Isaiya 58

“Anĩrĩra na hinya ũhingũrĩte mũmero wothe; ndũkegirĩrĩrie! Haicia kayũ biũ o ta coro wa rũhĩa rwa ndũrũme. Ũmbũrĩra andũ akwa ũhoro wao wa kwagarara Watho, Ũmenyithie nyũmba ya Jakubu ũhoro wa mehia mao.

Na atĩ Matindaga makĩnjetha mũthenya o mũthenya, Na makoneka makĩenda kũmenya njĩra ciakwa, Ta marĩ rũrĩrĩ rwĩkaga maũndũ ma ũthingu Na rũtatiganĩirie matua maria marũngĩrĩru ma cira ma Kĩhoti wao. Manjĩraga ndĩmatuĩre matuĩro magĩrĩru ma ũthingu, ta marakenera gũkuhĩrĩria Kĩhoti:

‘Nĩ kĩĩ gĩtũmaga wage kuona rĩrĩa twĩhingĩte kũrĩa irio? Na nĩ kĩĩ gĩtũmaga wage kuona rĩrĩa twanyerekia mĩoyo itũ?' Oneei! Nĩ tondũ mũthenya ũrĩa mwĩhingĩte, mũkoragwo mũgĩthingata maũndũ manyu ene, Na mũkahinyĩrĩria arĩa mamũrutagĩra wĩra.

Kwĩhinga kwanyu kũrĩkagĩrĩria na ngũĩ na haaro, Na mũkagũthana ngundi njũru ta andũ aganu. Mũtingĩĩhinga ũrĩa mwĩhingaga ũmũthĩ na mũgambo wanyu ũiguo kũrĩa igũrũ.

Hihi kwĩhinga ta kũu nĩkuo thuurĩte? Atĩ Mũndũ kũhũthĩra mũthenya tu enyereketie? Atĩ aturumithie mũtwe thĩ o ta itothua, Na akaara ũrĩrĩ wake nguo cia makũnia na mũhu? Hihi kũu nĩkuo mũreta kwĩhinga na mũkoiga atĩ nĩ mũthenya ũngĩtĩkĩrĩka nĩ Yahweh?

Na githĩ kwĩhinga kũrĩa thuurĩte ti gũkũ: Kũregeria mĩkanda ĩyo mĩnyitu ya waganu, Kuohora mĩkwa ya icoki rĩa ngingo, Kũrekereria arĩa mahinyĩrĩirio, Na kuunanga macoki mothe.

Na githĩ ti kũgayana mũgate waku na ũrĩa mũhũtu, Na atĩ ũrehe ũrĩa mũthĩni o ũcio ũingatĩtwo kwao agaikio nja ũmũhe gwa gũikara gwaku mũciĩ, Kũhumba mũndũ ũtarĩ nguo wamuona, Na kwaga kũhũgũka ũkehitha andũ a mũthimo waku.

Hĩndĩ ĩyo ũtheri waku nĩguo ũngĩcomoka ũcangararĩte o ta riua rĩkĩratha, Nakuo kũhonio gwaku kuumĩre narua na mĩtũkĩ. Naguo ũthingu waku ũthiage ũgũtongoirie, Naguo riri wa Yahweh ũgakoragwo ũkuumĩte thutha ũkũgitĩire.

Hĩndĩ ĩyo nĩ ũgeetana, nake Yahweh nĩ agaagũcokeria; Nĩ ũgaakaya ũkĩenda ũteithio, nake akoiga ũũ, ‘Ndĩ haha!’ Ũngĩeheria icoki gatagatĩ-inĩ gaku Na ũtige kuorotana na kwaria ndeto itarĩ cia ũthingu,

Ũngĩtambũrũkia guoko gwaku ũhe ũrĩa mũhũtu gĩa kũrĩa, Nao arĩa ahinyĩrĩrie ũmahingĩrie mabataro mao, Hĩndĩ ĩyo ũtheri waku ũgathererũka ware handu he nduma, Nayo nduma yaku ĩtuĩke o ta mũthenya gatagatĩ.

Hĩndĩ ĩyo nake Yahweh nĩ arĩgũtongoragia hingo ciothe Na anyotorage muoyo waku hingo ĩrĩa kũng'arĩte; Na ekagĩre mahĩndĩ maku hinya, Nawe ũkahaana ta mũgũnda ũitagĩrĩrio maĩ, O ta itherũkĩro rĩa maĩ, rĩrĩa rĩtahũaga.

Na andũ amwe arĩa mwĩ nao, nĩo magaka maganjo marĩa manangirwo tene. Na nĩ ũgaka rĩngĩ mĩthingi ya njiarũa nyingĩ. Nĩ ũgeetwo Mũcokereria wa thingo iria njatũkangu, o na Mũcokereria wa barabara cia kũndũ gwa gũikarũo.

Ũngĩgarũra kũgũru gwaku ũtige gũthũkia Thabatũ, ũtigane na maũndũ maku mwene ma gwĩkenia mũthenya wakwa ũrĩa mwamũre, Na wĩte Thabatũ gĩkeno kĩa ngoro yaku, ũmĩĩte Mũthenya Mwamũre wa Yahweh, Mũthenya wa gũtũũgĩrio, Na ũmĩtũũgĩrie handũ ha gũthingataga maũndũ maku mwene kana kwaria ndeto ciaku we mwene-rĩ,

Hĩndĩ ĩyo nĩ ũgekenagĩra nĩ ũndũ wa Yahweh, Na nĩ ngaatũmaga ũgeragĩre kũndũ kũrĩa gũtũũgĩru mũno thĩinĩ wa thĩ. Nĩ ngaatũmaga ũrĩe kuuma igai-inĩ rĩa thoguo Jakubu. Nĩ gũkorũo kanua ka Yahweh nĩko koigĩte ũguo.”