Isaiya 38

Matukũ-inĩ macio Hezekia nĩ aarũarire na aarĩ hakuhĩ gũkua. Nake mũnabii Isaiya mũrũ wa Amozu agĩũka kũrĩ we akĩmwĩra, “Ũũ nĩguo Yahweh oigĩte: ‘Arĩria andũ a nyũmba yaku, tondũ nĩ ũgũkua; ndũkũhona.’”

Hezekia aigua ũguo, akĩhũgũra ũthiũ wake akĩrora rũthingo-inĩ na akĩambĩrĩria kũhoya Yahweh akiuga ũũ:

“Yahweh ndagũthaitha, ririkana ũrĩa ngoretwo ngĩtwarana nawe ndĩ mwĩhokeku na ngoro yakwa yothe, na ngeka maũndũ marĩa mega maitho-inĩ maku.” Hezekia akĩambĩrĩria kũrĩra na kĩrĩro kĩnene.

Nakĩo kiugo kĩa Yahweh gĩgĩkinyĩra Isaiya akĩrũo ũũ:

“Coka wĩre Hezekia atĩrĩ, ‘Ũũ nĩguo Yahweh Kĩhoti wa Daudi thoguo oigĩte: “Nĩ njiguĩte mahoya maku. Nĩ nyonete maithori maku. Na nĩ nguongerera ũtũũro waku mĩaka 15,

na nĩ ngũkũhonokia na honokie itũũra rĩrĩ kuuma guoko-inĩ kwa mũthamaki wa Ashuri, na ngitĩre itũũra rĩrĩ

Gĩkĩ nĩkĩo kĩmenyithia kuuma kũrĩ Yahweh gĩa gũkuonia atĩ Yahweh nĩ ekũhingia kiugo kĩrĩa oigĩte:

Nĩ ngũtũma kĩĩruru kĩa riũa kĩrĩa gĩikũrũkĩte ngathĩ-inĩ ya Ahazu gĩcoke thutha makinya ikũmi.”’” Nĩ ũndũ ũcio riũa rĩgĩcoka na thutha makinya ikũmi ngathĩ-inĩ ĩyo marĩa rĩarĩkĩtie gũikũrũka.

Maya nĩmo maandĩko ma Hezekia Mũthamaki wa Yahuda rĩrĩa aarũarire na akĩhona.

Ndoigire ũũ: “O rĩrĩ ũtũũro wakwa ũrĩ gatagatĩ No mũhaka ndonye ihingo-inĩ cia Mbĩrĩra. Nĩ ngũtunywo mĩaka yakwa ĩrĩa ĩtigarĩte.”

Ngiuga atĩrĩ: “Ndikona Yahu, o we Yahu thĩinĩ wa bũrũri wa arĩa marĩ muoyo. Ndikarora andũ rĩngĩ Rĩrĩa ndĩ hamwe na aikari a kũndũ kũrĩa indo ciothe ithiraga.

Gĩikaro gĩakwa mwene nĩ gĩthaamie na gĩkeherio harĩ niĩ O ta hema ya mũrĩithi. Nĩ ngũnjĩte ũtũũro wakwa o ta mũtumi wa nguo; Andinagia o ta ndigi cia kũrũgama. Kuuma mũthenya nginya ũtukũ ũikaraga ũkĩniinaga o kũniina.

Ndĩĩhooragĩria o nginya rũcinĩ. O ta mũrũthi, aikaraga o akiunangaga mahĩndĩ makwa mothe; Kuuma mũthenya nginya ũtukũ ũikaraga ũkĩĩniinaga o kũũniina.

O ta thũngũrũrũ kana nyamĩndigi, njikaraga ngĩgambaga na kamũgambo gaceke; Njikaraga ngĩgambaga ta ndutura. Maitho makwa makoragwo manogete nĩ kũrora igũrũ: "Mwathi, ndĩ na mĩtangĩko mĩingĩ mũno; Ndagũthaitha ndeithia!’

Nĩ atĩa ingĩkiuga? Nĩ anjarĩirie na akoya ikinya. Ndĩrĩthiaga ndĩnyihĩtie mĩaka yakwa yothe Nĩ ũndũ wa mĩtangĩko yakwa mĩnene.

‘Wee Yahweh, andũ othe matũũraga muoyo nĩ ũndũ wa maũndũ macio, Na maũndũ-inĩ macio nĩho muoyo wakwa ũrĩ. Nĩ ũgũtũma njokwo nĩ ũgima mwega wa mwĩrĩ na ũndũũrie muoyo.

Oneei, ithenya rĩa thayũ, ndĩrarĩ na marũrũ manene; Ĩndĩ nĩ ũndũ wa wendo waku harĩ niĩ, Nĩ ũrahonokirie kuuma harĩ irima rĩa kwanangwo. Nĩ ũikĩtie mehia makwa mothe thutha waku.

Tondũ Mbĩrĩra ndĩngĩhota gũgũtũũgĩria, Gĩkuũ gĩtingĩhota gũkũgooca. Arĩa maikũrũkaga irima matingĩgĩa na kĩĩrĩgĩrĩro harĩ wĩrĩgĩrĩro ũhoro-inĩ waku wa ma.

Arĩa marĩ muoyo, o acio marĩ muoyo no magũkumagie, O ta ũrĩa ndĩreka ũmũthĩ. Mũthuri no ahe ariũ ake ũmenyo wĩgiĩ ũhoro waku wa ma.

Ndagũthaitha Yahweh, ũũhonokie, Na nĩ tũrĩinaga nyĩmbo ciakwa na inanda cia ndigi Matukũ mothe ma muoyo wakwa ndĩ nyũmba-inĩ ya Yahweh.’”

Isaiya agĩcoka akiuga ũũ: “Rehei ngũmba ya ngũyũ iria hihe na nyũmithie mũmũhake ihũha, nĩgetha ahone.”

Hezekia oorĩtie atĩrĩ: “Kĩmenyithia kĩa atĩ nĩ ngaambata thiĩ nyũmba ya Yahweh nĩ kĩrĩkũ?”