Isaiya 40

Atĩrĩrĩ, "ta hooranĩriai! Hooreriai andũ akwa,” ũguo nĩguo Kĩhoti wanyu ekuuga.

“Arĩriai itũũra rĩa Yahrushalayim maũndũ ma kũrĩhoreria ngoro, Na mũrĩmenyithie atĩ wĩra warĩo wa kũrutithio kĩa hinya nĩ ũkinyĩte mũthia, Na nĩ rĩrĩkĩtie kũherithio nĩ ũndũ wa mahĩtia ma rĩo. Kuuma guoko-inĩ kwa Yahweh nĩ rĩamũkĩrĩte mũcara wa mehia ma rĩo mothe.”

Harĩ mũgambo wa mũndũ ũranĩrĩra werũ-inĩ ũkoiga: “Thondekai njĩra ya Yahweh! Thondekai njĩra nene na nũngarũ ya Kĩhoti witũ ĩtuĩkanĩirie werũ-inĩ.

Mĩkuru yothe nĩ yambatĩrio, Na irĩma ciothe na tũrĩma ciaraganio. Nakuo kũrĩa gũtarĩ kũigananu no mũhaka kũigananio, Na kũrĩa gũtarĩ kwaraganu kwaraganio gũtuĩke mũkuru mwaraganu.

Naguo riri wa Yahweh nĩ ũkaaguũranĩrio, Na andũ othe nĩ makaawona marĩ hamwe, Nĩ gũkorũo kanua ka Yahweh nĩko koigĩte ũguo.”

Ta thikĩrĩria! Harĩ mũndũ ũroiga ũũ: “Anĩrĩra!” Nake ũngĩ akoria atĩrĩ: “Ngwanĩrĩra njuge atĩa?” “Andũ othe mahaana o ta nyeki nduru. O naguo ũthaka wao wothe ũhaana o ta mahũa ma gĩthaka.

Nyeki nĩ yũmaga, Namo mahũa makahooha, Tondũ wa kũhurutwo nĩ roho wa Yahweh. Ti itherũ andũ mahaana o ta nyeki.

Nyeki nĩ yũmaga, Namo mahũa makahooha, No kiugo gĩa Kĩhoti witũ gĩtũũraga tene na tene.”

Thiĩ wambate kĩrĩma-inĩ kĩraihu, Wee mũndũ-wa-nja ũyũ ũrarehera Zayuni ũhoro mwega. Anĩrĩra na hinya biũ, Wee mũndũ-wa-nja ũyũ ũrarehera Yahrushalayim ũhoro mwega. Anĩrĩra, ndũgetigĩre. Menyithia matũũra ma Yahuda atĩrĩ: “Taineei! Kĩhoti wanyu arĩ haha!”

Ta mwĩyonerei! Yahweh Mwathi nĩ agooka arĩ na hinya mũingĩ, Na guoko gwake nĩkuo gũgaathamaka nĩ ũndũ wake Mwĩrorerei! Ngerenwa yake arĩ nayo Naguo mũcara ũrĩa arĩhanaga wĩ mbere yake.

O ta mũrĩithi, nĩ akaarũmbũiya rũũru rwake. Natuo tũgondu atũcokanĩrĩrie na guoko gwake, Na atũkuue gĩthũri-inĩ gĩake. Nacio ng’ondu iria irongithia nĩ agaacitongoria o kahora.

Nũũ wanathima maĩ na rũhĩ rwake Na akĩgera igũrũ na wariĩ wa rũhĩ rwake? Nũũ wanacokanĩrĩria rũkũngũ rwa thĩ kĩbaba-inĩ gĩa gũthima Kana agathima irĩma na ratiri O natuo tũrĩma agatũthima na gĩthimi?

Nũũ wanathima roho wa Yahweh, Na nũũ ũngĩhota kũmũtaara arĩ ta mũtaarani wake?

Nũũ anahoya ũtaaro nĩguo agĩe na ũtaũku, Kana nũũ ũmũrutaga njĩra ya gũtua cira, Kana akamũruta kũgĩa na ũmenyo, Kana akamuonia njĩra ya ũtaũku wa ma?

