Isaiya 8

Nake Yahweh akĩnjĩra atĩrĩ: “Oya kĩhengere kĩnene na ũkĩandĩke ‘Maheri-shalali-hashi-bazu,’ ũkĩhũthĩra karamu ga kwandĩka

Na niĩ nĩ ngũtũma ũhoro ũcio wĩkĩrũo mũkonde na njĩra ya maandĩko nĩ aira ehokeku, nĩo Uria mũthĩnjĩri-Yahweh na Zakaria mũrũ wa Jeberekia.”

Thutha ũcio ngĩkoma na mũtumia wakwa ũcio mũnabii, nake akĩgĩa ihu na thutha wa ihinda agĩciara kahĩĩ. Yahweh agĩcoka akĩnjĩra ũũ: “Ĩta kahĩĩ kau Maheri-shalali-hashi-bazu,

nĩ gũkorũo o na gatamenyete gwĩtana, ‘Baba’ na ‘Mami’ ũtonga wa Dameski na indo cia gũtahwo cia Samaria nĩ igaatwarũo mbere ya mũthamaki wa Ashuri.”

Yahweh akĩnjarĩria o rĩngĩ akĩnjĩra:

“Tondũ andũ aya nĩ maregete maĩ marĩa mathereraga mahooreire ma Shiloa Na magakena mũno nĩ ũndũ wa Rezini na nĩ ũndũ wa mũrũ wa Remalia,

Nĩ ũndũ ũcio, Yahweh nĩ akaamarehithĩria Maĩ marĩ hinya na maingĩ ma Rũũĩ, Mũthamaki wa Ashuri na riri wake wothe. Nake nĩ agooka igũrũ rĩa tũrũũĩ twake tuothe Na aiyũrĩrĩre hũgũrũrũ-inĩ ciake ciothe

Na athiĩ ahaatĩte Yahuda. Akaaiyũra na atuĩkanie, akorũo akinyĩte ngingo-inĩ; Mathagu make marĩa matambũrũku namo maiyũre wariĩ wa bũrũri waku, Wee Imanueli!”

Inyuĩ ikundi ici cia andũ, gerai ngero, no nĩ mũkaamemendwo. Thikĩrĩriai, inyuĩ inyuothe mũrĩ kũndũ kũraihu thĩinĩ wa thĩ Mwĩhaarĩriei nĩ ũndũ wa mbaara, no nĩ mũkaamemendwo! Mwĩhaarĩriei nĩ ũndũ wa mbaara, no nĩ mũkaamemendwo!

Bangai mũbango, no nĩ ũgaatharario! Ugai maũndũ marĩa mwendete, no matikagaacĩra, Nĩ gũkorũo El arĩ hamwe na ithuĩ!

Yahweh aanjigĩrĩire guoko gwake kũrĩ hinya, akĩngaania ndikae kũrũmĩrĩra mĩthiĩre ya andũ aya akĩnjĩra ũũ:

“Ũndũ ũrĩa andũ aya metaga njama mũtikanawĩte njama! Mũtikanetigĩre ũndũ ũrĩa metigĩrĩte; Mũtikanainainio nĩguo.

Yahweh mũnene wa ita—Nĩwe mwagĩrĩirũo kuona arĩ mwamũre, Nĩwe mwagĩrĩirũo gwĩtigĩra, Na Nĩwe wagĩrĩire gũtũma mũinaine.”

Nake agaatuĩka ta handũ hamũre, Na o ta ihiga rĩa kũgũithia mũndũ Ningĩ o ta rwaro rwa ihiga rwa kũhĩngithia Harĩ nyũmba cierĩ cia Isiraeli, O ta mũtego na gĩterenge Harĩ aikari a Yahrushalayim.

Aingĩ ao nĩ makaahĩngwo na magũe na moinĩke; Nĩ magaategwo na manyitwo.

Kũnja ũira ũcio mwandĩke; Hingĩra watho ũcio gatagatĩ-inĩ ka arutwo akwa!

Ngũikara njetereire Yahweh, o ũcio ũhithĩte nyũmba ya Jakubu ũthiũ wake, na njige kĩĩrĩgĩrĩro gĩakwa harĩ we.

Na rĩrĩ, niĩ o hamwe na ciana iria Yahweh aheete tũhaana o ta imenyithia na o ta ciama thĩinĩ wa Isiraeli kuuma kũrĩ Yahweh mũnene wa ita, ũrĩa ũikaraga Kĩrĩma-inĩ gĩa Zayuni.

Na mangĩkwĩra atĩrĩ: “Tuĩria ũhoro harĩ arĩa maragia na maroho kana arĩa marathagĩra andũ maũndũ o acio maragia na tũmĩgambo tũceke na makang’ung’ua,” na githĩ andũ matiagĩrĩirũo gũtuĩria ũhoro harĩ Kĩhoti wao? Hihi nĩ magĩrĩirũo gũtuĩria ũhoro harĩ andũ akuũ nĩ ũndũ wa arĩa marĩ muoyo?

Handũ ha ũguo, magĩrĩirũo gũtuĩria ũhoro wa Watho na wa Ũira ũrĩa mwandĩke! Rĩrĩa maga kwaria kũringana na kiugo gĩkĩ, matikoragwo na ũtheri thĩinĩ wao.

Na o ũmwe wao nĩ agaatuĩkanĩria bũrũri anyamarĩkĩte na ahũtiĩ; na tondũ agaakorũo ahũtiĩ na arakarĩte, nĩ akaaruma mũthamaki wao na Kĩhoti wao, acoke arore igũrũ.

Acoke arore na thĩ one mĩtangĩko mĩtheri o na nduma, marundurundu na mahinda maritũ, nduma gũtarĩ na ũtheri.