Isaiya 59

Tooneii, guoko kwa Yahweh ti gũkuhĩ gũkaremwo nĩ kũhonokania, Kana gũtũ gwake gũkahingĩka gũkaaga kũigua.

Aca, mahĩtia manyu inyuĩ ene nĩmo mamwamũranĩtie na Kĩhoti wanyu. Mehia manyu nĩmo matũmĩte amũhithe ũthiũ wake, Na akarega kũmũigua.

Tondũ moko manyu nĩ mathahĩtio nĩ thakame Nacio ciara cianyu igathahio nĩ waganu. Mĩromo yanyu yarĩtie ndeto cia maheeni, naruo rũrĩmĩ rwanyu rũkang’ung’ua ndeto itarĩ cia ũthingu.

Gũtirĩ mũndũ wanagĩrĩra ageeta ũthingu, Na gũtirĩ mũndũ ũthiaga igooti-inĩ arĩ na ũhoro wa ma. Mehokaga maũndũ matarĩ kĩene na makaria maũndũ ma tũhũ. Mohaga nda ya thĩna na magaciara maũndũ moru.

Matũrĩkagia matumbĩ ma ndarabubwa, Na makogotha rũrenda rwa mbũmbũĩ. Mũndũ ũrĩa ũngĩrĩa matumbĩ macio mao no gũkua angĩkua, Na itumbĩ rĩrĩa rĩatũrĩkio riumaga o ndarabubwa.

Nenda ciao itingĩhũthĩka ta nguo, O na kana mehumbĩre na kĩrĩa mathondekete na moko mao. Wĩra wao nĩ wĩra wa waganu, Na ciĩko cia ũhinya nĩcio irĩ moko-inĩ mao.

Magũrũ mao mateng’eraga gwĩka ũũru, Na makahang'ahang'a nĩguo magaite thakame ĩtehĩtie. Meciria mao nĩ meciria ma waganu; Njĩra-inĩ ciao matigaga o ũniinani na mwanangĩko.

Njĩra ya thayũ matirĩ mamĩmenya, Na mĩthiĩre-inĩ yao gũtikoragwo na matua ma cira marũngĩrĩru. Nĩ kuogomia mogometie njĩra ciao; Gũtirĩ mũndũ ũgeraga thĩinĩ wacio ũkaamenya ũhoro wa thayũ.

Nĩkĩo matua ma cira marũngĩrĩru makoragwo kũraihu mũno na ithuĩ, Na ũthingu ndũtũkinyagĩra. Tũikaraga tũgĩethaga ũtheri, no atĩrĩ, nduma nĩyo ĩkoragwo kuo; Tũikaraga twĩrĩgĩrĩire ũtheri, no tũthiaga na mbere kũgerera nduma-inĩ ndumanu.

Tũhambataga tũgĩetha rũthingo ta andũ atumumu; O ta andũ matarĩ maitho tũikaraga tũkĩhambataga. Tũhĩngagwo riua rĩ thaa thita o ta kwĩna mairia: Tũgaikara kũndũ gũthamĩtwo gũgakira ihoru o ta andũ akuũ.

Ithuothe tũikaraga tũkĩraramaga o ta nduba Na gũcakaya na kamũgambo gaceke ta ndutura. Tũcaragĩrĩria matua marũngĩrĩru, no tũtikĩonaga; Tũgethana na ũhonokio, no ũkoragwo haraihu mũno na ithuĩ.

Tondũ ũremi witũ nĩ ũingĩhĩte mũno mbere yaku; Mehia maitũ nĩ marutaga ũira ũtwĩgiĩ. Nĩ gũkorũo wagarari witũ wa Watho ũrĩ hamwe na ithuĩ; Na nĩ tũguũkĩirwo wega mahĩtia maitũ.

Tũgakĩagarara Watho na tũgakaana Yahweh; tũgakĩhũgũkĩra Kĩhoti witũ tũgatigana nake. Nĩ twarĩtie ndeto cia kũhinyanĩrĩria na cia ũregenyũki; Tũkoha mahu maciaraga o maheeni na tũkang’ung’ua ciugo cia maheeni ngoro-inĩ.

Itua rĩrũngĩrĩru narĩo rĩkagirĩrĩrio rĩkaingatwo, Naguo ũthingu ũkarũgama handũ haraya; Tondũ ũhoro wa ma nĩ ũhĩngĩtwo ũkagũa kĩhaaro-inĩ kĩa mũingĩ, Na ũndũ ũrĩa mũrũngĩrĩru ũkaremwo kũingĩra.

Ũhoro wa ma ndũroneka kuo, Na mũndũ ũrĩa wĩthemaga ũũru nĩ ta kwĩneana eneanaga kwĩ ndĩa nyama. Yahweh nĩ oonire ũndũ ũcio na akĩigua ũũru, Tondũ gũtiarĩ na matua marũngĩrĩru.

Akĩona atĩ gũtiarĩ na mũndũ, Na akĩmaka tondũ gũtiarĩ na wa gũthaithanĩrĩra. Kwoguo guoko gwake we mwene gũkĩrehe ũhonokio, Na ũthingu wake we mwene ũkĩmũtiirĩrĩra.

Agĩkĩĩhumba ũthingu o ta gako ga kũgitĩra gĩthũri, Na gĩtukũ kĩa ũhonokio mũtwe-inĩ wake. Akĩĩhumba nguo cia kũrĩhanĩria ikorũo irĩ itonyo rĩake, Na akĩĩrigita kĩyo o ta arĩ nguo ĩrĩa ndaya ya mbaara.

Amarĩhaga kũringana na maũndũ marĩa mekĩte: Arĩa makararanagia nake amarĩhe na mang'ũrĩ make, thũ ciake acigere ngero erĩhĩrie. Nacio hũgũrũrũ cia iria acigere ngero ĩrĩ ĩrĩhi rĩacio.

Kuuma ithũĩro nĩ mageetigĩra rĩĩtwa rĩa Yahweh Na kuuma irathĩro rĩa riũa metigĩre riri wake, Nĩ gũkorũo agooka o ta karũũĩ kaihũru gathererete na ihenya mũno, kahurumũrĩtwo nĩ Roho wa Yahweh.

“Nake Mũkũũri nĩ agooka akinye Zayuni, Oke kũrĩ arĩa matiganĩte na mehia mao a nyũmba ya Jakubu,” ũguo nĩguo Yahweh oigĩte.

“Ha ũhoro wakwa-rĩ, gĩkĩ nĩkĩo kĩrĩkanĩro gĩakwa hamwe nao,” ũguo nĩguo Yahweh oigĩte. “Roho wakwa ũrĩa ũrĩ igũrũ rĩaku o na ciugo ciakwa iria njĩkĩrĩte kanua-inĩ gaku—itikeeherio kanua-inĩ gaku, kanua-inĩ ga ciana ciaku, kana kanua-inĩ ga ciana cia ciana ciaku, kuuma rĩu nginya tene na tene,” ũguo nĩguo Yahweh oigĩte.