Ndũrĩrĩ-rĩ, githĩ itihaana o ta itaata rĩa maĩ rĩrĩ ndoo-inĩ, Na cionagwo itariĩ o ta karũkũngũ kanini karĩ ratiri-inĩ! Na rĩrĩ, we oyaga icigĩrĩra na igũrũ o ta rũkũngũ rũhinyu.

Nginya Lebanoni gũtingĩhota gũtũma mwaki ũikare ũgĩakanaga, Na nyamũ ciakuo cia gĩthaka itingĩigana kũruta igongona rĩa njino.

Ndũrĩrĩ ciothe ihaana ta kĩndũ hatarĩ mbere yake; Acionaga irĩ tũhũ mũtheri, na itarĩ kĩene.

Hihi mũngĩringithania El na ũ? Nĩ mũhianĩre wa kĩĩ mũngĩmũhaanania naguo?

Bundi athondekaga mũhianano, Nake mũturi wa cuma akaũhumbĩra na thahabu, Na agatura tũmĩnyororo twa betha.

Athuuraga mũtĩ ũtuĩke mũhothi wake, Mũtĩ ũtangĩbutha. Agacaria bundi ũrĩ na ũũgĩ Nĩguo athondeke mũhianano wa gwacũhio ũrĩa ũtangĩgũa.

Kaĩ mũtarĩ mwamenya? Kaĩ mũtarĩ mwaigua? Kaĩ mũtarĩ mwerũo kuuma o kĩambĩrĩria? Kaĩ mũtarĩ mwataũkĩrũo kuuma rĩrĩa mĩthingi ya thĩ yathondekirũo?

Nĩ harĩ Ũrĩa ũikaraga igũrũ rĩa gĩthiũrũrĩ gĩa thĩ, Nao andũ arĩa maikaraga thĩinĩ wayo matariĩ o ta ndaahi. Igũrũ arĩtambũrũkagia o ta neti, Na akarĩtambũrũkia o ta hema ya gũikarũo.

Atũmaga anene matuĩke ta kĩndũ hatarĩ Nao atuanĩri ciira a gũkũ thĩ akamaagithia kĩene.

Nĩ hinya kũmahanda, Nĩ ũndũ ũrĩ hinya kũhanda mbeũ ciao, Mũri wao ndũrũmĩte thĩ wega, Na mangĩhuuhwo nĩ kũũma momaga, Naruo rũhuho rũkamakuua o ta maragara.

“Hihi niĩ mũngĩĩhaanania na ũ njiganane nake?” Ũguo nĩguo Ũrĩa Mwamũre ekuuga.

“Tiirai maitho manyu na igũrũ muone. Nũũ wombire indo icio? Nĩ Ũrĩa ũcitongoragia ta mbũtũ agĩcitaraga; Aciĩtaga ciothe na marĩĩtwa. Tondũ wa ũhoti wake mũingĩ na hinya wake wa magegania, Gũtirĩ o na ĩmwe yagaga.

Wee Jakubu, nĩ kĩĩ gĩtũmaga uuge, na wee Isiraeli, nĩ kĩĩ gĩtũmaga uuge atĩrĩ, ‘Njĩra yakwa nĩ ĩhithĩtwo kuuma kũrĩ Yahweh, Na ndionaga itua rĩrũngĩrĩru kuuma kũrĩ Kĩhoti wakwa’?

Kaĩ mũtarĩ mwamenya? Kaĩ mũtarĩ mwaigua? Yahweh, Mũũmbi wa ituri cia thĩ, nĩ Kĩhoti wa tene na tene. Ndarĩ hĩndĩ anogaga kana akorũo nĩ hinya. Ũtaũku wake gũtirĩ mũndũ ũngĩhota kũũtuĩria.

Nĩ aheaga mũndũ ũrĩa mũnogu hinya Nao arĩa morĩtwo nĩ hinya akamongerera ũhoti.

Tũmwana nĩ tũkaanoga na tũũrũo nĩ hinya, Nao anake nĩ makaahĩngwo na magũe,

No arĩa merĩgagĩrĩra Yahweh nĩ magaacokererũo nĩ hinya. Makombũkaga na mathagu o ta nderi. Magaateng’eraga na matiũrũo nĩ hinya; Magaathiaga na matinoge.”