Isaiya 44

“Rĩu ta thikĩrĩria, wee Jakubu ndungata yakwa, O nawe Isiraeli, o wee thuurĩte.

Ũũ nĩguo Yahweh ekuuga, O we watũmire ũkorũo kuo na nowe Ũrĩa wakũũmbire, Ũrĩa ũtũire agũteithagia kuuma rĩrĩa warĩ nda thĩinĩ: ‘Ndũgetigĩre, wee Jakubu ndungata yakwa, O nawe Jeshuruni, o wee thuurĩte.

Nĩ gũkorũo ũrĩa mũnyotu nĩ ndĩmũitagĩrĩria maĩ Na nĩ ngatũma kũrĩa kũũmũ gũtherere tũrũũĩ. Nĩ ngaaitĩrĩria mbeũ yaku roho wakwa O na kĩrathimo gĩakwa harĩ njiarũa ciaku.

Nacio ikaamera o ta irĩ nyeki-inĩ nduru, O ta mĩtĩ ya mĩcũgũcũgũ hakuhĩ na tũrũũĩ twa maĩ.

Ũmwe nĩ akoiga atĩrĩ: “Niĩ ndĩ wa Yahweh!” Nake ũngĩ eĩtanie na rĩĩtwa rĩa Jakubu, Nake ũngĩ eyandĩke ũũ guoko-inĩ gwake: “Ndĩ wa Yahweh!” Na ambĩrĩrie kwĩĩtania na rĩĩtwa rĩa Isiraeli.’

Ũũ nĩguo Yahweh oigĩte, O we Mũthamaki wa Isiraeli na Mũkũũri wake, Yahweh mũnene wa ita: ‘Niĩ nĩ niĩ wa mbere na nĩ niĩ wa mũico. Gũtirĩ Kĩhoti ũngĩ tiga niĩ.

Nũũ ũtariĩ ta niĩ? Nĩ aheane ũhoro na arute ũira wake kũrĩ niĩ! Kuuma rĩrĩa ndombire andũ arĩa maarĩ kuo tene, Nĩ moige ũhoro wa maũndũ marĩa magooka Na wa marĩa matarĩ marekĩka.

Mũtigetigĩre, Na mũtikainaine nĩ ũndũ wa guoya. Na githĩ inyuothe ndimwĩrĩte kabere na ngamenyithania maũndũ macio? Inyuĩ nĩ inyuĩ aira akwa. Hihi nĩ kũrĩ Eloah ũngĩ tiga niĩ? Aca, gũtirĩ Rwaro Rũngĩ rwa Ihiga; niĩ ndiũĩ rũngĩ.’”

Arĩa othe mathondekaga mĩhianano ya gwacũhio matirĩ kĩene, Na indo ciao iria mendete itigaakorũo na ũguni. Oo eene, nĩo magatuĩka aira a atĩ mĩhianano ĩyo ndĩrĩ kĩndũ yonaga na ndĩrĩ ũndũ ĩmenyaga, Kwoguo arĩa maamĩthondekire nĩ magaaconorithio.

Nũũ ũngĩthondeka hoti o na kana athondeke mũhianano wa cuma Ũrĩa ũtangĩkorũo na ũguni?

Oneei, arĩa othe manyitanagĩra nake nĩ magaaconorithio! Mabundi o nao no andũ tu. Othe nĩ macokanĩrĩre na marũgame. Nĩ makaanyitwo nĩ guoya na maconorithio marĩ hamwe.

Mũturi wa cuma arutagĩra kĩgera wĩra akĩigĩrĩire igũrũ rĩa makara akĩhũthĩra kĩndũ gĩake kĩa wĩra. Akamĩtura na nyundo, Akamĩrutĩra wĩra na guoko gwake kũrĩ hinya. Agacoka akahũta na akorũo nĩ hinya; Akaga kũnyua maĩ na akanoga.

Nake mũicũhia wa mĩtĩ atambũrũkagia rũrigi rwa gũthima, agacora na coka mũtune kĩrĩa arenda gwacũhia. Agakĩrutĩra wĩra akĩhũthĩra randa na agagĩkurura na kĩndũ gĩa gũcora gĩthiũrũrĩ. Agagĩthondeka gĩtariĩ ta mũndũ, Kĩgemete o ta mũndũ, Nĩguo gĩikarage nyũmba.

Nĩ harĩ mũndũ ũrutaga wĩra wa gũtema mĩtarakwa. Athuuraga mũtĩ wa mũthemba mũna, wa mũgandi, Na akareka ũkũre ũnenehe ũrĩ gatagatĩ-inĩ ka mĩtĩ ya mũtitũ. Akahanda mũtĩ wa mũraũra, nayo mbura ĩgatũma ũkũre.

Ũgacoka ũgatuĩka ngũ cia mũndũ cia gwakia mwaki. Akoya gĩcunjĩ kĩmwe kĩaguo nĩguo ote; Agakia mwaki na akaruga mũgate. No ningĩ agacoka agathondeka El na akamĩthathaiya. Akaũthondeka ũgatuĩka mũhianano wa gwacũhio, na akaũinamĩrĩra.

