Isaiya 60

“Arahũka wee, caangarara, nĩ gũkorũo ũtheri wa gũgũtherera nĩ ũũkĩte. Riri wa Yahweh ũkaratha ta riua ũkwarĩire.

Tondũ rĩrĩ! Nduma nĩ ĩkũhumbĩra thĩ Na nduma ndumanu ĩhumbĩre ndũrĩrĩ; Ĩndĩ Yahweh nĩ egũkwarĩra, Naguo riri wake nĩ ũkuoneka igũrũ rĩaku.

Ndũrĩrĩ nĩ igokaga harĩ ũtheri waku Nao athamaki makinye harĩ kũrĩa ũcangararĩte ta riua rĩkĩratha.

Tiira maitho maku na ũrore mĩena yothe! Othe nĩ macokanĩrĩirio; maroka kũrĩ wee. Ariũ aku no maroka moimĩte kũraya, Na aarĩ aku maroka manyitĩrĩirũo njohero.

Hĩndĩ ĩyo nĩ ũkeyonera na ũcangarare, Nayo ngoro yaku ĩtumatume na ĩiyũrĩrĩrũo, Tondũ ũtonga wa iria nĩ ũkerekerio harĩ wee; Indo cia ndũrĩrĩ nĩ ikarehwo kũrĩ wee.

Ndũũru nyingĩ mũno cia ngamĩra nĩ ikaiyũra bũrũri waku, Njaũ cia njamba cia ngamĩra kuuma Midiani na Efa. Andũ othe kuuma Sheba nĩ magooka; Magooka makuuĩte thahabu na ũbani. Na moke makiumbũraga ngumo cia Yahweh.

Ndũũru ciothe cia mbũri cia Kedari nĩ igaacokanĩrĩrio harĩ wee. Ndũrũme cia Nebaiothu nĩ igaagũtungatĩra. Igooka kĩgongona-inĩ gĩakwa ciĩtĩkĩrĩkĩte, Na niĩ nĩ ngaathakaria nyũmba yakwa ĩrĩa ĩrĩ riri.

Nĩa aya marathiĩ mombũkĩte ta matu, O ta ndutura cierekeire tũnyũmba-inĩ twacio?

Nĩ gũkorũo hũgũrũrũ cia iria nĩ cinjĩrĩgĩrĩire; Meri cia Tarishishi nĩcio itongoretie, Kũrehe ariũ aku kuuma kũndũ kũraya, Hamwe na betha ciao na thahabu ciao, Kũrĩ rĩĩtwa rĩa Yahweh Kĩhoti waku na kũrĩ Ũrĩa Mwamũre wa Isiraeli, Tondũ nĩ akũhumbĩte riri.

Andũ a kũngĩ nĩ magaaka thingo ciaku, Nao athamaki ao magũtungatĩre, Nĩ gũkorũo nĩ ũndũ wa marakara makwa nĩ ndakũhũũrire, No nĩ ngaigua wega, rĩrĩa ngakũiguĩra tha.

Ihingo ciaku igaaikaraga ihingũrĩtwo hingo ciothe; Itikahingwo mũthenya kana ũtukũ, Nĩgetha ũreherũo ũtonga wa ndũrĩrĩ, Nao athamaki ao makorwo marũrũnganĩte mũtongoro.

Nĩ gũkorũo rũrĩrĩ o ruothe na ũthamaki o wothe ũrĩa ũtagaagũtungatĩra nĩ ũkahuka, Nacio ndũrĩrĩ icio nĩ ikaanangwo biũ.

Riri wa Lebanoni nĩ ũgooka harĩ wee, Mũtĩ wa mũthengera, wa mũbinde, na wa mũthithinda ĩrĩ hamwe, Nĩguo ĩthakarie handũ hakwa harĩa hamũre. Nĩ ngaatũma handũ hau ha magũrũ makwa hagĩe na riri.

Ariũ a arĩa maakũhinyĩrĩirie nĩ magooka na mainamĩrĩre mbere yaku; Arĩa othe makwagagĩra gĩtĩo no mũhaka magaakũinamĩrĩra maturumithie mĩtwe makinya-inĩ maku, Na magwĩte Itũũra rĩa Yahweh, Zayuni ya Ũrĩa Mwamũre wa Isiraeli.

Ithenya rĩa gũkorũo ũtiganĩirio na ũmenetwo, hatarĩ mũndũ ũragũtuĩkanĩria, Nĩ ngaagũtua kĩhumo kĩa mwĩraho tene na tene, Na ũtuĩke kĩhumo gĩa gĩkeno njiarũa-inĩ ciothe.

Na nĩ ũkaanyua iria rĩa ndũrĩrĩ ũrĩnine, Na ũkame nyondo cia athamaki. Na hatarĩ nganja nĩ ũkaamenya atĩ niĩ, Yahweh, nĩ niĩ Mũhonokia waku,o niĩ Mũkũri waku, nĩ niĩ Kĩhoti wa Jakubu.

Ithenya rĩa gĩcango ngaarehe thahabu, Na ithenya rĩa kĩgera ngaarehe betha, Ithenya rĩa mbaũ, gĩcango Na ithenya rĩa mahiga, kĩgera; Na nĩ ngaamũra thayũ ũtuĩke arori aku Naguo ũthingu ũtuĩke atuanĩri cira aku.

Gũtirĩ hĩndĩ gũgaacoka kũiguo maũndũ ma ũhinya rĩngĩ bũrũri-inĩ waku, Kana mwanangĩko o na kũniinwo, thĩinĩ wa mĩhaka yaku. Na nĩ ũgeeta thingo ciaku Ũhonokio na ihingo ciaku ũciĩte Ũkũmio.

Nĩ gũkorũo riũa rĩtigaacoka gũtuĩka ũtheri waku mũthenya, O na kana gũcangarara kwa mweri gũkũhe ũtheri, Tondũ Yahweh nĩ agaatuĩka ũtheri wa tene na tene harĩ wee, Na Kĩhoti waku atuĩke ũthaka waku.

Riũa rĩaku rĩtigaacoka gũthũa, O na mweri waku ndũkaabuĩria, Nĩ ũndũ Yahweh nĩ agaatuĩka ũtheri wa tene na tene harĩ wee, Namo matukũ ma gũcakaya gwaku makorũo mathirĩte.

Nao andũ aku, marĩ othe magaakorũo marĩ athingu; Nĩ makaagaya thĩ tene na tene. Acio nĩ thuuna ĩrĩa ndahandire, Wĩra wa moko makwa, nĩgetha niĩ ng’emio.

Ũrĩa mũnini agaatuĩka andũ ngiri Nayo nyũmba nyinyi ĩtuĩke rũrĩrĩ rũrĩ hinya. Niĩ mwene, Yahweh, nĩ niĩ ngaahĩka ũndũ ũcio ihinda rĩaguo rĩakinya.”