Isaiya 13

Ĩno nĩ ndũmĩrĩri nditũ ĩrĩa Isaiya mũrũ wa Amozu oonire kũgerera kĩoneki ĩkoniĩ Babuloni:

“Handai kĩmenyithia kĩrĩma-inĩ kĩrĩ na mahiga matheri. Maanĩrĩrei, mũmahenerie na guoko, Nĩguo matonyere ihingo-inĩ cia arĩa marĩ igweta.

Nĩ njathĩte andũ arĩa nyamũrĩte. Nĩ njĩtĩte njamba ciakwa cia ita nĩguo cionanie marakara makwa, Icio ikenaga irĩ na mwĩtĩo.

Ta thikĩrĩriai! Mũigue kĩrĩndĩ kĩrĩ irĩma-inĩ; Kĩraiguĩka ta arĩ kĩrĩndĩ kĩa andũ aingĩ! Ta thikĩrĩriai! Inegene rĩa ngũĩ rĩa mothamaki, Rĩa ndũrĩrĩ irũrũnganĩte hamwe! Nĩ Yahweh mũnene wa ita ũracokanĩrĩria mbũtũ nĩ ũndũ wa mbaara.

Marooka moimĩte bũrũri wa kũraya, Kuuma ituri-inĩ cia kũrĩa igũrũ, Yahweh na matharaita ma marakara make, Nĩguo arehe mwanangĩko thĩinĩ wa thĩ yothe.

Rĩrai, nĩ gũkorũo mũthenya wa Yahweh ũrĩ hakuhĩ! Ũgooka ũtariĩ ta mwanangĩko kuuma kũrĩ El Shaddai.

Nĩkĩo moko mothe makoorũo nĩ hinya, Na ngoro ya mũndũ wothe ĩtweke nĩ ũndũ wa guoya.

Andũ nĩ mamakĩte mũno. Maretugutania marĩ na ruo, O ta mũtumia ũragĩa mwana. Makarorana marĩ na kĩmako kĩnene, Na mothiũ magĩakanaga nĩ ũndũ wa kĩeha.

Na rĩrĩ, mũthenya wa Yahweh nĩ ũroka, Ũũke ũtarĩ na tha na ũrĩ na mang’ũrĩ o hamwe na marakara mahiũ, Nĩguo ũtũme bũrũri ũtuĩke kĩndũ gĩa kũguoyohia, Na ũniine ehia mathire thĩinĩ waguo.

Nĩ gũkorũo njata cia igũrũ o na ikundi ciacio Itikaruta ũtheri wacio; Riũa rĩkĩratha rĩgaakorũo rĩrĩ na nduma, Naguo mweri ndũkaaruta ũtheri waguo.

Nĩ ngaciirithia thĩ ĩrĩa ĩikaragwo nĩ ũndũ wa ũũru wayo, Na andũ arĩa aganu nĩ ũndũ wa mahĩtia mao. Nĩ ngaanina mwĩtĩo wa arĩa metũũgagĩria, Na nyihie mwĩtĩo wa arĩa matarĩ tha.

Nĩ ngaatũma ũkorũo ũrĩ ũndũ mũritũ kuona mũndũ gũkĩra kuona thahabu therie, Na ũkorũo ũrĩ ũndũ mũritũ kuona andũ gũkĩra kuona thahabu ya Ofiri.

Nĩkĩo ngaatũma igũrũ rĩinaine, Nayo thĩ ĩthingithe yehere harĩa ĩkoragwo Nĩ ũndũ wa mang’ũrĩ ma Yahweh mũnene wa ita mũthenya wa marakara make mahiũ.

O ta thiya yumbuthũrĩtwo na ota ng'ondu ĩtarĩ mwene, Noguo o mũndũ agaacoka kũrĩ andũ ao; O mũndũ akoora acoke bũrũri wao.

Mũndũ wothe ũkooneka agaathecwo atũrĩkanio, Na ũrĩa wothe ũkaanyitwo akooragwo na rũhiũ rwa njora.

Ciana ciao ikaabacanio ituĩke icunjĩ makĩĩyonagĩra, Na indo cia nyũmba ciao ciiywo, Na aka ao manyitwo kĩa hinya.

Nĩ ngaarahũra Amedia nĩguo mamokĩrĩre, O acio matonaga betha ta arĩ kĩndũ Na matakenagio nĩ thahabu.

Mota mao nĩ makaaniina anake; Matigaacaĩra maciaro ma nda O na kana maiguĩre ciana tha.

Na itũũra rĩa Babuloni, rĩrĩa rĩrĩ riri mũno gũkĩra mothamaki marĩa mangĩ, O rĩo ũthaka na mwĩraho wa Akalidei, Rĩgaatuĩka o ta Sodomu na Gomora rĩrĩa Kĩhoti aacing’aũranirie.

Gũtirĩ hĩndĩ rĩgaikarũo o na rĩ, O na kana rĩtuĩke kũndũ gwa gũtũũrũo njiarũa-inĩ ciothe. Gũtirĩ Mũarabu ũkaamba hema yake kuo, O na gũtirĩ arĩithi makaahurũkia ndũũru ciao kuo.

Nyamũ cia werũ-inĩ nĩcio igaakomaga kuo; Nacio nyũmba ciao ikaaiyũra ndundu. Nyaga igaaikaraga kuo, Na mbũri cia gĩthaka igaatũhagĩra kuo.

Nyamũ iria igambaga ikaarĩragĩra nyũmba-inĩ ciakuo iria ndaya, Nacio ngui cia gĩthaka nyũmba-inĩ ciakuo iria njega cia athamaki. Ihinda rĩa itũũra rĩu nĩ rĩkuhĩrĩirie, na matukũ ma rĩo matikongererũo.”