Nuthu yaguo akamĩcina mwaki-inĩ; Akahũthĩra nuthu ĩyo kũhĩhia nyama yake, akarĩa na akahũna. Ningĩ agota mwaki na akoiga atĩrĩ: “Hĩ! Nĩ ndaigua ũrugarĩ o ngĩĩroragĩra mwaki.”

Ĩndĩ ũcio ũngĩ akaũthondeka ũgatuĩka El, ũgatuĩka mũhianano wake wa gwacũhio. Akaũinamĩrĩra na akaũthathaiya. Akaũhoya akoiga ũũ: “Honokia, tondũ wee nĩwe El wakwa.”

Gũtirĩ ũndũ moĩ, gũtirĩ ũndũ mataũkagĩrũo nĩguo, Tondũ maitho mao nĩ mahinge biũ tarĩ kũnyorokio na ngamu na matingĩona, Na ngoro ciao itirĩ ũtaũku.

Gũtirĩ o na ũmwe wĩcũranagia ngoro-inĩ yake Kana akagĩa na ũmenyo kana ũtaũku akoiga atĩrĩ: “Nuthu yaguo nĩ njinire mwaki-inĩ, Na igũrũ rĩa makara maguo ndaruga mũgate na ndahĩhia nyama ndarĩa. Nĩ ũndũ ũcio-rĩ, hihi nĩ njagĩrĩirũo kũhũthĩra kĩrĩa gĩatigara gũthondeka kĩndũ kĩrĩ magigi? Hihi nĩ njagĩrĩirũo gũthathaiya gĩcunjĩ kĩa mũtĩ?”

Arĩaga mũhu. Ngoro yake ĩyo ĩheenetio nĩ ĩmũhĩtithĩtie. Ndangĩhota kwĩhonokia, o na ndangiuga atĩrĩ: “Na githĩ ti maheeni marĩ guoko-inĩ gwakwa kwa ũrĩo?”

“Ririkana maũndũ macio, wee Jakubu, o nawe Isiraeli, Nĩ gũkorũo ũrĩ ndungata yakwa. Tondũ nĩ niĩ ndakũũmbire, na ũrĩ ndungata yakwa. Wee Isiraeli, ndikaariganĩrũo nĩwe.

Nĩ ngaahuura mahĩtia maku mahaane ta mahumbĩrĩtwo nĩ itu, O na mehia maku mahaane ta mahumbĩrĩtwo nĩ itu rĩirũ. Coka kũrĩ niĩ, nĩ gũkorũo nĩ ngũgũkũũra.

Ina wee igũrũ, Tondũ Yahweh nĩ oete ikinya! Anĩrĩrai nĩ ũndũ wa ũhootani, inyuĩ kũndũ kũrĩa kũriku thĩinĩ wa thĩ! Anĩrĩrai nĩ gũkena, inyuĩ irĩma, Wee mũtitũ, o hamwe na mĩtĩ yaku yothe! Nĩ gũkorũo Yahweh nĩ akũũrĩte Jakubu, Na akonania ũgemu wake harĩ Isiraeli.”

Yahweh, o we Mũkũũri waku, Ũrĩa wakũũmbire kuuma rĩrĩa warĩ thĩinĩ wa nda oigĩte ũũ: “Niĩ nĩ niĩ Yahweh, ũrĩa wombire indo ciothe. Igũrũ ndarĩtambũrũkirie ndĩ wiki, Na ngĩtambũrũkia thĩ. Nũũ warĩ hamwe na niĩ?

Nĩ niĩ ndũmaga imenyithia cia anabii a maheeni itharare, Na nĩ niĩ ndũmaga aragũri mahaane o ta irimũ; Nĩ niĩ ũrĩa ũtũmaga andũ arĩa ogĩ matukanĩrũo Na ngatũma ũũgĩ wao ũtuĩke ũrimũ;

O we Ũrĩa ũtũmaga kiugo kĩa ndungata yake kĩhinge Na akahingia biũ maũndũ marĩa marathĩtwo nĩ atũmwo ake; Ũrĩa ũroiga atĩrĩ igũrũ rĩgiĩ Yahrushalayim, ‘Nĩ ĩgaaikarũo rĩngĩ!’ Na igũrũ rĩa matũũra ma Yahuda akoiga ũũ, ‘Nĩ magaakwo rĩngĩ! Na kũndũ gwakuo kũrĩa kwanangĩku nĩ ngaagwaka rĩngĩ’!

Nĩ niĩ njĩraga maĩ marĩa mariku ũũ, ‘Hũai! Na nĩ ngũhũithia njũũĩ cianyu ciothe’;

O we Ũrĩa uugaga ũũ igũrũ rĩgiĩ Kurusu, ‘Nĩ mũrĩithi wakwa! Na nĩ akaahingia wendi wakwa biũ’; O we Ũrĩa ũroiga atĩrĩ igũrũ rĩgiĩ Yahrushalayim, ‘Nĩ ĩgaaikarũo rĩngĩ!’ Na ũhoro wĩgiĩ hekarũ akoiga, ‘Mũthingi waku nĩ ũgaakwo!’”