubagia thĩ munĩko-inĩ wa ũgwati Na nguo o yothe ĩihũgĩtio nĩ thakame, igaatuĩka ta ngũ cia mwaki na maguta ma tawa.

Nĩ gũkorũo nĩ tũgaciarĩrwo kana, Nĩ tũheetwo mũriũ; Na wathani nĩ ũgaaikara kĩande-inĩ gĩako. Gageetagwo Magegania, Mũtaarani, El Mwene-Hinya, Ithe wa ũtũĩire kuo, Mũnene wa Thayũ.

Ha ũhoro wa kuongerereka kwa wathani wake O hamwe na thayũ, gũtigaakorũo na mũthia, Gĩtĩ-inĩ kĩa ũnene kĩa Daudi na ũthamaki-inĩ wake Nĩguo wĩhande ũrũmĩte wega na ũtũũre Kũgerera matua ma cira marũngĩrĩru na ũthingu, Kuuma rĩu nginya tene na tene. Kĩyo kĩa Yahweh mũnene wa ita nĩkĩo gĩgeeka ũguo.

Yahweh nĩ aatũmire kiugo gĩa gũũkĩrĩra Jakubu, Na nĩ gĩkinyĩrĩire Isiraeli.

Nao andũ othe nĩ magaakĩmenya —Efiraimu na aikari a Samaria— Arĩa moigaga ũũ marĩ na mwĩtĩo na momĩtie ngoro:

“Maturubarĩ nĩ magũĩte, No tũgwaka na mahiga maicũhie. Mĩtĩ ya mĩkũyũ nĩ ĩtemetwo, No ithenya rĩayo tũkũhũthĩra mĩtarakwa.”

Yahweh nĩ akaarahũra thũ cia Rezini imũũkĩrĩre Na atũme thũ ciake cioe ikinya,

Siria ĩkooima mwena wa irathĩro nao Afilisti moime mwena wa ithũĩro, Matharĩkĩre Isiraeli maathamĩtie tũnua. Nĩ ũndũ wa maũndũ macio mothe, marakara make matirĩ marathira, Na no atambũrũkĩtie guoko gwake nĩguo ahũũrane.

Nĩ gũkorũo andũ matirĩ maracokerera Ũrĩa ũmahũũraga; Matirĩ maracaria Yahweh mũnene wa ita.

Thĩinĩ wa mũthenya ũmwe Yahweh nĩ agaatinia Mũtwe na mũting’oe, thuuna o na nyeki thĩinĩ wa Isiraeli.

Mũndũ ũrĩa mũkũrũ na ũheetwo gĩtĩo nĩwe mũtwe, Nake mũnabii ũrĩa ũheanaga ũtaaro wa maheeni nĩwe mũting’oe.

Arĩa matongoragia andũ aya nĩ matũmaga macangacange, Nao arĩa matongoragio nĩ ahĩngĩcanĩre.

Nĩkĩo Yahweh atagaakenio nĩ anake ao, Na ndakaiguĩra tha ciana ciao cia ngoriai o hamwe na atumia ao a ndigwa Nĩ gũkorũo othe nĩ aregenyũki na eki maũndũ moru Tũnua twao twaragia o maũndũ mahĩtanu. Nĩ ũndũ wa maũndũ macio mothe, marakara make matirĩ marathira, Na no atambũrũkĩtie guoko gwake nĩguo ahũũrane.

Tondũ waganu ũcinaga o ta mwaki, Ũkaniina ria na ihinga cia mĩigua. Nĩ ũgaacina ihinga cia mĩtitũ, Na ndogo yaguo yambate ĩtariĩ ta matu.

Nĩ ũndũ wa marakara manene ma Yahweh mũnene wa ita Bũrũri nĩ ũcinĩtwo na mwaki, Nao andũ magaatuĩka ta ngũ cia mwaki. Gũtirĩ mũndũ ũgaacaĩra o na mũrũ wa nyina.

Mũndũ nĩ agaatinia mwena wa ũrĩo Ĩndĩ no agaathiĩ na mbere kũhũta; Nake ũngĩ arĩe mwena wa ũmotho Ĩndĩ ndakaahũna. O ũmwe wao nĩ agaatambura nyama ya guoko gwake mwene,

Manase nĩ agaatambura Efiraimu, Nake Efiraimu atambuure Manase. Marĩ hamwe nĩ magookĩrĩra Yahuda. Nĩ ũndũ wa maũndũ macio mothe, marakara make matirĩ marathira, Na no atambũrũkĩtie guoko gwake nĩguo ahũũrane.