Isaiya 11

Na rĩrĩ, rũhonge nĩ rũgaakũra kuuma gĩthukĩ-inĩ kĩa Jesii, Na thuuna kuuma mĩri-inĩ yake ĩrute maciaro.

Naguo roho wa Yahweh nĩ ũgaaikara igũrũ rĩake, Roho wa ũũgĩ na wa ũtaũku, Roho wa ũtaarani na wa ũhoti, Roho wa ũmenyo na wa gwĩtigĩra Yahweh.

Na nĩ agaakenagĩra gwĩtigĩra Yahweh. Ndagaatuanĩra ciira kũgerera maũndũ marĩa arona na maitho make, Kana arũnge andũ kũringana na maũndũ marĩa matũ make maigua.

Agaatuĩra andũ arĩa matarĩ hinya na njĩra ya kĩhooto, Na agaakanania arĩ na ũrũngĩrĩru nĩ ũndũ wa andũ arĩa ahooreri a thĩ. Nĩ akaahũũra thĩ na rũthanju rwa kanua gake Na orage arĩa aganu akĩhũthĩra mĩhũmũ ya mĩromo yake.

Ũthingu nĩguo ũgaatuĩka mũcibi wa njohero yake, Na wĩhokeku ũtuĩke mũcibi wake wa kwĩhotora.

Njũi nĩ ĩgaaikaranagia na kagondu, Nayo ngarĩ na koori igakoma hamwe, Na njaũ na mũrũthi na nyamũ ĩrĩa norie igaakoragwo hamwe ciothe; Na igaatongoragio nĩ kaana kanini.

Ng’ombe na nduba ikaarĩaga hamwe, Na twana twacio tũgakoma hamwe. Naguo mũrũthi ũkaarĩaga nyeki o ta ndegwa.

Kaana ga kuonga gagaathaakagĩra irima-inĩ rĩa nduĩra, Na kaana gatigĩte kuonga gakaaiga guoko gwako kĩmamo-inĩ kĩa nyoka ĩrĩ thumu.

Itikaagerana ngero o na hanini, Kana irehe mwanangĩko o wothe kĩrĩma-inĩ gĩakwa kĩrĩa kĩamũre gĩothe, Tondũ hatarĩ nganja thĩ nĩ ĩkaaiyũrũo nĩ ũmenyo wĩgiĩ Yahweh O ta ũrĩa maĩ mahumbagĩra iria.

Mũthenya ũcio mũri wa Jesii nĩ ũkaarũgama ũtuĩke kĩmenyithia harĩ ikundi cia andũ. Ndũrĩrĩ nĩ igaacaria ũtongoria harĩ we, Na kĩhurũko gĩake nĩ gĩkaagĩa na riri.

Na rĩrĩ, mũthenya ũcio Yahweh nĩ agaatambũrũkia guoko gwake riita rĩa kerĩ, nĩguo acokie matigari ma andũ ake arĩa matigarĩte kuuma Ashuri, kuuma Misiri, kuuma Patherosi, kuuma Kushi, kuuma Elamu, kuuma Shinaru, kuuma Hamathu, na kuuma icigĩrĩra-inĩ cia iria

Nĩ akaahanda kĩmenyithia nĩ ũndũ wa ndũrĩrĩ na acokanĩrĩrie andũ a Isiraeli arĩa mahurunjũkĩte, ningĩ acokanĩrĩrie andũ a Yahuda arĩa mahurunjũkĩte kuuma kona-inĩ iria inya cia thĩ.

Ũiru wa Efiraimu nĩ ũgaakorũo ũthirĩte, Na arĩa mokagĩrĩra Yahuda nĩ makaaniinwo. Efiraimu ndakaiguĩra Yahuda ũiru, Kana Yahuda okĩrĩre Efiraimu.

Nao nĩ makaaharũrũka hũgũrũrũ-inĩ cia Afilisti mwena wa ithũĩro; Marĩ hamwe nĩ magaataha andũ a mwena wa Irathĩro. Nĩ magaatambũrũkia guoko kwao mokĩrĩre Edomu na Moabi, Nao Aamoni magaatuĩka a gwathagwo nĩo.

Yahweh nĩ akaagayania iria rĩa Misiri harĩa rĩcomokete Na acũgie guoko gwake igũrũ rĩa Rũũĩ. Nĩ akaahũthĩra mĩhũmũ yake mĩhiũ arũgũthe tũrũũĩ-inĩ twaruo mũgwanja, Na atũme andũ makĩranĩrie kuo mekĩrĩte iratũ.

Na nĩ gũgaakorũo na barabara nene kuuma Ashuri nĩ ũndũ wa matigari ma andũ ake arĩa matigarĩte, Ta ĩrĩa yarĩ kuo nĩ ũndũ wa Isiraeli mũthenya ũrĩa ooimire bũrũri wa Misiri.