Isaiya 15

Ĩno nĩ ndũmĩrĩri nditũ ĩkoniĩ Moabi: Tondũ nĩ rĩanangĩtwo na ũtukũ ũmwe, Itũũra rĩa Ari kũu Moabi nĩ rĩkirĩtio. Tondũ nĩ rĩanangĩtwo na ũtukũ ũmwe, Itũũra rĩa Kiri kũu Moabi nĩ rĩkirĩtio.

Nĩ ambatĩte agathiĩ Nyũmba-inĩ na agathiĩ Diboni, Agathiĩ kũndũ gũtũũgĩru kũrĩrĩra kuo. Moabi nĩ ĩrarĩra nĩ ũndũ wa Nebo na nĩ ũndũ wa Medeba. Mĩtwe yothe nĩ mĩenje kĩhara, nderu ciothe ikenjwo ikahinya.

Marĩ njĩra-inĩ ciakuo mehumbĩte nguo cia makũnia. Na marĩ nyũmba-inĩ ciao igũrũ na ihaaro-inĩ ciao cia mũingĩ othe no kũrĩra; Maraikũrũka thĩ o makĩrĩraga.

Heshiboni na Eleale irarĩra cianĩrĩire; Mũgambo wacio ũraiguĩka o nginya Jahazu. Nĩkĩo andũ a Moabi arĩa meyohete indo cia mbaara maraikara makiugagĩrĩria. Nĩ kũinaina arainaina.

Ngoro yakwa nĩ ĩrarĩra nĩ ũndũ wa Moabi. Andũ arĩa metharĩte makoima kuo morĩte magathiĩ nginya Zoaru na Egilathu-shelishiya. Mwambato-inĩ wa Luhithu marambata makĩrĩraga; Marĩ njĩra-inĩ merekeire Horonaimu mararĩra nĩ ũndũ wa mwanangĩko ũcio.

Nĩ gũkorũo maĩ ma Nimurimu nĩ mahũĩte; Na nyeki nduru ĩkoma, Nyeki nĩ ĩthirĩte na gũtirĩ kĩndũ kĩruru gĩtigarĩte.

Nĩkĩo marakuua kĩrĩa gĩtigarĩte makũmbĩ-inĩ mao na kĩa ũtonga wao; Mararinga mũkuru wa mĩtĩ ya mĩcũgũcũgũ.

Tondũ kĩrĩro kĩu kĩraiguĩka matũũra-inĩ mothe ma Moabi. Kĩrĩro kĩu kĩrakinya nginya Egilaimu; Kĩrĩro kĩu kĩrakinya nginya Biri-elimu.

Nĩ gũkorũo maĩ ma Dimoni maiyũrĩte thakame, Na nĩ ngũrehera Dimoni maũndũ mangĩ: Mũrũthi harĩ andũ arĩa metharĩte kuuma Moabi Na harĩ arĩa matigarĩte bũrũri-inĩ ũcio.